ਇਲਹਾਨ ਓਮਰ 'ਤੇ ਤਰਲ ਪਦਾਰਥ ਸੁੱਟਣ ਦੇ ਮਾਮਲੇ ਵਿੱਚ ਵਿਅਕਤੀ ਉੱਤੇ ਮਾਮਲਾ ਦਰਜ

ਅਮਰੀਕਾ ਦੇ ਨਿਆਂ ਵਿਭਾਗ ਨੇ ਮਿਨੀਆਪੋਲਿਸ ਵਿੱਚ ਇਕ ਸਮਾਗਮ ਦੌਰਾਨ ਡੈਮੋਕ੍ਰੈਟਿਕ ਸੰਸਦ ਮੈਂਬਰ ਇਲਹਾਨ ਉਮਰ ‘ਤੇ ਸੇਬ ਦੇ ਸਿਰਕੇ ਵਾਲਾ ਤਰਲ ਪਦਾਰਥ ਸੁੱਟਣ ਵਾਲੇ ਐਂਥਨੀ ਕੈਜ਼ਮੀਅਰਚੈਕ ‘ਤੇ ਫੈਡਰਲ ਮੁਕੱਦਮਾ ਦਰਜ ਕੀਤਾ ਹੈ।

ਐਂਥਨੀ ਨੂੰ ਮੰਗਲਵਾਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਅਦਾਲਤ ਵਿੱਚ ਦਾਇਰ ਦਸਤਾਵੇਜ਼ਾਂ ਮੁਤਾਬਕ ਐਂਥਨੀ ਕੈਜ਼ਮੀਅਰਚੈਕ ‘ਤੇ ਓਮਰ ‘ਤੇ ਹਮਲਾ ਕਰਨ, ਰੋਕਣ ਅਤੇ ਡਰਾਉਣ-ਧਮਕਾਉਣ ਦੇ ਦੋਸ਼ ਲਗਾਏ ਗਏ ਹਨ। ਜ਼ਿਕਰਯੋਗ ਹੈ ਕਿ ਜਾਂਚ ਦੌਰਾਨ ਪਤਾ ਲੱਗਾ ਕਿ ਐਂਥਨੀ ਵੱਲੋਂ ਉਮਰ ‘ਤੇ ਸੁੱਟਿਆ ਗਿਆ ਤਰਲ, ਪਾਣੀ ਅਤੇ ਐਪਲ ਸਾਈਡਰ ਸਿਰਕੇ ਦਾ ਮਿਸ਼ਰਣ ਸੀ।

ਜਾਣਕਾਰੀ ਅਨੁਸਾਰ ਐਂਥਨੀ ਦਾ ਅਪਰਾਧਿਕ ਪਿਛੋਕੜ ਹੈ ਅਤੇ ਉਸ ਨੇ ਆਨਲਾਈਨ ਪੋਸਟਾਂ ਵਿੱਚ ਰਿਪਬਲਿਕਨ ਨੇਤਾ ਡੋਨਲਡ ਟਰੰਪ ਲਈ ਸਮਰਥਨ ਵੀ ਜਤਾਇਆ ਸੀ।