20.05C Vancouver 20.05C VancouverJun 20, 2025 6:49 PM - Connect Newsroom
ਓਨਟਾਰੀਓ ਦੇ ਹੈਮਿਲਟਨ ਵਿਚ ਲਾਪਤਾ ਹੋਣ ਦੇ 10 ਦਿਨਾਂ ਮਗਰੋਂ ਮ੍ਰਿਤਕ ਮਿਲੇ ਭਾਰਤੀ ਮੂਲ ਦੇ 22 ਸਾਲਾ ਸਟੂਡੈਂਟ ਸਾਹਿਲ ਕੁਮਾਰ ਬਾਰੇ ਹੋਰ ਜਾਣਕਾਰੀ ਸਾਹਮਣੇ ਆਈ ਹੈ। ਸਾਹਿਲ ਨੂੰ ਆਖਰੀ ਵਾਰ 16 ਮਈ ਨੂੰ ਦੇਖਿਆ ਗਿਆ ਸੀ ਅਤੇ ਪਤਾ ਲੱਗਾ ਹੈ ਕਿ ਉਸ ਦਿਨ ਉਸ ਨੇ ਟੋਰੌਂਟੋ ਲਈ ਜੀਓ ਟਰੇਨ ਲਈ ਸੀ, ਜਿਸ ਪਿੱਛੇ ਦੀ ਵਜ੍ਹਾ ਅਜੇ ਤੱਕ ਸਪੱਸ਼ਟ ਨਹੀਂ ਹੈ।
ਪੁਲਿਸ ਨੇ ਦੱਸਿਆ ਕਿ ਉਹ ਯੂਨੀਅਨ ਸਟੇਸ਼ਨ ਤੋਂ ਨਿਕਲ ਕੇ ਯੌਰਕ ਸਟ੍ਰੀਟ ਵੱਲ ਗਿਆ ਤੇ ਆਖਰੀ ਵਾਰ ਦੁਪਹਿਰ 1 ਵਜੇ ਦੇ ਕਰੀਬ ਯੋਂਗ ਅਤੇ ਡੁੰਡਾਸ ਸਟ੍ਰੀਟ ਨੇੜੇ ਦੇਖਿਆ ਗਿਆ ਸੀ। ਉਸ ਦਿਨ ਦੁਪਹਿਰ 1:30 ਵਜੇ ਦੇ ਕਰੀਬ ਉਸ ਦਾ ਸੈੱਲ ਫ਼ੋਨ ਬੰਦ ਹੋ ਗਿਆ ਸੀ।
ਉਸ ਦੇ ਚਚੇਰੇ ਭਰਾ ਅਮਿਤ ਸਿੰਘ ਮੁਤਾਬਕ, 26 ਮਈ ਨੂੰ ਸਾਹਿਲ ਦੀ ਲਾਸ਼ ਟੋਰਾਂਟੋ ਵਾਟਰਫ੍ਰੰਟ ਵਿਚ ਮਿਲੀ, ਜੋ ਹੁਣ ਭਾਰਤ ਭੇਜੀ ਜਾ ਚੁੱਕੀ ਹੈ। ਅਪ੍ਰੈਲ ਵਿਚ ਹੀ ਉਹ ਕੈਨੇਡਾ ਆਇਆ ਸੀ। ਪਰਿਵਾਰ ਨੇ ਸਵਾਲ ਚੁੱਕੇ ਹਨ ਕਿ ਸਾਹਿਲ ਪਾਣੀ ਵਿਚ ਕਿਵੇਂ ਪਹੁੰਚਿਆ। ਜਾਂਚ ਟੋਰੌਂਟੋ ਪੁਲਿਸ ਦੇ ਹੱਥਾਂ ਵਿਚ ਹੈ ਅਤੇ ਪੁਲਿਸ ਦਾ ਮੰਨਣਾ ਹੈ ਕਿ ਮਾਮਲਾ ਕ੍ਰਿਮੀਨਲ ਨਹੀਂ ਹੈ।
ਪੁਲਿਸ ਦਾ ਕਹਿਣਾ ਹੈ ਕਿ ਹੋ ਸਕਦਾ ਹੈ ਕਿ ਉਹ ਠੰਡੇ ਪਾਣੀ ਵਿਚ ਫਿਸਲ ਗਿਆ ਤੇ ਉਸ ਨੇ ਹਾਈਪੋਥਰਮੀਆ ਦਾ ਸਾਹਮਣਾ ਕੀਤਾ। ਫਿਲਹਾਲ ਪੁਲਿਸ ਵਲੋਂ ਜਾਂਚ ਜਾਰੀ ਹੈ।
