ਨਿਊ ਵੈਸਟਮਿੰਸਟਰ 'ਚ ਤਿੰਨ ਦਿਨਾਂ 'ਚ ਹੋਈਆਂ ਟੱਕਰਾਂ ਦੀ ਜਾਂਚ ਜਾਰੀ

ਨਿਊ ਵੈਸਟਮਿੰਸਟਰ ਵਿਚ 22 ਨਵੰਬਰ ਤੋਂ 24 ਨਵੰਬਰ ਵਿਚਕਾਰ ਪੈਦਲ ਚੱਲਣ ਵਾਲੇ ਲੋਕਾਂ ਨਾਲ ਸਬੰਧਤ ਤਿੰਨ ਵੱਖ-ਵੱਖ ਟੱਕਰਾਂ ਦੀਆਂ ਘਟਨਾਵਾਂ ਹੋਈਆਂ ਹਨ। ਪੁਲਿਸ ਮੁਤਾਬਕ,ਪਹਿਲੀ ਘਟਨਾ 22 ਨਵੰਬਰ ਨੂੰ 6th ਸਟ੍ਰੀਟ ਦੇ 500 ਬਲਾਕ ਵਿਚ ਵਾਪਰੀ, ਜਿੱਥੇ ਇੱਕ ਵਿਅਕਤੀ ਨੇ 9-1-1 'ਤੇ ਕਾਲ ਕਰਕੇ ਦੱਸਿਆ ਕਿ ਉਸ ਨੂੰ ਇੱਕ ਵਾਹਨ ਨੇ ਟੱਕਰ ਮਾਰ ਦਿੱਤੀ ਹੈ।

ਪੁਲਿਸ ਮੌਕੇ 'ਤੇ ਪਹੁੰਚੀ, ਪੀੜਤ ਦੇ ਹਲਕੀਆਂ ਸੱਟਾਂ ਪਾਈਆਂ ਗਈਆਂ ਅਤੇ ਡਰਾਈਵਰ ਮੌਕੇ 'ਤੇ ਹੀ ਸੀ, ਜਿਸ ਨੇ ਜਾਂਚਕਰਤਾਵਾਂ ਨਾਲ ਸਹਿਯੋਗ ਕੀਤਾ। ਇਸ ਘਟਨਾ ਦੇ ਲਗਭਗ ਇੱਕ ਘੰਟੇ ਬਾਅਦ ਡਾਊਨਟਾਊਨ ਕੋਰ ਵਿਚ 8th ਸਟ੍ਰੀਟ ਦੇ ਯੂਨਿਟ ਬਲਾਕ ਵਿਚ ਇੱਕ ਟੱਕਰ ਦੀ ਰਿਪੋਰਟ ਮਿਲੀ ਅਤੇ ਇਸ ਵਿਚ ਸ਼ਾਮਲ ਡਰਾਈਵਰ ਮੌਕੇ ਉਤੇ ਨਹੀਂ ਰੁਕਿਆ, ਅਧਿਕਾਰੀ ਨੇ ਹਾਲਾਂਕਿ ਜਲਦ ਹੀ ਡਰਾਈਵਰ ਨੂੰ ਨੇੜੇ ਹੀ ਕਾਰਨਾਰਵੋਨ ਸਟ੍ਰੀਟ 'ਤੇ ਲੱਭ ਲਿਆ।

ਤੀਜੀ ਘਟਨਾ 24 ਨਵੰਬਰ ਨੂੰ ਸੈਪਰਟਨ ਇਲਾਕੇ ਵਿਚ ਹੋਈ, ਜਿੱਥੇ ਨਿਸ਼ਾਨਬੱਧ ਕਰਾਸਵਾਕ ਤੋਂ ਸੜਕ ਪਾਰ ਕਰ ਰਹੇ ਵਿਅਕਤੀ ਨੂੰ ਗੱਡੀ ਨੇ ਟੱਕਰ ਮਾਰੀ। ਡਰਾਈਵਰ ਮੌਕੇ 'ਤੇ ਸੀ ਪਰ ਜਾਂਚਕਰਤਾ ਨੇ ਜਾਂਚ ਪੂਰੀ ਕਰਨ ਲਈ ਗੱਡੀ ਨੂੰ ਜ਼ਬਤ ਕਰ ਲਿਆ।

ਸਾਰਜੈਂਟ ਐਂਡਰਿਊ ਲੀਵਰ ਨੇ ਕਿਹਾ ਕਿ ਸਾਲ ਦੇ ਇਸ ਸਮੇਂ ਦੌਰਾਨ ਵਿਜ਼ੀਬਿਲਟੀ ਘੱਟ ਜਾਂਦੀ ਹੈ ਅਤੇ ਇਸ ਨਾਲ ਸੜਕ 'ਤੇ ਹਰ ਕਿਸੇ ਲਈ ਖਤਰਾ ਵੱਧ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਸੜਕ ਸੁਰੱਖਿਆ ਡਰਾਈਵਰਾਂ ਅਤੇ ਪੈਦਲ ਚੱਲਣ ਵਾਲਿਆਂ ਦੋਵਾਂ ਦੀ ਸਾਂਝੀ ਜ਼ਿੰਮੇਵਾਰੀ ਹੈ।