10.83C Vancouver 10.83C VancouverMay 27, 2020 5:14 PM -
ਕਿਊਬੈੱਕ ਦੇ ਲੌਂਗ ਟਰਮ ਕੇਅਰ ਹੋਮਾਂ ਦੇ ਹਾਲਾਤ ਬਿਆਨ ਕਰਦੀ ਮਿਲਟਰੀ ਦੀ ਰਿਪੋਰਟ ਅਨੁਸਾਰ ਬਹੁਤ ਸਾਰੀਆਂ ਥਾਵਾਂ ਕੋਵਿਡ-19 ਦੇ ਫੈਲਾਅ ਨੂੰ ਕਾਬੂ ਕਰਨ ਲਈ ਸੰਘਰਸ਼ ਕਰ ਰਹੀਆਂ ਹਨ।
ਕਨੇਡੀਅਨ ਆਰਮਡ ਫੋਰਸਿਜ਼ ਦੇ ਮੈਂਬਰਾਂ ਮੁਤਾਬਕ ਜਦੋਂ ਉਹ ਇਨ੍ਹਾਂ ਲੌਂਗ ਟਰਮ ਕੇਅਰ ਹੋਮਾਂ ਵਿੱਚ ਪਹੁੰਚੇ ਤਾਂ ਉੱਥੇ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਦੀ ਗਿਣਤੀ ਵਿੱਚ ਵੱਡੀ ਘਾਟ ਦੇਖਣ ਨੂੰ ਮਿਲੀ ਜਿਸ ਦਾ ਬੁਰਾ ਪ੍ਰਭਾਵ ਮਰੀਜ਼ਾਂ ਦੀ ਸਾਫ ਸਫਾਈ ਉੱਤੇ ਪੈ ਰਿਹਾ ਸੀ।
ਹੋਰ ਮੁੱਦਿਆਂ ਵਿੱਚ ਪਰਸਨਲ ਪ੍ਰੋਟੈਕਟਿਵ ਇਕਵਿਪਮੈਂਟ, ਮੈਡੀਕਲ ਸਪਲਾਈਆਂ ਵਿੱਚ ਕਮੀ ਅਤੇ ਇਨ੍ਹਾਂ ਥਾਵਾਂ ਤੇ ਰਹਿ ਰਹੇ ਵਿਅਕਤੀਆਂ ਕੋਲ ਸਿਹਤ ਸੁਰੱਖਿਆ ਉਪਕਰਨਾਂ ਦੀ ਘਾਟ ਸੀ।
ਪਰ ਅੱਜ ਜਾਰੀ ਕੀਤੀ ਗਈ ਇਹ ਰਿਪੋਰਟ ਮੰਗਲਵਾਰ ਨੂੰ ਔਂਟੈਰੀਓ ਦੇ ਲੌਂਗ ਟਰਮ ਕੇਅਰ ਹੋਮਾਂ ਬਾਰੇ ਸਾਂਝੀ ਕੀਤੀ ਗਈ ਰਿਪੋਰਟ ਤੋਂ ਘੱਟ ਗੰਭੀਰ ਜਾਪਦੀ ਹੈ ਜਿੱਥੇ ਕਮਰਿਆਂ 'ਚ ਕੀੜੇ-ਮਕੌੜੇ ਹੋਣਾ, ਰੈਜ਼ੀਡੈਂਟਸ ਨੂੰ ਜ਼ਬਰਦਸਤੀ ਫੀਡ (feed) ਕਰਨਾ ਅਤੇ ਕਈ ਰੈਜ਼ੀਡੈਂਟਸ ਦੇ ਕਈ ਘੰਟੇ ਤੱਕ ਮਦਦ ਲਈ ਰੋਂਦੇ ਰਹਿਣ ਤੱਕ ਦੇ ਇਲਜ਼ਾਮ ਲਗਾਏ ਹਨ।
ਮਿਲਟਰੀ ਮੁਤਾਬਕ ਜ਼ਿਆਦਾਤਰ ਮਾਮਲਿਆਂ ਵਿੱਚ ਕਿਊਬੈੱਕ ਦੇ ਲੌਂਗ ਟਰਮ ਕੇਅਰ ਹੋਮਾਂ ਦੀ ਸਥਿਤੀ ਵਿੱਚ ਪਿਛਲੇ ਕਈ ਹਫਤਿਆਂ ਵਿੱਚ ਸੁਧਾਰ ਨਜ਼ਰ ਆ ਰਿਹਾ ਹੈ ਅਤੇ ਮੁਲਾਜ਼ਮ ਵੀ ਹੌਲੀ ਹੌਲੀ ਵਾਪਸ ਆਪਣੇ ਕੰਮਾਂ ਤੇ ਆ ਰਹੇ ਹਨ।
ਕਿਊਬੈੱਕ ਵਿੱਚ ਕੋਵਿਡ-19 ਕਾਰਨ 89 ਹੋਰ ਵਿਅਕਤੀ ਦਮ ਤੋੜ ਗਏ ਹਨ ਅਤੇ 541 ਨਵੇਂ ਮਾਮਲੇ ਸਾਹਮਣੇ ਆਏ ਹਨ।
ਸੂਬੇ ਵਿੱਚ ਵਾਇਰਸ ਦੇ ਕੁੱਲ 49,139 ਮਾਮਲਿਆਂ ਦੀ ਪੁਸ਼ਟੀ ਹੋ ਚੁੱਕੀ ਹੈ ਅਤੇ 4,228 ਜਾਨਾਂ ਜਾ ਚੁੱਕੀਆਂ ਹਨ।
