ਸਟੈਟਿਸਟਿਕਸ ਕੈਨੇਡਾ : ਕੈਨੇਡੀਅਨਜ਼ ਦੀ ਲਾਈਫ਼ ਐਕਸਪੇਟੈਂਸੀ 'ਚ ਲਗਾਤਾਰ ਤੀਜੇ ਸਾਲ ਗਿਰਾਵਟ

ਕੈਨੇਡੀਅਨ ਦੀ ਲਾਈਫ਼ ਐਕਸਪੇਟੈਂਸੀ ਵਿੱਚ 2022 ਵਿੱਚ ਲਗਾਤਾਰ ਤੀਜੇ ਸਾਲ ਗਿਰਾਵਟ ਦਰਜ ਕੀਤੀ ਗਈ ਅਤੇ ਸਟੈਟਿਸਟਿਕਸ ਕੈਨੇਡਾ ਦੀ ਰਿਪੋਰਟ ਮੁਤਾਬਕ ਮਹਾਂਮਾਰੀ ਸ਼ੁਰੂ ਹੋਣ ਤੋਂ ਬਾਅਦ ਪਿਛਲੇ ਸਾਲ ਕੋਵਿਡ ਨਾਲ ਸਭ ਤੋਂ ਜ਼ਿਆਦਾ ਲੋਕਾਂ ਦੀਆਂ ਮੌਤਾਂ ਹੋਈਆਂ।

ਇਸ ਦੌਰਾਨ ਕੈਨੇਡੀਅਨਜ਼ ਦੀ ਲਾਈਫ਼ ਐਕਸਪੇਟੈਂਸੀ ਘੱਟ ਕੇ 81.3 ਸਾਲ ਹੋ ਗਈ, ਜੋ 2019 ਵਿੱਚ ਦਰਜ 82.3 ਸਾਲਾਂ ਨਾਲੋਂ ਪੂਰਾ ਇੱਕ ਸਾਲ ਘੱਟ ਹੈ।ਲਾਈਫ਼ ਐਕਸਪੇਟੈਂਸੀ ਉਦੋਂ ਘੱਟ ਮੰਨੀ ਜਾਂਦੀ ਹੈ ਜਦੋਂ ਜ਼ਿਆਦਾ ਮੌਤਾਂ ਹੁੰਦੀਆਂ ਹਨ। ਰਿਪੋਰਟ ਮੁਤਾਬਕ, ਪਿਛਲੇ ਸਾਲ ਕੈਨੇਡੀਅਨਜ਼ ਵਿੱਚ ਮੌਤ ਦਾ ਤੀਜਾ ਪ੍ਰਮੁੱਖ ਕਾਰਨ ਕੋਵਿਡ ਸੀ, ਜਿਸ ਨੇ 2020 ਵਿੱਚ ਇਸ ਬਿਮਾਰੀ ਦੇ ਸਾਹਮਣੇ ਆਉਣ ਤੋਂ ਬਾਅਦ ਪਹਿਲੀ ਵਾਰ ਦੁਰਘਟਨਾਵਾਂ ਅਤੇ ਅਚਾਨਕ ਲੱਗੀਆਂ ਸੱਟਾਂ ਕਾਰਨ ਹੋਣ ਵਾਲੀਆਂ ਮੌਤਾਂ ਨੂੰ ਪਛਾੜ ਦਿੱਤਾ।

ਉੱਥੇ ਹੀ ਕੈਂਸਰ ਅਤੇ ਦਿਲ ਦੀ ਬਿਮਾਰੀ ਮੌਤ ਦਰ ਦੇ ਪਹਿਲੇ ਅਤੇ ਦੂਜੇ ਸਭ ਤੋਂ ਆਮ ਕਾਰਨ ਸਨ ਅਤੇ 2022 ਵਿੱਚ ਹੋਈਆਂ ਕੁੱਲ ਮੌਤਾਂ ਵਿੱਚ ਇਨ੍ਹਾਂ ਦਾ ਅੰਕੜਾ 41.8 ਫੀਸਦੀ ਸੀ। ਰਿਪੋਰਟ ਮੁਤਾਬਕ ਪਿਛਲੇ ਸਾਲ ਨਿਊ ਬਰੰਜ਼ਵਿਕ ਵਿੱਚ ਲਾਈਫ਼ ਐਕਸਪੇਟੈਂਸੀ ਵਿੱਚ ਸਭ ਤੋਂ ਵੱਧ ਗਿਰਾਵਟ ਦੇਖੀ ਗਈ।

ਸਟੈਟਿਸਟਿਕਸ ਕੈਨੇਡਾ ਨੇ ਕਿਹਾ ਕਿ ਪਿਛਲੇ ਸਾਲ ਕੋਵਿਡ-19 ਕਾਰਨ 19,700 ਤੋਂ ਵੱਧ ਕੈਨੇਡੀਅਨਜ਼ ਦੀ ਮੌਤ ਹੋਈ ਸੀ। ਜਿਨ੍ਹਾਂ ਵਿੱਚ 91.4 ਫੀਸਦੀ ਲੋਕ 65 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਸਨ।