9.73C Vancouver 9.73C VancouverOct 5, 2025 10:40 PM - Connect Newsroom - Pervez Sandhu
ਅੱਜ ਸਰੀ 'ਚ 152 ਸਟ੍ਰੀਟ ਅਤੇ 60 ਐਵੀਨਿਊ ਦੇ ਨੇੜ ਕਿਲਮੋਰ ਕ੍ਰੀਸੈਂਟ ਦੇ ਇਲਾਕੇ 'ਚ ਵੱਡੀ ਪੁਲਿਸ ਕਾਰਵਾਈ ਵੇਖਣ ਨੂੰ ਮਿਲੀ।
ਇਸ ਦੌਰਾਨ ਇਲਾਕੇ 'ਚ ਸਥਿਤ ਇੱਕ ਘਰ ਤਕ ਵੱਡੀ ਗਿਣਤੀ 'ਚ ਪੁਲਿਸ ਅਫਸਰਾਂ ਨੇ ਪਹੁੰਚ ਕੀਤੀ ਅਤੇ ਕੁਝ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ।
ਪੁਲਿਸ ਵੱਲੋਂ ਮਾਮਲੇ 'ਚ ਕੋਈ ਅਧਿਕਾਰਿਤ ਜਾਣਕਾਰੀ ਆਉਣੀ ਬਾਕੀ ਹੈ ਪਰ ਕੁਝ ਆਂਢ-ਗੁਆਂਢ ਦੇ ਲੋਕਾਂ ਨੇ ਕਨੈਕਟ ਐਫ.ਐਮ. ਦੀ ਟੀਮ ਨਾਲ ਗੱਲ ਕਰਦਿਆਂ ਦੱਸਿਆ ਕਿ ਘੱਟੋ-ਘੱਟ 3 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
ਕਨੈਕਟ ਐਫ.ਐਮ. ਨੇ ਮਾਮਲੇ ਸੰਬੰਧੀ ਜਾਣਕਾਰੀ ਲਈ ਸਰੀ ਪੁਲਿਸ ਸਰਵਿਸ ਦੇ ਮੀਡੀਆ ਰਿਲੇਸ਼ਨਸ ਅਧਿਕਾਰੀ Sergeant Tige Pollock ਨਾਲ ਗੱਲਬਾਤ ਕੀਤੀ।
ਉਨ੍ਹਾਂ ਦੱਸਿਆ ਕਿ ਪੁਲਿਸ ਟੀਮ ਅਜੇ ਵੀ ਪ੍ਰਾਪਰਟੀ 'ਤੇ ਹੀ ਮੌਜੂਦ ਹੈ ਅਤੇ ਅਧਿਕਾਰਿਤ ਜਾਣਕਾਰੀ ਸੋਮਵਾਰ ਨੂੰ ਹੀ ਜਾਰੀ ਕੀਤੀ ਜਾਵੇਗੀ।
ਅਸੀਂ ਪੁੱਛਿਆ ਕਿ ਮੌਕੇ ਤੋਂ ਕਿੰਨੇ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਤਾਂ ਉਨ੍ਹਾਂ ਆਖਿਆ ਕਿ ਮਲਟੀਪਲ ਅਰੈਸਟਸ ਹੋਈਆਂ ਹਨ ਪਰ ਕਿੰਨੇ ਲੋਕ ਗ੍ਰਿਫਤਾਰ ਹੋਏ ਹਨ, ਇਸ ਦੀ ਜਾਣਕਾਰੀ ਸਾਂਝੀ ਨਹੀਂ ਕੀਤੀ।
ਅਸੀਂ ਫਾਈਲ ਦੀ ਜਾਣਕਾਰੀ ਸੰਬੰਧੀ ਵੀ ਸਵਾਲ ਕੀਤੇ ਕਿ ਮਾਮਲਾ ਐਕਸਟੌਰਸ਼ਨਸ ਨਾਲ ਸੰਬੰਧਤ ਹੈ ਜਾਂ ਨਹੀਂ, ਪਰ ਸਾਰਜੈਂਟ ਪੋਲੌਕ ਨੇ ਇਸ 'ਤੇ ਵੀ ਅਧਿਕਾਰਿਤ ਰਿਲੀਜ ਦੀ ਉਡੀਕ ਕਰਨ ਦੀ ਸਲਾਹ ਦਿੱਤੀ।
ਇਲਾਕੇ 'ਚ ਕੁਝ ਮਹੀਨਿਆਂ ਤੋਂ ਰੈਨੋਵੇਸ਼ਨਸ ਸੰਬੰਧੀ ਕੰਮ 'ਚ ਜੁਟੇ ਇੱਕ ਵਿਅਕਤੀ ਨੂੰ ਕਨੈਕਟ ਐਫ.ਐਮ. ਦੀ ਟੀਮ ਨੇ ਪੁੱਛਿਆ ਕਿ ਉਨ੍ਹਾਂ ਮੌਕੇ 'ਤੇ ਕੀ ਵੇਖਿਆ।
ਵਿਅਕਤੀ ਦਾ ਕਹਿਣਾ ਸੀ ਕਿ ਬੀਤੇ ਕਰੀਬ 4 ਮਹੀਨਿਆਂ ਤੋਂ ਇਲਾਕੇ 'ਚ ਆਉਂਦੇ-ਜਾਂਦੇ ਕਦੀ ਮਹਿਸੂਸ ਨਹੀਂ ਹੋਇਆ ਸੀ ਕਿ ਇਥੇ ਇਸ ਪ੍ਰਕਾਰ ਦੇ ਵੱਡੇ ਪੁਲਿਸ ਆਪ੍ਰੇਸ਼ਨ ਦੀ ਲੋੜ ਪਵੇਗੀ।
ਉਨ੍ਹਾਂ ਆਖਿਆ ਕਿ ਪੁਲਿਸ ਵੱਡੀ ਗਿਣਤੀ 'ਚ ਪਹੁੰਚੀ ਸੀ ਅਤੇ ਇੰਨੀ ਪੁਲਿਸ ਵੇਖ ਉਹ ਹੈਰਾਨ ਸਨ।
ਇਸ ਵਿਅਕਤੀ ਦਾ ਕਹਿਣਾ ਸੀ ਕਿ ਆਮ ਤੌਰ 'ਤੇ ਇਹ ਇਲਾਕਾ ਬੇਹੱਦ ਸ਼ਾਂਤੀਪੂਰਨ ਜਾਪਦਾ ਸੀ ਅਤੇ ਇਥੇ ਇਸ ਪ੍ਰਕਾਰ ਦੀ ਪੁਲਿਸ ਕਾਰਵਾਈ ਦੀ ਲੋੜ ਸੋਚਣ 'ਤੇ ਮਜਬੂਰ ਕਰਦੀ ਹੈ ਕਿ ਆਖਿਰ ਸਰੀ 'ਚ ਕਿਹੜਾ ਇਲਾਕਾ ਸੁਰੱਖਿਅਤ ਹੈ।
