17.48C Vancouver 17.48C VancouverJan 15, 2026 7:10 PM - Connect Newsroom - Jasmine Singh
ਨਾਨਾਇਮੋ ਦੇ ਡਾਊਨਟਾਊਨ ਵਿਚ ਸਥਿਤ ਇੱਕ ਕੌਫੀ ਸ਼ਾਪ ਵਿਚ ਭੰਨ-ਤੋੜ ਕਰਨ, ਮੈਨੇਜਰ 'ਤੇ ਹਮਲਾ ਕਰਨ ਅਤੇ ਜਨਤਕ ਥਾਂ 'ਤੇ ਅਸ਼ਲੀਲ ਹਰਕਤਾਂ ਕਰਨ ਦੇ ਮਾਮਲੇ ਵਿਚ ਇੱਕ 40 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਔਫੀਸਰ ਮੁਤਾਬਕ, ਮੰਗਲਵਾਰ ਨੂੰ ਦੁਪਹਿਰ ਵੇਲੇ ਨਾਨਾਇਮੋ ਆਰ.ਸੀ.ਐਮ.ਪੀ. ਨੂੰ ਸੂਚਨਾ ਮਿਲੀ ਸੀ ਕਿ 90 ਫਰੰਟ ਸਟ੍ਰੀਟ 'ਤੇ ਸਥਿਤ ਇੱਕ ਕਾਰੋਬਾਰੀ ਅਦਾਰੇ ਵਿਚ ਇੱਕ ਵਿਅਕਤੀ ਜਾਇਦਾਦ ਨੂੰ ਨੁਕਸਾਨ ਪਹੁੰਚਾ ਰਿਹਾ ਹੈ। ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਸ਼ੱਕੀ ਵਿਅਕਤੀ ਅਤੇ ਕਾਰੋਬਾਰ ਦੇ ਮੈਨੇਜਰ ਵਿਚਕਾਰ ਬਹਿਸ ਹੋਈ ਸੀ, ਜਿਸ ਤੋਂ ਬਾਅਦ ਮੁਲਜ਼ਮ ਨੇ ਮੈਨੇਜਰ 'ਤੇ ਹਮਲਾ ਕਰ ਦਿੱਤਾ ਅਤੇ ਸਾਮਾਨ ਦੀ ਭੰਨ-ਤੋੜ ਕੀਤੀ।
ਬੁੱਧਵਾਰ ਨੂੰ ਬੀ ਸੀ ਪ੍ਰੋਸੈਕਿਊਸ਼ਨ ਸਰਵਿਸ ਨੇ ਨਾਨਾਇਮੋ ਦੇ ਰਹਿਣ ਵਾਲੇ 40 ਸਾਲਾ ਐਡਨ ਟਾਈ ਵਿਰੁੱਧ ਪੰਜ ਵੱਖ-ਵੱਖ ਧਾਰਾਵਾਂ ਤਹਿਤ ਦੋਸ਼ਾਂ ਨੂੰ ਮਨਜ਼ੂਰੀ ਦਿੱਤੀ, ਜਿਨ੍ਹਾਂ ਵਿਚ ਹਮਲਾ ਕਰਨਾ, ਹਥਿਆਰ ਨਾਲ ਹਮਲਾ ਕਰਨ, ਭੰਨ-ਤੋੜ, ਜਨਤਕ ਥਾਂ 'ਤੇ ਅਸ਼ਲੀਲ ਹਰਕਤ ਕਰਨ ਦੇ ਚਾਰਜਿਜ਼ ਸ਼ਾਮਲ ਹਨ। ਮੁਲਜ਼ਮ ਫਿਲਹਾਲ ਪੁਲਿਸ ਹਿਰਾਸਤ ਵਿਚ ਸੀ। ਉਸ ਨੂੰ ਅਗਲੀ ਪੇਸ਼ੀ ਲਈ 3 ਫਰਵਰੀ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ।
