24.86C Vancouver 24.86C VancouverJul 23, 2026 5:32 PM - Connect Newsroom - Pervez Sandhu with files from The Canadian Press
ਬੀ.ਸੀ. ਦੇ ਫਰੇਜ਼ਰ ਕੈਨਿਯਨ ਵਿਚ ਸਥਿਤ ਲਿਟਨ ਕਮਿਊਨਿਟੀ ਵਿਚ ਬੁੱਧਵਾਰ ਨੂੰ ਤਾਪਮਾਨ 41.2 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਹੈ, ਜੋ ਕਿ ਇਸ ਸਾਲ ਪੂਰੇ ਕੈਨੇਡਾ ਵਿਚ ਰਿਕਾਰਡ ਕੀਤਾ ਗਿਆ ਹੁਣ ਤੱਕ ਦਾ ਸਭ ਤੋਂ ਵੱਧ ਤਾਪਮਾਨ ਹੈ। ਇਨਵਾਇਰਮੈਂਟ ਕੈਨੇਡਾ ਮੁਤਾਬਕ, ਲਿਟਨ ਵਿਚ ਲਗਾਤਾਰ ਦੂਜੇ ਦਿਨ ਤਾਪਮਾਨ 40 ਡਿਗਰੀ ਤੋਂ ਪਾਰ ਪਹੁੰਚਿਆ ਹੈ।
ਮੰਗਲਵਾਰ ਨੂੰ ਇੱਥੇ 40.5 ਡਿਗਰੀ ਤਾਪਮਾਨ ਸੀ, ਜਿਸ ਨਾਲ ਇੱਥੇ ਸਾਲ 2006 ਵਿਚ ਬਣਿਆ ਰੋਜ਼ਾਨਾ ਗਰਮੀ ਦਾ ਪੁਰਾਣਾ ਰਿਕਾਰਡ ਵੀ ਟੁੱਟ ਗਿਆ ਹੈ। ਹਾਲਾਂਕਿ, ਦੂਜੇ ਪਾਸੇ ਮੈਟਰੋ ਵੈਨਕੂਵਰ ਅਤੇ ਫਰੇਜ਼ਰ ਵੈਲੀ ਵਰਗੇ ਇਲਾਕਿਆਂ ਵਿਚ ਗਰਮੀ ਤੋਂ ਕੁਝ ਰਾਹਤ ਮਿਲੀ ਹੈ ਪਰ ਫਰੇਜ਼ਰ ਕੈਨਿਯਨ, ਓਕਾਨਾਗਨ, ਕੂਟੇਨੇ, ਸ਼ੁਸਵੈਪ ਅਤੇ ਕੈਰੀਬੂ ਖੇਤਰਾਂ ਵਿਚ ਅਜੇ ਵੀ 20 ਤੋਂ ਵੱਧ ਹੀਟ ਅਲਰਟ ਲਾਗੂ ਹਨ।
ਮੌਸਮ ਏਜੰਸੀ ਅਨੁਸਾਰ ਬੁੱਧਵਾਰ ਨੂੰ ਲਿਟਨ ਸਮੇਤ ਬੀ.ਸੀ. ਦੇ 12 communities ਵਿਚ ਗਰਮੀ ਦੇ ਨਵੇਂ ਰਿਕਾਰਡ ਬਣੇ ਹਨ, ਜਿਨ੍ਹਾਂ ਵਿਚ ਕੈਸ਼ੇ ਕ੍ਰੀਕ ਅਤੇ Osoyoos ਪ੍ਰਮੁੱਖ ਹਨ। ਹਾਲਾਂਕਿ,ਲਿਟਨ ਵਿਚ ਤਾਪਮਾਨ ਦਾ ਲੇਟਸਟ ਰਿਕਾਰਡ 29 ਜੂਨ 2021 ਨੂੰ ਦਰਜ ਕੀਤੇ ਗਏ ਕੈਨੇਡਾ ਦੇ ਇਤਿਹਾਸਕ 49.6 ਡਿਗਰੀ ਦੇ ਰਿਕਾਰਡ ਤੋਂ ਕਾਫ਼ੀ ਘੱਟ ਹੈ, ਜਿਸ ਤੋਂ ਅਗਲੇ ਹੀ ਦਿਨ ਇਹ ਪਿੰਡ ਜੰਗਲੀ ਅੱਗ ਕਾਰਨ ਤਬਾਹ ਹੋ ਗਿਆ ਸੀ।
