13.44C Vancouver 13.44C VancouverOct 5, 2023 5:42 PM - The Canadian Press
ਫੈਡਰਲ ਨਿਊ ਡੈਮੋਕਰੇਟਸ ਨੇ ਲਿਬਰਲਸ ਦੇ ਫਾਰਮਾਕੇਅਰ ਕਾਨੂੰਨ ਦੇ ਪਹਿਲੇ ਖਰੜੇ ਨੂੰ ਰੱਦ ਕਰ ਦਿੱਤਾ ਹੈ।
ਲਿਬਰਲਜ਼ ਨੇ ਇਸ ਫ਼ੌਲ ਸੀਜ਼ਨ ਦੌਰਾਨ ਫਾਰਮਾਕੇਅਰ ਕਾਨੂੰਨ ਪੇਸ਼ ਕਰਨ ਦਾ ਵਾਅਦਾ ਕੀਤਾ ਸੀ, ਪਰ ਐਨਡੀਪੀ ਕ੍ਰਿਟਿਕ ਡੌਨ ਡੇਵੀਸ ਨੇ ਕਿਹਾ ਕਿ ਬਿੱਲ ਦਾ ਪਹਿਲਾ ਡਰਾਫਟ ਐਨਡੀਪੀ ਦੀਆਂ ਉਮੀਦਾਂ ਉੱਤੇ ਖਰਾ ਨਹੀਂ ਉਤਰਿਆ।
ਉਨ੍ਹਾਂ ਕਿਹਾ ਕਿ ਉਹ ਅਗਲੇ ਡਰਾਫ਼ਟ ਦੀ ਉਡੀਕ ਕਰ ਰਹੇ ਹਨ।ਡੇਵੀਸ ਨੇ ਕਿਹਾ ਕਿ ਫ਼ਾਰਮਾਕੇਅਰ ਪ੍ਰੋਗਰਾਮ ਇੱਕ ਯੂਨੀਵਰਸਲ, ਇੱਕੋ-ਭੁਗਤਾਨ ਵਾਲਾ ਅਤੇ ਸਰਕਾਰੀ ਹੋਣਾ ਚਾਹੀਦਾ ਹੈ।
ਐਨਡੀਪੀ ਇਸ ਤੋਂ ਘੱਟ ਦੀ ਵਚਨਬੱਧਤਾ ਸਵੀਕਾਰ ਨਹੀਂ ਕਰੇਗੀ।
ਉਨ੍ਹਾਂ ਕਿਹਾ ਕਿ ਐਨਡੀਪੀ ਜ਼ਰੂਰੀ ਦਵਾਈਆਂ ਤੋਂ ਸ਼ੁਰੂ ਕਰਕੇ ਬਾਅਦ ਵਿੱਚ ਪ੍ਰੋਗਰਾਮ ਦਾ ਵਿਸਤਾਰ ਕਰਨ ਲਈ ਰਜ਼ਾਮੰਦ ਹੈ।
ਪਰ ਉਨ੍ਹਾਂ ਦੀ ਮੰਗ ਹੈ ਕਿ ਕਾਨੂੰਨ ਵਿਚ ਵਿਸਤਾਰ ਦੀ ਸਮਾਂ-ਸਾਰਣੀ ਵੀ ਸ਼ਾਮਲ ਕੀਤੀ ਜਾਵੇ।
ਹੈਲਥ ਮਿਨਿਸਟਰ ਮਾਰਕ ਹੌਲੈਂਡ ਨੇ ਇਹ ਨਹੀਂ ਦੱਸਿਆ ਕਿ ਆਉਣ ਵਾਲਾ ਬਿੱਲ ਕਿਸੇ ਵਿਸ਼ੇਸ਼ ਮਾਡਲ ਲਈ ਵਚਨਬੱਧ ਹੋਵੇਗਾ, ਕਿਉਂਕਿ ਬਿੱਲ ਦੇ ਪੇਸ਼ ਹੋਣ ਤੱਕ ਸਥਿਤੀ ਬਦਲ ਸਕਦੀ ਹੈ।
ਕਾਨੂੰਨ ਦਾ ਖਰੜਾ ਤਿਆਰ ਕਰਦੇ ਸਮੇਂ ਸਰਕਾਰ ਬਹੁਤ ਸਾਰੇ ਵਿਕਲਪਾਂ 'ਤੇ ਵਿਚਾਰ ਕਰ ਸਕਦੀ ਹੈ, ਜਿਸ ਵਿੱਚ ਐਨਡੀਪੀ ਵੱਲੋਂ ਸੁਝਾਇਆ ਸਿੰਗਲ-ਪੇਅਰ ਸਿਸਟਮ ਵੀ ਸ਼ਾਮਲ ਹੋ ਸਕਦਾ ਹੈ।
2017 ਵਿੱਚ ਪਾਰਲੀਮੈਂਟਰੀ ਬਜਟ ਅਫਸਰ ਨੇ ਅੰਦਾਜ਼ਾ ਲਗਾਇਆ ਸੀ ਕਿ ਜੇਕਰ ਇੱਕ ਫ਼ਾਰਮਾਕੇਅਰ ਯੋਜਨਾ 2015 ਵਿੱਚ ਲਾਗੂ ਕੀਤੀ ਜਾਂਦੀ ਤਾਂ ਪ੍ਰਤੀ ਸਾਲ $19.3 ਬਿਲੀਅਨ ਦੀ ਲਾਗਤ ਆਉਣੀ ਸੀ ਅਤੇ ਸਮੇਂ ਦੇ ਨਾਲ ਇਹ ਵੱਧ ਕੇ $22.6 ਬਿਲੀਅਨ ਸਾਲਾਨਾ ਹੋਣੀ ਦੱਸੀ ਗਈ ਸੀ।
ਅੱਜ ਦੇ ਹਿਸਾਬ ਨਾਲ ਇਹ ਸਾਲਾਨਾ ਖ਼ਰਚਾ 23 ਬਿਲੀਅਨ ਤੋਂ 27 ਬਿਲੀਅਨ ਡਾਲਰ ਹੋ ਸਕਦਾ ਹੈ।
ਹੌਲੈਂਡ ਨੇ ਇਹ ਨਹੀਂ ਦੱਸਿਆ ਕਿ ਕਾਨੂੰਨ ਕਦੋਂ ਪੇਸ਼ ਕੀਤੇ ਜਾਣ ਦੀ ਉਮੀਦ ਹੈ।
