ਮਿਸ਼ਨ ਆਰ.ਸੀ.ਐਮ.ਪੀ. ਵੱਲੋਂ ਕਥਿਤ ਤੌਰ 'ਤੇ ਨਸ਼ੀਲੇ ਪਦਾਰਥ ਵੇਚਣ ਵਾਲੀ ਵੈੱਬਸਾਈਟ ਦੀ ਜਾਂਚ, ਤਿੰਨ ਗ੍ਰਿਫ਼ਤਾਰ

ਮਿਸ਼ਨ ਆਰ.ਸੀ.ਐਮ.ਪੀ. ਨੇ ਨਾਬਾਲਗਾਂ ਨੂੰ ਔਨਲਾਈਨ ਇੱਕ ਵੈੱਬਸਾਈਟ ਰਾਹੀਂ ਨਸ਼ੀਲੇ ਪਦਾਰਥ ਵੇਚਣ ਅਤੇ ਹੋਮ ਡਿਲਿਵਰੀ ਕਰਨ ਵਾਲੇ ਇੱਕ ਗਿਰੋਹ ਦੇ ਤਿੰਨ ਮੈਂਬਰਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਕਾਰੋਬਾਰ ਐਬਟਸਫੋਰਡ ਤੋਂ ਚੱਲ ਰਿਹਾ ਸੀ ਅਤੇ ਜਾਂਚ ਮਿਸ਼ਨ ਵਿਚ ਸਾਲ 2026 ਦੀ ਸ਼ੁਰੂਆਤ ਵਿਚ ਇੱਕ 16 ਸਾਲਾ ਨਾਬਾਲਗ ਅਤੇ ਉਸ ਦੇ ਮਾਪਿਆਂ ਵਲੋਂ ਸ਼ਿਕਾਇਤ ਮਗਰੋਂ ਸ਼ੁਰੂ ਹੋਈ, ਬੱਚੇ ਨੇ ਵੈੱਬਸਾਈਟ ਤੋਂ ਮੈਜਿਕ ਮਸ਼ਰੂਮ ਅਤੇ ਭੰਗ ਦਾ ਔਰਡਰ ਦਿੱਤਾ, ਜਿਸ ਦੀ ਉਸੇ ਦਿਨ ਡਿਲਿਵਰੀ ਕੀਤੀ ਗਈ।

ਕੁਝ ਹਫ਼ਤਿਆਂ ਬਾਅਦ ਇੱਕ ਹੋਰ ਪਰਿਵਾਰ ਨੇ ਵੀ ਅਜਿਹੀ ਹੀ ਸ਼ਿਕਾਇਤ ਦਰਜ ਕਰਵਾਈ, ਜਿਸ ਤੋਂ ਬਾਅਦ ਪੁਲਿਸ ਦੇ 'ਕ੍ਰਾਈਮ ਰਿਡਕਸ਼ਨ ਯੂਨਿਟ' ਨੇ ਇਸ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਜਾਂਚ ਸੰਭਾਲੀ। 20 ਮਈ ਨੂੰ ਐਬਟਸਫੋਰਡ ਦੇ ਸਪੈਂਸਰ ਸਟ੍ਰੀਟ ਅਤੇ ਕਿੰਗ ਰੋਡ ਸਥਿਤ ਦੋ ਟਿਕਾਣਿਆਂ 'ਤੇ ਛਾਪੇਮਾਰੀ ਵਿਚ ਨਸ਼ੀਲੇ ਪਦਾਰਥ ਬਰਾਮਦ ਕੀਤੇ ਗਏ, ਜਿਹਨਾਂ ਵਿਚ ਹਜ਼ਾਰਾਂ ਦੀ ਗਿਣਤੀ ਵਿਚ edible marihuana ਅਤੇ vapes ਵੀ ਸ਼ਾਮਲ ਸਨ।

ਇਸ ਮਾਮਲੇ ਵਿਚ ਪੁਲਿਸ ਨੇ 49 ਅਤੇ 34 ਸਾਲ ਦੇ ਦੋ ਮਰਦਾਂ ਅਤੇ ਇੱਕ 42 ਸਾਲਾ ਔਰਤ ਨੂੰ ਗ੍ਰਿਫਤਾਰ ਕੀਤਾ, ਜਿਹਨਾਂ ਨੂੰ ਫਿਲਹਾਲ ਜਾਂਚ ਅਤੇ ਨਸ਼ਿਆਂ ਦੀ ਲੈਬ ਟੈਸਟਿੰਗ ਚੱਲ ਰਹੀ ਹੋਣ ਕਾਰਨ ਰਿਹਾਅ ਕੀਤਾ ਗਿਆ ਹੈ।