ਹਮਾਸ ਵੱਲੋਂ ਬੰਧਕ ਬਣਾਏ ਕੈਨੇਡੀਅਨ ਔਰਤ ਦੇ ਪਤੀ ਦੀ ਹੋਈ ਮੌਤ

ਇਜ਼ਰਾਇਲ 'ਤੇ 7 ਅਕਤੂਬਰ ਨੂੰ ਹਮਲੇ ਦੌਰਾਨ ਹਮਾਸ ਵੱਲੋਂ ਬੰਧਕ ਬਣਾਏ ਗਏ ਲਗਭਗ 240 ਲੋਕਾਂ ਵਿੱਚੋਂ ਇੱਕ ਕੈਨੇਡੀਅਨ ਔਰਤ ਦੇ ਪਤੀ ਦੀ ਮੌਤ ਦੀ ਪੁਸ਼ਟੀ ਹੋਈ ਹੈ।

ਬੰਧਕਾਂ ਦੀ ਨਿਗਰਾਨੀ ਕਰਨ ਵਾਲੇ ਗਰੁੱਪ ਹੌਸਟੇਜ਼ ਐਂਡ ਮਿਸਿੰਗ ਫੈਮਿਲੀਜ਼ ਫੋਰਮ ਮੁਤਾਬਕ, 73 ਸਾਲਾ ਗਾਡੀ ਹੈਗਾਈ ਨਾਂ ਦੇ ਇਸ ਬਜ਼ੁਰਗ ਕੋਲਅਮਰੀਕਾ ਤੇ ਇਜ਼ਰਾਇਲ ਦੀ ਦੋਹਰੀ ਨਾਗਰਿਕਤਾ ਸੀ। ਉਨ੍ਹਾਂ ਦੀ 70 ਸਾਲਾ ਪਤਨੀ ਜੂਡਿਥ ਵਾਈਨਸਟੀਨ ਹੈਗਾਈ ਇੱਕ ਕੈਨੇਡੀਅਨ ਹੋਣ ਦੇ ਨਾਲ-ਨਾਲ ਅਮਰੀਕੀ ਵੀ ਹੈ।

ਹਾਲਾਂਕਿ ਉਹ ਕੈਨੇਡਾ ਵਿੱਚੋਂ ਕਿੱਥੋਂ ਦੀ ਰਹਿਣ ਵਾਲੀ ਸੀ ਇਹ ਜਾਣਕਾਰੀ ਨਹੀਂ ਮਿਲੀ। ਇਜ਼ਰਾਇਲੀ ਸਰਕਾਰ ਵੱਲੋਂ ਬਣਾਈ ਗਈ ਇੱਕ ਕਮੇਟੀ ਵੱਲੋਂ ਕੁੱਝ ਬੰਧਕਾਂ ਦੀ ਮੌਤ ਹੋਣ ਦੀ ਪੁਸ਼ਟੀ ਕੀਤੀ ਜਾ ਰਹੀ ਹੈ। ਹਾਲਾਂਕਿ, ਹਮਾਸ ਨੇ ਇਸ ਬਾਰੇ ਕੋਈ ਟਿੱਪਣੀ ਨਹੀਂ ਕੀਤੀ ਪਰ ਚੇਤਾਵਨੀ ਦਿੱਤੀ ਹੈ ਕਿ ਬੰਧਕਾਂ ਲਈ ਸਮਾਂ ਖ਼ਤਮ ਹੋ ਰਿਹਾ ਹੈ।

ਇਜ਼ਰਾਈਲ ਅਨੁਸਾਰ, 129 ਲੋਕ ਅਜੇ ਵੀ ਗਾਜ਼ਾ ਵਿੱਚ ਬੰਧਕ ਹਨ। ਜਿਨ੍ਹਾਂ ਵਿੱਚੋਂ 22 ਲੋਕਾਂ ਦੀ ਮੌਤ ਹੋ ਗਈ ਹੈ। ਗੌਰਤਲਬ ਹੈ ਕਿ ਹਮਾਸ ਅਤੇ ਇਜ਼ਰਾਇਲ ਨਵੰਬਰ ਵਿੱਚ ਯੁੱਧ ਵਿਰਾਮ ਤੋਂ ਬਾਅਦ ਦੁਬਾਰਾ ਇਸ 'ਤੇ ਸਹਿਮਤ ਹੋਣ ਲਈ ਤਿਆਰ ਨਹੀਂ ਹਨ, ਜਦੋਂ ਕਿ ਇਨ੍ਹਾਂ ਵਿਚਕਾਰ ਜੰਗ ਰੋਕਣ ਦੀਆਂ ਤਮਾਮ ਕੋਸ਼ਿਸ਼ਾਂ ਹੋ ਰਹੀਆਂ ਹਨ।