11.66C Vancouver 11.66C VancouverJun 17, 2020 4:57 PM -
ਪੁਲੀਸ ਵੱਲੋਂ ਕੱਲ ਅਦਾਲਤ ਦੇ ਹੁਕਮ ਮੁਤਾਬਕ ਵੈਨਕੂਵਰ ਵਾਟਰਫ੍ਰੰਟ 'ਤੇ ਬੇਘਰ ਲੋਕਾਂ ਵੱਲੋਂ ਬਣਾਏ ਗਏ ਇੱਕ ਟੈਂਟ ਕੈਂਪ ਨੂੰ ਖਾਲੀ ਕਰਵਾਉਣ ਲਈ ਕਾਰਵਾਈ ਕੀਤੀ ਗਈ।
ਕਾਰਵਾਈ ਦਾ ਵਿਰੋਧ ਕਰਨ ਵਾਲੇ 46 ਲੋਕਾਂ ਨੂੰ ਗਿਰਫ਼ਤਾਰ ਕੀਤਾ ਗਿਆ।
ਪੁਲੀਸ ਮੁਤਾਬਕ ਇਹ ਗਿਰਫਤਾਰੀਆਂ ਕੱਲ ਦੇਰ ਦੁਪਹਿਰ ਉਸ ਵੇਲੇ ਕੀਤੀਆਂ ਗਈਆਂ ਜਦ ਪ੍ਰਦਰਸ਼ਨਕਾਰੀ ਜ਼ਮੀਨ 'ਤੇ ਬੈਠ ਗਏ ਅਤੇ ਕਰੈਬ ਪਾਰਕ ਨੇੜੇ ਵੈਨਕੂਵਰ ਫ੍ਰੇਜ਼ਰ ਪੋਰਟ ਅਥੋਰਿਟੀ ਵੱਲੋਂ ਪ੍ਰਬੰਧਿਤ ਇਸ ਫੈਡਰਲ ਜ਼ਮੀਨ ਨੂੰ ਖਾਲੀ ਕਰਨ ਤੋਂ ਇਨਕਾਰ ਕਰਨ ਲੱਗੇ।
ਪੁਲੀਸ ਮੁਤਾਬਕ 46 ਲੋਕਾਂ ਨੂੰ ਕੋਰਟ ਦੇ ਅਪਮਾਨ ਲਈ ਅਤੇ ਇੱਕ ਵਿਅਕਤੀ ਨੂੰ 'ਮਿਸਚੀਫ਼' ਲਈ ਗਿਰਫ਼ਤਾਰ ਕਰਨ ਪਿੱਛੋਂ ਕੋਈ ਦੋਸ਼ ਲਗਾਏ ਬਿਨਾਂ ਹੀ ਛੱਡ ਦਿੱਤਾ ਗਿਆ।
ਪਿਛਲੇ ਮਹੀਨੇ ਔਪੇਨਹਾਇਮਰ ਪਾਰਕ ਵਿਚਲੇ ਵਿਸ਼ਾਲ ਟੈਂਟ ਕੈਂਪ ਨੂੰ ਬੰਦ ਕੀਤੇ ਜਾਣ ਪਿੱਛੋਂ ਇਸ ਥਾਂ 'ਤੇ ਸੌ ਤੋਂ ਵੀ ਵੱਧ ਬੇਘਰ ਲੋਕ ਟੈਂਟਾਂ ਵਿੱਚ ਰਹਿਣ ਲੱਗੇ ਸਨ।
ਪੁਲੀਸ ਨੇ ਦੱਸਿਆ ਕਿ ਜਦ ਪਿਛਲੇ ਹਫ਼ਤੇ ਉਹਨਾਂ ਵੱਲੋਂ ਇਸੇ ਥਾਂ 'ਤੇ ਕੋਰਟ ਦਾ ਹੁਕਮ ਲਾਗੂ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਸੀ, ਤਾਂ 60 ਵਿਅਕਤੀ ਜਗ੍ਹਾ ਖਾਲੀ ਕਰਕੇ ਚਲੇ ਗਏ ਸਨ।
ਇਸ ਕੈਂਪ ਵਿੱਚ ਰਹਿਣ ਵਾਲੇ ਵਿਅਕਤੀਆਂ ਦੇ ਬੁਲਾਰੇ ਨੇ ਦੱਸਿਆ ਕਿ ਹੁਣ ਉਹ ਇਸ ਥਾਂ ਨੂੰ ਛੱਡਕੇ, ਤਕਰੀਬਨ ਦੋ ਕਿਲੋਮੀਟਰ ਦੂਰ, ਸਟ੍ਰੈਥਕੋਨਾ ਪਾਰਕ ਵਿੱਚ ਚਲੇ ਗਏ ਹਨ।
