ਸਰਵੇ 'ਚ ਖੁਲਾਸਾ ਪੀ. ਐੱਮ. ਮਾਰਕ ਕਾਰਨੀ ਕਰਕੇ ਲਿਬਰਲ ਪਾਰਟੀ ਦੇ ਸਮਰਥਨ 'ਚ ਵਾਧਾ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਲਿਬਰਲ ਪਾਰਟੀ ਵਿਚ ਨਵੀਂ ਜਾਨ ਫੂਕ ਦਿੱਤੀ ਹੈ, ਇਪਸੋਸ ਦੇ ਨਵੇਂ ਸਰਵੇ ਵਿਚ ਸਾਹਮਣੇ ਆਇਆ ਹੈ ਕਿ ਕਾਰਨੀ ਦੇ ਆਉਣ ਤੋਂ ਬਾਅਦ ਲਿਬਰਲ ਪਾਰਟੀ ਕੰਜ਼ਰਵੇਟਿਵ 'ਤੇ ਲਗਾਤਾਰ ਲੀਡ ਵਧਾ ਰਹੀ ਹੈ।

ਇਪਸੋਸ ਦਾ ਕਹਿਣਾ ਹੈ ਕਿ ਜੇ ਕੱਲ੍ਹ ਚੋਣਾਂ ਹੁੰਦੀਆਂ ਹਨ ਤਾਂ ਲਿਬਰਲ ਨੂੰ 42 ਫੀਸਦੀ ਵੋਟਰਾਂ ਦਾ ਸਮਰਥਨ ਮਿਲੇਗਾ, ਜਦੋਂ ਕਿ ਕੰਜ਼ਰਵੇਟਿਵ ਨੂੰ 36 ਫੀਸਦੀ ਸਮਰਥਨ ਪ੍ਰਾਪਤ ਹੋਵੇਗਾ। ਇਸ ਤੋਂ ਪਹਿਲਾਂ 2021 ਤੋਂ ਇਪਸੋਸ ਪੋਲਿੰਗ ਵਿਚ ਕੰਜ਼ਰਵੇਟਿਵ ਲਗਾਤਾਰ ਲਿਬਰਲ ਤੋਂ ਅੱਗੇ ਚੱਲ ਰਹੇ ਸਨ ਪਰ ਇਸ ਸਾਲ ਫਰਵਰੀ ਵਿਚ ਇਹ ਰੁਝਾਨ ਬਦਲ ਗਿਆ।

ਇਪਸੋਸ ਪਬਲਿਕ ਅਫੇਅਰਜ਼ ਦੇ ਸੀਈਓ ਡੈਰੇਲ ਬ੍ਰਿਕਰ ਨੇ ਕਿਹਾ ਕਿ ਹੁਣ ਅਜਿਹਾ ਲੱਗਦਾ ਹੈ ਕਿ ਲਿਬਰਲ ਦੀ ਪਕੜ ਮਜਬੂਤ ਹੋ ਰਹੀ ਹੈ ਅਤੇ ਉਹ ਬਹੁਮਤ ਵਾਲੀ ਸਰਕਾਰ ਬਣਾਉਣ ਦੇ ਨੇੜੇ ਪਹੁੰਚ ਗਏ ਹਨ। ਸਰਵੇ ਤੋਂ ਇਹ ਵੀ ਪਤਾ ਚੱਲਦਾ ਹੈ ਕਿ ਪਿਛਲੇ ਤਿੰਨ ਹਫ਼ਤਿਆਂ ਵਿਚ ਐੱਨਡੀ ਪੀ ਦੇ ਸਮਰਥਨ ਵਿਚ ਤਿੰਨ ਅੰਕ ਦੀ ਗਿਰਾਵਟ ਆਈ ਹੈ ਅਤੇ ਇਸ ਨੂੰ ਹੁਣ ਮਹਿਜ 10 ਫੀਸਦੀ ਵੋਟਰਾਂ ਦਾ ਹੀ ਸਮਰਥਨ ਪ੍ਰਾਪਤ ਹੈ। ਉਥੇ ਹੀ, ਬਲਾਕ ਕਿਊਬੈਕਵਾ ਦਾ ਸਮਰਥਨ 6 ਫੀਸਦੀ 'ਤੇ ਸਥਿਰ ਬਣਿਆ ਹੋਇਆ ਹੈ।