ਨੈਨਾਈਮੋ ਵਿਚ ਵਿਅਕਤੀ ਨੂੰ ਗ੍ਰੋਸਰੀ ਸਟੋਰ ਤੋਂ ਚੋਰੀ ਕਰਕੇ ਭੱਜਣ ਅਤੇ ਹੰਗਾਮਾ ਕਰਨ ਦੇ ਮਾਮਲੇ ਵਿੱਚ ਕੀਤਾ ਗ੍ਰਿਫ਼ਤਾਰ

ਨੈਨਾਈਮੋ ਵਿਚ ਐਤਵਾਰ ਨੂੰ ਇੱਕ ਵਿਅਕਤੀ ਵੱਲੋਂ ਗ੍ਰੋਸਰੀ ਸਟੋਰ ਤੋਂ ਚੋਰੀ ਕਰਕੇ ਭੱਜਣ ਅਤੇ ਫਿਰ ਇੱਕ ਨਿੱਜੀ ਟੱਗਬੋਟ ਵਿਚ ਵੜ ਕੇ ਹੰਗਾਮਾ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਕਈ ਘੰਟਿਆਂ ਦੀ ਜੱਦੋ-ਜਹਿਦ ਤੋਂ ਬਾਅਦ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕੀਤਾ।

ਨੈਨਾਈਮੋ ਆਰ.ਸੀ.ਐਮ.ਪੀ. ਮੁਤਾਬਕ, ਘਟਨਾ ਦੁਪਹਿਰ ਲਗਭਗ 2:45 ਵਜੇ ਪੋਰਟ ਪਲੇਸ ਮਾਲ ਸਥਿਤ ਥ੍ਰਿਫਟੀ ਫੂਡ ਸਟੋਰ ਤੋਂ ਸ਼ੁਰੂ ਹੋਈ। ਸ਼ੱਕੀ ਨੇ ਸਟੋਰ ਤੋਂ ਬਿਨਾਂ ਪੈਸੇ ਦਿੱਤੇ ਸਾਮਾਨ ਲਿਜਾਣ ਦੀ ਕੋਸ਼ਿਸ਼ ਕੀਤੀ, ਜਦੋਂ ਸੁਰੱਖਿਆ ਕਰਮਚਾਰੀਆਂ ਨੇ ਉਸ ਨੂੰ ਰੋਕਿਆ ਤਾਂ ਉਸ ਨੇ ਧਮਕਾਉਣਾ ਸ਼ੁਰੂ ਕਰ ਦਿੱਤਾ। ਉਥੋਂ ਭੱਜਣ ਤੋਂ ਬਾਅਦ ਉਹੀ ਸ਼ੱਕੀ ਵਾਟਰਫਰੰਟ 'ਤੇ ਖੜ੍ਹੀ ਇੱਕ ਨਿੱਜੀ ਟੱਗਬੋਟ 'ਤੇ ਚੜ੍ਹਦੇ ਦੇਖਿਆ ਗਿਆ, ਜਿੱਥੇ ਉਸ ਨੇ ਅੰਦਰੋਂ ਖੁਦ ਨੂੰ ਬੰਦ ਕਰ ਲਿਆ।

ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਆਰ.ਸੀ.ਐਮ.ਪੀ. ਐਮਰਜੈਂਸੀ ਰਿਸਪਾਂਸ ਟੀਮ, ਪੁਲਿਸ ਡੌਗ ਸਰਵਿਸ ਅਤੇ ਮਰੀਨ ਸਰਵਿਸਿਜ਼ ਨੂੰ ਬੁਲਾਇਆ ਗਿਆ। ਸ਼ਾਮ ਲਗਭਗ 5:30 ਵਜੇ ਪੁਲਿਸ ਨੇ ਮੁਲਜ਼ਮ ਨੂੰ ਸੁਰੱਖਿਅਤ ਤਰੀਕੇ ਨਾਲ ਹਿਰਾਸਤ ਲਿਆ, ਜਿਸ ਮਗਰੋਂ ਉਸ 'ਤੇ ਬ੍ਰੇਕ ਐਂਡ ਐਂਟ ਅਤੇ ਸ਼ਰਾਰਤ ਦੇ ਦੋਸ਼ ਲਗਾਏ ਗਏ, ਜੋ ਅਜੇ ਵੀ ਪੁਲਿਸ ਹਿਰਾਸਤ ਵਿਚ ਸੀ।