ਕੈਨੇਡੀਅਨ ਪਾਰਲੀਮੈਂਟ ਦੀ ਜਸਟਿਸ ਕਮੇਟੀ ਨੇ ਜਿਨਸੀ ਡੀਪਫੇਕਸ ਨੂੰ ਅਪਰਾਧਿਕ ਸ਼੍ਰੇਣੀ ਵਿਚ ਲਿਆਉਣ ਵਾਲੇ ਬਿੱਲ'ਚ ਕੀਤੀ ਸੋਧ

ਕੈਨੇਡੀਅਨ ਪਾਰਲੀਮੈਂਟ ਦੀ ਜਸਟਿਸ ਕਮੇਟੀ ਨੇ ਜਿਨਸੀ ਡੀਪਫੇਕਸ ਨੂੰ ਅਪਰਾਧਿਕ ਸ਼੍ਰੇਣੀ ਵਿਚ ਲਿਆਉਣ ਵਾਲੇ ਬਿੱਲ ਵਿਚ ਇੱਕ ਮਹੱਤਵਪੂਰਨ ਸੋਧ ਕੀਤੀ ਹੈ। ਹੁਣ ਇਸ ਕਾਨੂੰਨ ਦੇ ਦਾਇਰੇ ਵਿਚ ਨਾ ਸਿਰਫ਼ ਏ.ਆਈ.ਤਕਨੀਕ ਨਾਲ ਬਣਾਈਆਂ ਜਾਣ ਵਾਲੀਆਂ nude ਤਸਵੀਰਾਂ ਬਲਕਿ ਲਗਭਗ nude ਦਿਸਣ ਵਾਲੀਆਂ ਤਸਵੀਰਾਂ ਨੂੰ ਵੀ ਕ੍ਰਿਮੀਨਲ ਸ਼ੇਣੀ ਵਿਚ ਸ਼ਾਮਲ ਕੀਤੇ ਜਾਣ ਦੀ ਤਜਵੀਜ਼ ਕੀਤੀ ਗਈ ਹੈ,ਇਸ ਦਾ ਮਕਸਦ ਔਰਤਾਂ ਅਤੇ ਬੱਚਿਆਂ ਨੂੰ ਡਿਜੀਟਲ ਹਿੰਸਾ ਤੋਂ ਬਚਾਉਣਾ ਹੈ।

ਹਾਊਸ ਔਫ ਕਾਮਨਜ਼ ਦੀ ਕਮੇਟੀ ਨੇ ਬਿੱਲ C-16 ਵਿਚ ਇਹ ਬਦਲਾਅ ਮਾਹਰਾਂ ਦੀ ਉਸ ਚਿਤਾਵਨੀ ਤੋਂ ਬਾਅਦ ਕੀਤਾ ਹੈ,ਜਿਸ ਵਿਚ ਕਿਹਾ ਗਿਆ ਸੀ ਕਿ ਮੌਜੂਦਾ ਕਾਨੂੰਨ ਗ੍ਰੋਕ ਚੈਟਬੋਟ ਵਰਗੀਆਂ ਤਕਨੀਕਾਂ ਰਾਹੀਂ ਬਣਾਈਆਂ ਜਾਣ ਵਾਲੀਆਂ ਇਤਰਾਜ਼ਯੋਗ ਤਸਵੀਰਾਂ 'ਤੇ ਲਗਾਮ ਲਗਾਉਣ ਵਿਚ ਨਾਕਾਮ ਰਹਿ ਸਕਦਾ ਹੈ। ਪਹਿਲਾਂ ਇਹ ਬਿੱਲ ਸਿਰਫ਼ ਪੂਰੀ ਤਰ੍ਹਾਂ ਨਗਨ ਜਾਂ ਜਿਨਸੀ ਗਤੀਵਿਧੀ ਵਾਲੀਆਂ ਤਸਵੀਰਾਂ 'ਤੇ ਫੋਕਸ ਸੀ। ਹੁਣ ਕੰਜ਼ਰਵੇਟਿਵ ਐਮਪੀ ਐਂਡਰਿਊ ਲਾਟਨ ਦੇ ਪ੍ਰਸਤਾਵਿਤ ਸੋਧ ਤੋਂ ਬਾਅਦ ਇਸ ਵਿਚ ਉਹ ਤਸਵੀਰਾਂ ਵੀ ਸ਼ਾਮਲ ਹੋਣਗੀਆਂ ਜਿੱਥੇ ਏ.ਆਈ.ਰਾਹੀਂ ਕਿਸੇ ਨੂੰ ਲਗਭਗ ਨਗਨ ਦਿਖਾਇਆ ਗਿਆ ਹੋਵੇ।

ਇੱਕ ਹੋਰ ਮਹੱਤਵਪੂਰਨ ਸੋਧ ਰਾਹੀਂ ਸੋਸ਼ਲ ਮੀਡੀਆ ਕੰਪਨੀਆਂ ਲਈ ਅਜਿਹੀਆਂ ਇਤਰਾਜ਼ਯੋਗ ਤਸਵੀਰਾਂ ਨੂੰ ਹਟਾਉਣ ਲਈ 48 ਘੰਟਿਆਂ ਦੀ ਸਮਾਂ ਸੀਮਾ ਤੈਅ ਕੀਤੀ ਗਈ ਹੈ। ​ਇਹ ਬਿੱਲ ਹੁਣ ਸੈਨੇਟ ਵਿਚ ਜਾਵੇਗਾ,ਜਿੱਥੋਂ ਪਾਸ ਹੋਣ ਤੋਂ ਬਾਅਦ ਇਹ ਕਾਨੂੰਨ ਦਾ ਰੂਪ ਲਵੇਗਾ।