ਵਿਵਾਦਾਂ ਦੇ ਬਾਵਜੂਦ ਲਿਬਰਲ ਪਾਰਟੀ ਨੇ ਉਮੀਦਵਾਰ ਪਾਲ ਚਿਆਂਗ ਦਾ ਦਿੱਤਾ ਸਾਥ

ਕੰਜ਼ਰਵੇਟਿਵ ਪਾਰਟੀ ਦੇ ਉਮੀਦਵਾਰ ਖਿਲਾਫ ਵਿਵਾਦਤ ਟਿੱਪਣੀ ਮਾਮਲੇ ਵਿਚ ਲਿਬਰਲਸ ਵਲੋਂ ਟੋਰੌਂਟੋ ਖੇਤਰ ਦੇ ਆਪਣੇ ਉਮੀਦਵਾਰ ਪਾਲ ਚਿਆਂਗ ਨੂੰ ਬਰਖ਼ਾਸਤ ਨਹੀਂ ਕੀਤਾ ਜਾਵੇਗਾ। ਲਿਬਰਲ ਪਾਰਟੀ ਦੇ ਲੀਡਰ ਮਾਰਕ ਕਾਰਨੀ ਨੇ ਅੱਜ ਸਵੇਰ ਇਸ ਦੀ ਪੁਸ਼ਟੀ ਕੀਤੀ।

ਕਾਰਨੀ ਨੇ ਕਿਹਾ ਕਿ ਚਿਆਂਗ ਉਹ ਸ਼ਖ਼ਸ ਹਨ ਜਿਨ੍ਹਾਂ ਨੇ ਪੁਲਿਸ ਵਿਚ ਰਹਿ ਕੇ ਸਾਡੀ ਕਮਿਊਨਿਟੀ ਦੀ ਲੰਮੇ ਸਮੇਂ ਤੱਕ ਸੇਵਾ ਕੀਤੀ ਅਤੇ ਉਨ੍ਹਾਂ ਆਪਣੇ ਬਿਆਨ ਲਈ ਮਾਫੀ ਵੀ ਮੰਗੀ ਹੈ, ਇਸ ਲਈ ਉਹ ਮਾਰਖਮ-ਯੂਨੀਅਨਵਿਲ ਰਾਈਡਿੰਗ ਤੋਂ ਲਿਬਰਲ ਪਾਰਟੀ ਦੇ ਉਮੀਦਵਾਰ ਦੇ ਰੂਪ ਵਿਚ ਚੋਣ ਮੈਦਾਨ ਵਿਚ ਬਣੇ ਰਹਿਣਗੇ।

ਗੌਰਤਲਬ ਹੈ ਕਿ ਚਿਆਂਗ ਨੇ ਜਨਵਰੀ ਵਿਚ ਇੱਕ ਸਥਾਨਕ ਚੀਨੀ-ਭਾਸ਼ਾ ਸਮਾਗਮ ਦੌਰਾਨ ਆਪਣੇ ਭਾਈਚਾਰੇ ਦੇ ਲੋਕਾਂ ਨੂੰ ਹਾਂਗ ਕਾਂਗ ਪੁਲਿਸ ਦੇ ਇਨਾਮ ਦੇ ਬਦਲੇ ਡੌਨ ਵੈਲੀ ਨੌਰਥ ਤੋਂ ਕੰਜ਼ਰਵੇਟਿਵ ਪਾਰਟੀ ਦੇ ਉਮੀਦਵਾਰ ਜੋਅ ਟੇਅ ਨੂੰ ਚੀਨ ਹਵਾਲੇ ਕਰਨ ਲਈ ਉਤਸ਼ਾਹਤ ਕੀਤਾ ਸੀ। ਇਸ ਬਿਆਨ ਦੀ ਨਿੰਦਾ ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਵੀ ਕੀਤੀ ਹੈ।