26.17C Vancouver 26.17C VancouverNov 26, 2025 7:28 PM - Connect Newsroom - Ramandeep Kaur with files from The Canadian Press
ਬੀ. ਸੀ. ਵਿਚ ਲਿਟਨ ਨੇੜੇ ਹਾਈਵੇਅ 1 'ਤੇ ਸੋਮਵਾਰ ਨੂੰ ਦੋ ਟਰੈਕਟਰ-ਟ੍ਰੇਲਰਾਂ ਵਿਚਕਾਰ ਟੱਕਰ ਵਿਚ ਇੱਕ ਡਰਾਈਵਰ ਦੀ ਮੌਤ ਹੋ ਗਈ। ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਇਹ ਪਤਾ ਲਗਾਉਣ ਲਈ ਜਾਂਚ ਕਰ ਰਹੇ ਹਨ ਕਿ ਕੀ ਇਸ ਜਾਨਲੇਵਾ ਹਾਦਸੇ ਦਾ ਕਾਰਨ ਕ੍ਰਿਮੀਨਲ ਸੀ।
ਬੀ.ਸੀ. ਹਾਈਵੇ ਪੈਟਰੋਲ ਮੁਤਾਬਕ, ਹਾਦਸਾ ਸੋਮਵਾਰ ਸਵੇਰ 9 ਵਜੇ ਦੇ ਕਰੀਬ ਫਰੇਜ਼ਰ ਕੈਨਿਯਨ ਖੇਤਰ ਵਿਚ ਟੈਂਕ ਹਿੱਲ ਬ੍ਰਿਜ 'ਤੇ ਵਾਪਰਿਆ, ਜਿੱਥੇ ਨੌਰਥ ਵੱਲ ਜਾ ਰਹੇ ਕੇਨਵਰਥ ਟਰੈਕਟਰ-ਟ੍ਰੇਲਰ ਦੀ ਸਾਊਥ ਵੱਲ ਜਾ ਰਹੇ ਵੋਲਵੋ ਟਰੈਕਟਰ-ਟ੍ਰੇਲਰ ਨਾਲ ਟੱਕਰ ਹੋਈ।
ਪੁਲਿਸ ਨੇ ਦੱਸਿਆ ਕਿ 49 ਸਾਲਾ ਵੋਲਵੋ ਡਰਾਈਵਰ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਦੋਂ ਕਿ ਕੇਨਵਰਥ ਦੇ ਡਰਾਈਵਰ ਨੂੰ ਹਲਕੀਆਂ ਸੱਟਾਂ ਕਾਰਨ ਹਸਪਤਾਲ ਲਿਜਾਇਆ ਗਿਆ।
ਜਾਂਚਕਰਤਾ ਦਾ ਕਹਿਣਾ ਹੈ ਕਿ ਉਹ ਹਾਦਸੇ ਦੇ ਕੁਝ ਮੁੱਖ ਗਵਾਹਾਂ ਨਾਲ ਗੱਲ ਕਰ ਚੁੱਕੇ ਹਨ ਅਤੇ ਟੱਕਰ ਤੋਂ ਪਹਿਲਾਂ ਦੋਵਾਂ ਡਰਾਈਵਰਾਂ ਦੇ ਡਰਾਈਵਿੰਗ ਵਿਵਹਾਰ ਬਾਰੇ ਪਤਾ ਲਗਾਇਆ ਜਾ ਰਿਹਾ ਹੈ, ਜਿਸ ਦੇ ਸਬੰਧ ਵਿਚ ਡੈਸ਼ਕੈਮ ਫੁਟੇਜ ਤਲਾਸ਼ ਕੀਤੀ ਜਾ ਰਹੀ ਹੈ। ਜਾਂਚ ਚੱਲ ਰਹੀ ਹੈ ਅਤੇ ਪੁਲਿਸ ਨੇ ਮ੍ਰਿਤਕ ਦਾ ਨਾਮ ਅਤੇ ਉਸ ਸਬੰਧੀ ਹੋਰ ਕੋਈ ਜਾਣਕਾਰੀ ਜਨਤਕ ਨਹੀਂ ਕੀਤੀ ਹੈ।
