ਕੈਨੇਡਾ ਨੇ ਨੈਟੋ ਵੱਲੋਂ ਮਿੱਥੇ ਗਏ ਜੀ. ਡੀ. ਪੀ. ਦੇ ਦੋ ਫੀਸਦੀ ਦੇ ਬਰਾਬਰ ਡਿਫੈਂਸ ਖ਼ਰਚ ਟਾਰਗੇਟ ਨੂੰ ਕੀਤਾ ਪੂਰਾ

ਕੈਨੇਡਾ ਨੇ ਫਾਈਨਲੀ ਅਧਿਕਾਰਤ ਤੌਰ 'ਤੇ ਨੈਟੋ ਵੱਲੋਂ ਮਿੱਥੇ ਗਏ ਜੀ. ਡੀ. ਪੀ. ਦੇ ਦੋ ਫੀਸਦੀ ਦੇ ਬਰਾਬਰ ਡਿਫੈਂਸ ਖ਼ਰਚ ਟਾਰਗੇਟ ਨੂੰ ਪੂਰਾ ਕਰ ਲਿਆ ਹੈ। ਇਸ ਟੀਚੇ ਨੂੰ 2014 ਵਿਚ ਰੂਸ ਵੱਲੋਂ ਕ੍ਰੀਮੀਆ 'ਤੇ ਕਬਜ਼ਾ ਕੀਤੇ ਜਾਣ ਤੋਂ ਬਾਅਦ ਸਾਰੇ ਨੈਟੋ ਦੇਸ਼ਾਂ ਲਈ ਜ਼ਰੂਰੀ ਕੀਤਾ ਗਿਆ ਸੀ ਅਤੇ ਮੈਂਬਰ ਦੇਸ਼ਾਂ ਨੇ 2024 ਤੱਕ ਇਸ ਟਾਰਗੇਟ ਨੂੰ ਹਾਸਲ ਕਰ ਲਏ ਜਾਣ ਦੀ ਵਚਨਬੱਧਤਾ ਜਤਾਈ ਸੀ ਪਰ ਇਸ ਸਮਾਂ-ਸੀਮਾ ਵਿਚ ਟੀਚੇ ਨੂੰ ਪੂਰਾ ਕਰਨ ਵਿਚ ਅਸਫਲ ਰਹਿਣ ਵਾਲੇ 11 ਦੇਸ਼ਾਂ ਵਿਚੋਂ ਕੈਨੇਡਾ ਇੱਕ ਸੀ।

ਨੈਟੋ ਦੀ ਤਾਜ਼ਾ ਸਾਲਾਨਾ ਰਿਪੋਰਟ ਦੇ ਅੰਕੜਿਆਂ ਮੁਤਾਬਕ, ਸਾਲ 2025 ਵਿਚ ਕੈਨੇਡਾ ਨੇ ਆਪਣੀ ਮਿਲਟਰੀ 'ਤੇ $60 ਬਿਲੀਅਨ ਤੋਂ ਵੱਧ ਰਾਸ਼ੀ ਖਰਚ ਕੀਤੀ, ਜੋ ਕਿ ਦੇਸ਼ ਦੀ ਕੁੱਲ ਜੀ. ਡੀ. ਪੀ. ਦਾ 2.01 ਫੀਸਦੀ ਹੈ। ਉਥੇ ਹੀ, 2035 ਤੱਕ ਨੈਟੋ ਦੇਸ਼ਾਂ ਵਲੋਂ ਡਿਫੈਂਸ ਖ਼ਰਚ ਨੂੰ ਜੀ. ਡੀ. ਪੀ. ਦੇ 5 ਫੀਸਦੀ ਤੱਕ ਲਿਜਾਣ ਦਾ ਟੀਚਾ ਹੈ, ਯਾਨੀ ਕੈਨੇਡਾ ਨੂੰ ਮਿਲਟਰੀ ਲਈ ਲਗਭਗ $150 ਬਿਲੀਅਨ ਸਾਲਾਨਾ ਖ਼ਰਚ ਕਰਨਾ ਹੋਵੇਗਾ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਪਿਛਲੇ ਸਾਲ ਅਹੁਦਾ ਸੰਭਾਲਦਿਆਂ ਹੀ ਡਿਫੈਂਸ ਨੂੰ ਆਪਣੀ ਆਰਥਿਕ ਨੀਤੀ ਦਾ ਮੁੱਖ ਹਿੱਸਾ ਬਣਾਇਆ ਹੈ, ਜਦੋਂ ਕਿ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਦੋ ਫੀਸਦੀ ਦੇ ਟੀਚੇ ਨੂੰ ਹੀ 2032 ਤੱਕ ਪੂਰਾ ਕੀਤੇ ਜਾਣ ਦੀ ਸੰਭਾਵਨਾ ਦੱਸੀ ਸੀ।