ਨੂਨਾਵੁਤ ਦੀ ਸੰਸਦ ਮੈਂਬਰ ਲੋਰੀ ਇਡਲੌਟ ਐਨ.ਡੀ.ਪੀ. ਛੱਡ ਕੇ ਲਿਬਰਲਜ਼ ਵਿੱਚ ਸ਼ਾਮਲ

ਕੈਨੇਡਾ ਦੀ ਸਿਆਸਤ ਵਿਚ ਇੱਕ ਵੱਡਾ ਉਲਟਫੇਰ ਹੋਇਆ ਹੈ। ਨੂਨਾਵੁਤ ਤੋਂ ਐਨ.ਡੀ.ਪੀ. ਦੀ ਮੈਂਬਰ ਪਾਰਲੀਮੈਂਟ ਲੋਰੀ ਇਡਲੌਟ ਨੇ ਲਿਬਰਲ ਪਾਰਟੀ ਜੁਆਇੰਨ ਕਰ ਲਈ ਹੈ। ਇਸ ਫਲੋਰ ਕਰੌਸਿੰਗ ਨੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਸਰਕਾਰ ਲਈ ਪੂਰਨ ਬਹੁਮਤ ਦਾ ਰਾਹ ਲਗਭਗ ਪੱਧਰਾ ਕਰ ਦਿੱਤਾ ਹੈ। ਇਸ ਨਾਲ ਹਾਊਸ ਔਫ਼ ਕੌਮਨਜ਼ ਵਿਚ ਲਿਬਰਲ ਦੀਆਂ ਸੀਟਾਂ ਦੀ ਗਿਣਤੀ 170 ਹੋ ਗਈ ਹੈ, ਜੋ ਬਹੁਮਤ ਦੇ ਅੰਕੜੇ ਤੋਂ ਮਹਿਜ਼ ਦੋ ਕਦਮ ਦੂਰ ਹੈ।

ਹੁਣ ਸਾਰੀਆਂ ਨਜ਼ਰਾਂ 13 ਅਪ੍ਰੈਲ ਨੂੰ ਸਕਾਰਬਰੋ-ਸਾਊਥਵੈਸਟ, ਯੂਨੀਵਰਸਿਟੀ-ਰੋਜ਼ਡੇਲ ਅਤੇ ਟੈਰੇਬੋਨ ਸੀਟਾਂ'ਤੇ ਹੋਣ ਵਾਲੀਆਂ ਤਿੰਨ ਉਪ-ਚੋਣਾਂ 'ਤੇ ਹਨ, ਜੇਕਰ ਲਿਬਰਲਸ ਇਨ੍ਹਾਂ ਵਿਚੋਂ ਦੋ ਸੀਟਾਂ ਵੀ ਜਿੱਤਦੇ ਹਨ, ਤਾਂ ਉਹ ਬਿਨਾਂ ਕਿਸੇ ਬਾਹਰੀ ਸਹਿਯੋਗ ਦੇ ਬਹੁਮਤ ਵਾਲੀ ਸਰਕਾਰ ਵਿਚ ਆ ਜਾਣਗੇ। ਐਨ.ਡੀ.ਪੀ. ਦੇ ਅੰਤਰਿਮ ਲੀਡਰ ਡੌਨ ਡੇਵਿਸ ਨੇ ਆਪਣੀ ਪਾਰਟੀ ਦੀ ਐਮ.ਪੀ. ਦੇ ਫੈਸਲੇ 'ਤੇ ਡੂੰਘੀ ਨਿਰਾਸ਼ਾ ਜ਼ਾਹਰ ਕੀਤੀ।

ਉਨ੍ਹਾਂ ਕਿਹਾ ਕਿ ਜਦੋਂ ਕੋਈ ਐਮ.ਪੀ. ਆਪਣੇ ਵੋਟਰਾਂ ਦੇ ਫਤਵੇ ਨੂੰ ਨਕਾਰਦਾ ਹੈ ਅਤੇ ਕਿਸੇ ਦੂਜੀ ਪਾਰਟੀ ਵਿਚ ਸ਼ਾਮਲ ਹੋਣਾ ਚਾਹੁੰਦਾ ਹੈ ਤਾਂ ਉਸ ਨੂੰ ਅਸਤੀਫ਼ਾ ਦੇ ਕੇ ਦੁਬਾਰਾ ਚੋਣ ਮੈਦਾਨ ਵਿਚ ਉਤਰਨਾ ਚਾਹੀਦਾ ਹੈ। ਗੌਰਤਲਬ ਹੈ ਕਿ Idlout ਵਿਰੋਧੀ ਧਿਰ ਦੀ ਚੌਥੀ ਅਜਿਹੀ ਐਮ.ਪੀ. ਹੈ, ਜਿਸ ਨੇ ਪਾਰਟੀ ਬਦਲੀ ਹੈ, ਉਹਨਾਂ ਤੋਂ ਪਹਿਲਾਂ ਤਿੰਨ ਕੰਜ਼ਰਵੇਟਿਵ ਐਮ.ਪੀ. ਨੇ ਲਿਬਰਲ ਨੂੰ ਜੁਆਇੰਨ ਕੀਤਾ ਸੀ।