ਐਨ.ਡੀ.ਪੀ. ਵਲੋਂ ਸਰਵੀਲੀਅੰਸ ਪ੍ਰਾਈਸਿੰਗ ਲਾਉਣ ਸੰਬੰਧੀ ਮਤਾ ਕੀਤਾ ਜਾਵੇਗਾ ਪੇਸ਼

ਕੈਨੇਡਾ ਦੀ ਫੈਡਰਲ ਐਨ.ਡੀ.ਪੀ. ਵਲੋਂ ਬੁੱਧਵਾਰ ਨੂੰ ਸੰਸਦ ਵਿਚ ਇੱਕ ਅਹਿਮ ਮਤਾ ਪੇਸ਼ ਕੀਤਾ ਜਾਵੇਗਾ, ਜਿਸ ਵਿਚ AI surveillance pricing 'ਤੇ ਪਾਬੰਦੀ ਲਗਾਉਣ ਦੀ ਮੰਗ ਕੀਤੀ ਗਈ ਹੈ। ਐਨ.ਡੀ.ਪੀ. ਦਾ ਕਹਿਣਾ ਹੈ ਕਿ ਕੰਪਨੀਆਂ ਗਾਹਕਾਂ ਦੇ ਨਿੱਜੀ ਡੇਟਾ ਦੀ ਵਰਤੋਂ ਕਰਕੇ ਕੀਮਤਾਂ ਵਧਾ ਰਹੀਆਂ ਹਨ, ਜੋ ਕਿ ਗ੍ਰਾਹਕਾਂ ਨਾਲ ਬੇਇਨਸਾਫੀ ਹੈ।

ਪਾਰਟੀ ਮੁਤਾਬਕ, ਕੰਪਨੀਆਂ ਗਾਹਕਾਂ ਦੀ ਸਰਚ ਹਿਸਟਰੀ, ਵੈੱਬਪੇਜ 'ਤੇ ਬਿਤਾਏ ਸਮੇਂ ਅਤੇ ਹੋਰ ਨਿੱਜੀ ਡੇਟਾ ਦੀ ਵਰਤੋਂ ਕਰਕੇ ਸਟੋਰਾਂ ਅਤੇ ਔਨਲਾਈਨ ਦੋਵਾਂ ਥਾਵਾਂ 'ਤੇ ਕੀਮਤਾਂ ਵਧਾ ਦਿੰਦੀਆਂ ਹਨ। ਫੈਡਰਲ ਐਨ.ਡੀ.ਪੀ. ਲੀਡਰ ਏਵੀ ਲੇਵਿਸ ਨੇ ਪਾਰਲੀਮੈਂਟ ਹਿੱਲ 'ਤੇ ਆਪਣੀ ਸ਼ੁਰੂਆਤ ਕਰਦੇ ਹੋਏ ਕਿਹਾ ਕਿ ਉਦਾਹਰਣ ਦੇ ਤੌਰ 'ਤੇ ਜੇ ਕੋਈ ਮਾਪਾ ਆਪਣੇ ਬਿਮਾਰ ਬੱਚੇ ਲਈ ਇੰਟਰਨੈੱਟ 'ਤੇ ਥਰਮਾਮੀਟਰ ਜਾਂ ਦਵਾਈ ਸਰਚ ਕਰਦਾ ਹੈ ਤਾਂ ਕੰਪਨੀਆਂ ਉਸ ਦੀ ਲੋੜ ਨੂੰ ਦੇਖਦੇ ਹੋਏ ਉਸ ਤੋਂ ਜ਼ਿਆਦਾ ਕੀਮਤ ਵਸੂਲ ਸਕਦੀਆਂ ਹਨ।

ਮੈਨੀਟੋਬਾ ਦੀ ਐਨ.ਡੀ.ਪੀ. ਸਰਕਾਰ ਨੇ ਪਿਛਲੇ ਮਹੀਨੇ ਸੂਬਾ ਪੱਧਰ 'ਤੇ ਅਜਿਹਾ ਕਾਨੂੰਨ ਪੇਸ਼ ਕੀਤਾ ਸੀ, ਲੇਵਿਸ ਦਾ ਕਹਿਣਾ ਹੈ ਕਿ ਇਸ ਨੂੰ ਫੈਡਰਲ ਪੱਧਰ 'ਤੇ ਲਾਗੂ ਕਰਨਾ ਜ਼ਰੂਰੀ ਹੈ ਕਿਉਂਕਿ ਔਟਵਾ ਕੋਲ ਅਜਿਹੀਆਂ ਸ਼ਕਤੀਆਂ ਹਨ ਜੋ ਸੂਬਿਆਂ ਕੋਲ ਨਹੀਂ ਹਨ। ਇੱਕ ਤਾਜ਼ਾ ਸਰਵੇ ਅਨੁਸਾਰ, ਲਗਭਗ 52 ਫੀਸਦੀ ਕੈਨੇਡੀਅਨ ਵੀ ਕੰਪਨੀਆਂ ਦੀ ਇਸ ਅਭਿਆਸ 'ਤੇ ਪਾਬੰਦੀ ਲਗਾਉਣ ਦੇ ਪੱਖ ਵਿਚ ਹਨ।