17.54C Vancouver 17.54C VancouverJun 3, 2020 1:34 AM -
ਮਈ ਮਹੀਨੇ ਦੌਰਾਨ ਮੈਟਰੋ ਵੈਨਕੂਵਰ ਵਿੱਚ ਘਰਾਂ ਦੀਆਂ ਕੀਮਤਾਂ ਸਥਿਰ ਰਹੀਆਂ ਪਰ ਗ੍ਰੇਟਰ ਵੈਨਕੂਵਰ ਰੀਅਲ ਐਸਟੇਟ ਬੋਰਡ ਦੇ ਅੰਕੜੇ ਦਰਸਾਉਂਦੇ ਹਨ ਕਿ ਮਾਰਕੀਟ ਉੱਪਰ ਕੋਵਿਡ-19 ਮਹਾਂਮਾਰੀ ਦੇ ਪ੍ਰਭਾਵ ਕਾਰਣ ਘਰਾਂ ਦੀਆਂ ਵਿਕਰੀਆਂ ਦੀ ਗਿਣਤੀ ਵਿੱਚ ਉਤਾਰ-ਚੜ੍ਹਾਅ ਆਉਂਦਾ ਰਿਹਾ।
ਬੋਰਡ ਵੱਲੋਂ ਜਾਰੀ ਕੀਤੇ ਬਿਆਨ ਮੁਤਾਬਕ ਰਿਹਾਇਸ਼ੀ ਪ੍ਰਾਪਰਟੀਆਂ ਦੇ ਸੰਯੁਕਤ ਮਾਪਦੰਡ ਅਨੁਸਾਰ ਵੈਨਕੂਵਰ ਵਿੱਚ ਘਰਾਂ ਦੀ ਕੀਮਤ ਔਸਤਨ $1 ਮਿਲੀਅਨ ਤੋਂ ਕੁਝ ਕੁ ਵੱਧ ਰਹੀ – ਮਤਲਬ ਕਿ ਅਪ੍ਰੈਲ ਮਹੀਨੇ ਦੇ ਮੁਕਾਬਲੇ ਕੋਈ ਬਹੁਤੀ ਤਬਦੀਲੀ ਨਹੀਂ ਆਈ ਅਤੇ ਮਈ 2019 ਦੇ ਮੁਕਾਬਲੇ ਇਹ ਲਗਭਗ 3% ਵੱਧ ਹੈ।
ਪਰ ਬੋਰਡ ਦਾ ਕਹਿਣਾ ਹੈ ਕਿ ਪਿਛਲੇ ਮਹੀਨੇ ਵਿਕਰੀਆਂ ਮਈ ਦੀ 10-ਸਾਲ ਦੀ ਔਸਤ ਤੋਂ 54 ਪ੍ਰਤੀਸ਼ਤ ਘੱਟ ਸਨ। ਪਿਛਲੇ ਸਾਲ ਮਈ ਮਹੀਨੇ ਦੇ ਮੁਕਾਬਲੇ ਇਨ੍ਹਾਂ ਵਿੱਚ 44 ਪ੍ਰਤੀਸ਼ਤ ਗਿਰਾਵਟ ਦਰਜ ਕੀਤੀ ਗਈ ਹੈ, ਪਰ ਇਸ ਸਾਲ ਦੇ ਅਪ੍ਰੈਲ ਮਹੀਨੇ ਨਾਲੋਂ ਵਿਕਰੀਆਂ ਵਿੱਚ 34 ਪ੍ਰਤੀਸ਼ਤ ਵਾਧਾ ਹੋਇਆ ਹੈ।
ਬੋਰਡ ਮੁਤਾਬਕ ਇਸ ਨਾਲ ਸਪਸ਼ਟ ਹੁੰਦਾ ਹੈ ਕਿ ਘਰ ਖ਼ਰੀਦਣ ਅਤੇ ਵੇਚਣ ਵਾਲੇ ਕੋਵਿਡ-19 ਨਾਲ ਸੰਬੰਧਤ ਹਿਦਾਇਤਾਂ ਤੋਂ ਹੁਣ ਜ਼ਿਆਦਾ ਘਬਰਾ ਨਹੀਂ ਰਹੇ। ਨਾਲ ਹੀ, ਬੋਰਡ ਦੇ ਦੱਸਿਆ ਹੈ ਕਿ ਪ੍ਰਾਪਰਟੀ ਦੀਆਂ ਸਾਰੀਆਂ ਕਿਸਮਾਂ ਵਾਸਤੇ ਸਰਗਰਮ ਲਿਸਟਿੰਗਜ਼ ਅਤੇ ਵਿਕਰੀਆਂ ਦਾ ਅਨੁਪਾਤ 12 ਪ੍ਰਤੀਸ਼ਤ ਤੋਂ ਉੱਪਰ ਹੈ – ਅਤੇ ਇਸੇ ਰੁਝਾਨ ਕਾਰਣ ਪ੍ਰਾਪਰਟੀ ਦੀਆਂ ਕੀਮਤਾਂ ਡਿੱਗਦੀਆਂ ਨਹੀਂ।
