17.46C Vancouver 17.46C VancouverMay 15, 2026 4:32 PM - Connect Newsroom - Ramandeep Kaur
ਸਰੀ ਸੈਂਟਰਲ ਦੇ ਇੱਕ ਘਰ ਵਿਚ ਨਵੰਬਰ 2025 ਵਿਚ ਹੋਈ ਸ਼ੂਟਿੰਗ ਦੇ ਸਬੰਧ ਵਿਚ ਪੁਲਿਸ ਨੇ ਇੱਕ 31 ਸਾਲਾ ਪੰਜਾਬੀ ਨੌਜਵਾਨ ਅਸ਼ਨੀਲ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਇਸ ਘਟਨਾ ਵਿਚ ਇੱਕ ਮਹਿਲਾ ਜ਼ਖ਼ਮੀ ਹੋਈ ਸੀ। ਸਰੀ ਪੁਲਿਸ ਸਰਵਿਸ ਮੁਤਾਬਕ, 23 ਨਵੰਬਰ 2025 ਦੀ ਰਾਤ ਕਰੀਬ 9:10 ਵਜੇ 121 ਸਟ੍ਰੀਟ ਅਤੇ 101B ਐਵੇਨਿਊ ਦੇ ਨੇੜੇ ਇੱਕ ਘਰ ਵਿਚ ਸ਼ੂਟਿੰਗ ਦੀ ਇਹ ਵਾਰਦਾਤ ਹੋਈ ਸੀ।
ਘਰ ਦੇ ਅੰਦਰ ਮੌਜੂਦ ਮਹਿਲਾ ਦੀ ਲੱਤ'ਤੇ ਗੋਲੀ ਲੱਗੀ ਸੀ। SPS ਦੀ ਮੇਜਰ ਕ੍ਰਾਈਮ ਯੂਨਿਟ ਨੇ ਇਸ ਮਾਮਲੇ ਦੀ ਜਾਂਚ ਸੰਭਾਲੀ ਅਤੇ ਇਨਵੈਸਟੀਗੇਸ਼ਨ ਦੌਰਾਨ ਪੁਲਿਸ ਨੇ ਇੱਕ ਸ਼ੱਕੀ ਗੱਡੀ ਤੇ ਮੁਲਜ਼ਮ ਦੀ ਪਛਾਣ ਕੀਤੀ, ਜਿਸ ਤੋਂ ਬਾਅਦ ਸਬੰਧਤ ਗੱਡੀ ਨੂੰ ਜ਼ਬਤ ਕਰ ਲਿਆ ਗਿਆ, ਜਿਸ ਵਿੱਚੋਂ ਇੱਕ ਹਥਿਆਰ ਬਰਾਮਦ ਹੋਇਆ। ਫੋਰੈਂਸਿਕ ਜਾਂਚ ਦੌਰਾਨ ਇਸ ਗੱਲ ਦੀ ਪੁਸ਼ਟੀ ਹੋਈ ਕਿ ਇਸੇ ਹਥਿਆਰ ਦੀ ਵਰਤੋਂ ਵਾਰਦਾਤ ਵਾਲੇ ਦਿਨ ਗੋਲੀ ਚਲਾਉਣ ਲਈ ਕੀਤੀ ਗਈ ਸੀ।
ਪੁਲਿਸ ਨੂੰ ਇਸ 13 ਮਈ ਨੂੰ ਵੈਨਕੂਵਰ ਵਿਚ ਓਨਟਾਰੀਓ ਸਟ੍ਰੀਟ ਅਤੇ ਵੈਸਟ 33 ਐਵੇਨਿਊ ਇਲਾਕੇ ਵਿਚ ਅਸ਼ਨੀਲ ਬਾਰੇ ਸੂਚਨਾ ਮਿਲੀ, ਜਿਥੋਂ ਉਸ ਨੂੰ ਲੋਅਰ ਮੇਨਲੈਂਡ ਡਿਸਟ੍ਰਿਕਟ ਐਮਰਜੈਂਸੀ ਰਿਸਪਾਂਸ ਟੀਮ ਦੀ ਮਦਦ ਨਾਲ ਹਿਰਾਸਤ ਵਿਚ ਲਿਆ ਗਿਆ, ਐਸ.ਪੀ.ਐਸ. ਮੁਤਾਬਕ,ਉਸ 'ਤੇ ਕ੍ਰਿਮੀਨਲ ਕੋਡ ਤਹਿਤ 6 ਚਾਰਜਿਜ਼ ਲਗਾਏ ਗਏ ਹਨ।
