ਐਲਬਰਟਾ ਵੱਖਵਾਦ ਰੈਫਰੈਂਡਮ ਦੇ ਪ੍ਰਚਾਰ 'ਤੇ 365,000 ਡਾਲਰ ਦਾ ਖਰਚਾ : ਨਾਹੀਦ ਨੈਨਸ਼ੀ

ਐਲਬਰਟਾ ਦੀ ਮੁੱਖ ਵਿਰੋਧੀ ਧਿਰ ਅਨੁਸਾਰ ਸੂਬੇ ਵਿੱਚ ਹੋਣ ਵਾਲੇ ਵੱਖਵਾਦੀ ਸਬੰਧੀ ਰੈਫਰੈਂਡਮ ਦੇ ਪ੍ਰਚਾਰ ਅਤੇ ਲੋਕਾਂ ਤੱਕ ਜਾਣਕਾਰੀ ਪਹੁੰਚਾਉਣ ਲਈ ਟੈਕਸਦਾਤਿਆਂ ਦੇ ਘੱਟੋ-ਘੱਟ $365,000 ਡਾਲਰ ਖਰਚ ਕੀਤੇ ਜਾ ਰਹੇ ਹਨ।ਐਨਡੀਪੀ ਆਗੂ ਨਾਹੀਦ ਨੈਨਸ਼ੀ ਨੇ ਫ੍ਰੀਡਮ ਆਫ ਇਨਫਾਰਮੇਸ਼ਨ ਬੇਨਤੀ ਰਾਹੀਂ ਪ੍ਰਾਪਤ ਹੋਏ ਸਰਕਾਰੀ ਅੰਕੜਿਆਂ ਦਾ ਹਵਾਲਾ ਦਿੰਦਿਆਂ ਇਹ ਖੁਲਾਸਾ ਕੀਤਾ ਹੈ।

ਨੈਨਸ਼ੀ ਨੇ ਦੱਸਿਆ ਕਿ ਸਰਕਾਰੀ ਇਕਰਾਰਨਾਮਿਆਂ ਤੋਂ ਪਤਾ ਲੱਗਦਾ ਹੈ ਕਿ ਟੈਲੀਵਿਜ਼ਨ ਸੰਬੋਧਨ ਅਤੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਪ੍ਰਚਾਰ ਵੀਡੀਓਜ਼ ਲਈ ਲਗਭਗ $365,000 ਦੀ ਫੀਸ ਦਿੱਤੀ ਗਈ ਹੈ। ਉਹਨਾਂ ਕਿਹਾ ਕਿ ਜੇਕਰ ਐਲਬਰਟਨਜ਼ ਕੋਲੋਂ ਇਸ ਰੈਫਰੈਂਡਮ ਦਾ ਖਰਚਾ ਲਿਆ ਜਾ ਰਿਹਾ ਹੈ, ਤਾਂ ਸਰਕਾਰ ਨੂੰ ਇਸ ਨਾਲ ਸਬੰਧਤ ਸਾਰੇ ਖਰਚਿਆਂ ਦਾ ਪੂਰਾ ਹਿਸਾਬ-ਕਿਤਾਬ ਜਨਤਾ ਦੇ ਸਾਹਮਣੇ ਰੱਖਣਾ ਚਾਹੀਦਾ ਹੈ।

ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ 19 ਅਕਤੂਬਰ ਨੂੰ ਹੋਣ ਵਾਲੇ ਰੈਫਰੈਂਡਮ ਵਿੱਚ 10 ਸਵਾਲ ਸ਼ਾਮਲ ਕੀਤੇ ਹਨ, ਜਿਨ੍ਹਾਂ ਵਿੱਚ ਇਹ ਵੀ ਸ਼ਾਮਲ ਹੈ ਕਿ ਕੀ ਐਲਬਰਟਾ ਨੂੰ ਕੈਨੇਡਾ ਵਿੱਚ ਰਹਿਣਾ ਚਾਹੀਦਾ ਹੈ। 2023 ਦੀਆਂ ਆਮ ਚੋਣਾਂ ਦਾ ਕੁੱਲ ਖਰਚਾ $37 ਮਿਲੀਅਨ ਆਇਆ ਸੀ।ਇਸ ਚੋਣ ਨੂੰ ਨੇਪਰੇ ਚਾੜ੍ਹਨ ਲਈ ਲਗਭਗ 60,000 ਕਰਮਚਾਰੀਆਂ ਦੀ ਲੋੜ ਹੈ ਜੋ ਕਿ 2023 ਦੀਆਂ ਆਮ ਚੋਣਾਂ ਨਾਲੋਂ ਚਾਰ ਗੁਣਾ ਤੋਂ ਵੀ ਵੱਧ ਹੈ।