22.68C Vancouver 22.68C VancouverJan 26, 2026 5:45 PM - Connect Newsroom - Ramandeep Kaur
ਮਿਸ਼ਨ ਆਰ.ਸੀ.ਐਮ.ਪੀ. ਨੇ ਇੱਕ ਸ਼ੱਕੀ ਘਟਨਾ ਦੇ ਸਬੰਧ ਵਿਚ ਲੋਕਾਂ ਤੋਂ ਸਹਾਇਤਾ ਮੰਗੀ ਹੈ। ਇਸ ਮਾਮਲੇ ਵਿਚ ਸ਼ੱਕੀਆਂ ਦੀ ਪਛਾਣ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਔਫੀਸਰ ਮੁਤਾਬਕ, 20 ਜਨਵਰੀ ਨੂੰ ਦੁਪਹਿਰ ਵੇਲੇ ਸ਼ਹਿਰ ਦੇ ਫੇਲਪਸ ਐਵੇਨਿਊ 'ਤੇ ਇੱਕ ਘਰ ਦੇ ਬਾਹਰ ਇੱਕ ਗ੍ਰੇਅ ਰੰਗ ਦੀ ਟੋਇਟਾ ਆਰ.ਏ.ਵੀ. 4 ਕਾਰ ਆ ਕੇ ਰੁਕੀ, ਜਿਸ ਵਿਚ ਚਾਰ ਲੋਕ ਸਵਾਰ ਸਨ।
ਪਿਛਲੇ ਦਰਵਾਜ਼ੇ ਵਿਚੋਂ ਇੱਕ ਵਿਅਕਤੀ ਬਾਹਰ ਨਿਕਲਿਆ ਜਿਸ ਨੇ ਮੂੰਹ ਢੱਕਿਆ ਹੋਇਆ ਸੀ ਅਤੇ ਘਰ ਵੱਲ ਦੌੜਿਆ, ਫਿਰ ਦੋਵਾਂ ਹੱਥਾਂ ਨਾਲ ਜ਼ੋਰਦਾਰ ਦਰਵਾਜ਼ਾ ਖੜਕਾਇਆ ਅਤੇ ਤੇਜ਼ੀ ਨਾਲ ਵਾਪਸ ਕਾਰ ਵਿਚ ਬੈਠ ਗਿਆ, ਜਿਸ ਮਗਰੋਂ ਕਾਰ ਮੌਕੇ ਤੋਂ ਫ਼ਰਾਰ ਹੋ ਗਈ। ਜਾਂਚਕਰਤਾ ਹੁਣ ਇਹ ਪਤਾ ਲਗਾ ਰਹੇ ਹਨ ਕਿ ਇਹ ਕਿਸੇ ਖਾਸ ਘਰ ਨੂੰ ਡਰਾਉਣ-ਧਮਕਾਉਣ ਦੀ ਕੋਸ਼ਿਸ਼ ਸੀ ਜਾਂ ਇਹ ਇੱਕ ਗੈਰ-ਜ਼ਿੰਮੇਵਾਰਾਨਾ ਮਜ਼ਾਕ ਸੀ।
ਪੁਲਿਸ ਨੇ ਕਿਹਾ ਕਿ ਉਹ ਇਸ ਘਟਨਾ ਦੇ ਵੇਰਵੇ ਅਤੇ ਤਸਵੀਰਾਂ ਇਸ ਲਈ ਜਾਰੀ ਕਰ ਰਹੀ ਹੈ ਤਾਂ ਕਿ ਸ਼ੱਕੀਆਂ ਦੀ ਪਛਾਣ ਹੋ ਸਕੇ ਜਾਂ ਸ਼ੱਕੀ ਖੁਦ ਅੱਗੇ ਆ ਕੇ ਆਪਣੀ ਕਾਰਵਾਈ ਪਿੱਛੇ ਦਾ ਮਕਸਦ ਸਪੱਸ਼ਟ ਕਰਨਗੇ। ਜਾਂਚਕਰਤਾ ਨੇ ਅਪੀਲ ਕੀਤੀ ਕਿ ਜਿਸ ਕਿਸੇ ਕੋਲ ਵੀ ਇਸ ਘਟਨਾ ਬਾਰੇ ਜਾਣਕਾਰੀ ਹੈ ਉਹ ਮਿਸ਼ਨ ਆਰ.ਸੀ.ਐਮ.ਪੀ. ਨਾਲ ਸੰਪਰਕ ਕਰ ਸਕਦਾ ਹੈ।
