19.13C Vancouver 19.13C VancouverJun 1, 2020 4:13 PM -
ਬੀ.ਸੀ. ਦੇ ਲੇਬਰ ਮਨਿਸਟਰ ਹੈਰੀ ਬੈਂਸ ਮੁਤਾਬਕ ਕੋਵਿਡ-19 ਮਹਾਂਮਾਰੀ ਦੇ ਚੱਲਦਿਆਂ ਵਪਾਰਾਂ ਨੂੰ ਪੇਸ਼ ਆ ਰਹੀਆਂ ਮੁਸ਼ਕਿਲਾਂ ਨਾਲ ਉਹ ਵਾਕਫ਼ ਹਨ ਪਰ ਮੁਲਾਜ਼ਮ ਵੀ ਚੁਣੌਤੀਆਂ ਦਾ ਸਾਹਮਣਾ ਕਰ ਰਹੇ ਹਨ ਅਤੇ ਮਿਨੀਮਮ ਵੇਜ ਸੋਮਵਾਰ ਤੋਂ ਯੋਜਨਾ ਅਨੁਸਾਰ ਵਧਾਈ ਜਾ ਰਹੀ ਹੈ।
ਬੀ.ਸੀ. ਸਰਕਾਰ ਵੱਲੋਂ 2018 ਵਿੱਚ ਮਿਨੀਮਮ ਵੇਜ ਨੂੰ ਵਧਾਉਣ ਦੇ ਉਪਰਾਲਿਆਂ ਬਾਰੇ ਐਲਾਨ ਕੀਤਾ ਗਿਆ ਸੀ ਅਤੇ 1 ਜੂਨ ਤੋਂ ਇਸ ਨੂੰ 75 ਸੈਂਟ ਪ੍ਰਤੀ ਘੰਟਾ ਵਧਾਕੇ $14.60 ਕਰ ਦਿੱਤਾ ਗਿਆ ਹੈ।
ਬੈਂਸ ਮੁਤਾਬਕ ਲੇਬਰ ਮਨਿਸਟਰੀ ਡਾਟਾ ਅਨੁਸਾਰ ਬੀ.ਸੀ. ਵਿੱਚ ਮਿਨੀਮਮ ਵੇਜ ਕਮਾਉਣ ਵਾਲੇ ਲੋਕਾਂ ਵਿੱਚੋਂ 60 ਫੀਸਦੀ ਔਰਤਾਂ ਹਨ ਅਤੇ ਸੂਬੇ ਵਿੱਚ ਮਿਨੀਮਮ ਵੇਜ ਕਮਾਉਣ ਵਾਲੇ 93 ਫੀਸਦੀ ਲੋਕ ਸਰਵਿਸ ਦੇ ਖੇਤਰ ਵਿੱਚ ਸਾਫ਼ ਸਫ਼ਾਈ ਦੀਆਂ ਸੇਵਾਵਾਂ, ਗਰੋਸਰੀ ਸਟੋਰਾਂ ਅਤੇ ਰੈਸਟੋਰੈਂਟਾਂ ਵਿੱਚ ਕੰਮ ਕਰਦੇ ਹਨ।
ਉਨ੍ਹਾਂ ਕਿਹਾ ਕਿ ਵਪਾਰਾਂ ਨੂੰ ਸਰਕਾਰ ਵੱਲੋਂ ਉਪਲੱਬਧ ਕਰਵਾਏ ਜਾ ਰਹੇ $5 ਬਿਲੀਅਨ ਦੇ ਵਿੱਤੀ ਸਹਿਯੋਗ ਅਧੀਨ ਟੈਕਸ ਵਿੱਚ ਛੋਟ ਅਤੇ ਹੋਰ ਵਿਕਲਪ ਮੁਹੱਈਆ ਕਰਵਾਏ ਜਾ ਰਹੇ ਹਨ ਅਤੇ ਇਸ ਵਿੱਚ $1.5 ਬਿਲੀਅਨ ਦਾ ਇਕਨਾਮਿਕ ਰਿਕਵਰੀ ਫੰਡ ਵੀ ਸ਼ਾਮਲ ਹੈ।
ਸਟੈਟਿਸਟਿਕਸ ਕੈਨੇਡਾ ਦੇ ਅੰਕੜੇ ਮੁਤਾਬਕ ਬੀ.ਸੀ. ਦੀ ਬੇਰੁਜ਼ਗਾਰੀ ਦੀ ਦਰ ਵਿੱਚ ਅਪਰੈਲ ਵਿੱਚ 11.5 ਫੀਸਦੀ ਵਾਧਾ ਦੇਖਣ ਨੂੰ ਮਿਲਿਆ।
ਮਾਰਚ ਵਿੱਚ 400,000 ਮੁਲਾਜ਼ਮਾਂ ਦੀਆਂ ਨੌਕਰੀਆਂ ਲੇਅ-ਆਫ਼ ਹੋਣ ਜਾਂ ਵਪਾਰ ਬੰਦ ਹੋ ਜਾਣ ਕਾਰਨ ਗਈਆਂ।
ਜੂਨ 2021 ਤੱਕ ਬੀ.ਸੀ. ਦੀ ਮਿਨੀਮਮ ਵੇਜ ਨੂੰ $15.20 ਪ੍ਰਤੀ ਘੰਟਾ ਤੱਕ ਵਧਾਉਣ ਦੀ ਯੋਜਨਾ ਹੈ।
