ਓਨਟਾਰੀਓ ਨੇ ਬੀ.ਸੀ. ਅਤੇ ਕਿਊਬੈਕ ਨੂੰ ਇਲੈਕਟ੍ਰਿਕ ਵਾਹਨਾਂ ਦੇ ਟਾਰਗੇਟ ਨੂੰ ਖਤਮ ਕਰਨ ਦੀ ਕੀਤੀ ਅਪੀਲ

ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਬੀ.ਸੀ. ਅਤੇ ਕਿਊਬੈਕ ਦੇ ਪ੍ਰੀਮੀਅਰਜ਼ ਨੂੰ ਚਿੱਠੀ ਲਿਖ ਕੇ ਇਲੈਕਟ੍ਰਿਕ-ਵਾਹਨਾਂ ਦੀ ਵਿਕਰੀ ਦੇ ਟੀਚੇ ਨੂੰ ਖ਼ਤਮ ਕਰਨ ਦੀ ਅਪੀਲ ਕੀਤੀ ਹੈ। ਫੋਰਡ ਅਨੁਸਾਰ, ਇਹ ਟਾਰਗੇਟਸ ਕੈਨੇਡਾ ਦੀ ਆਰਥਿਕਤਾ ਨੂੰ ਦੁਨੀਆ ਭਰ ਵਿਚ ਘੱਟ ਕੰਪੈਟਿਟਿਵ ਬਣਾ ਰਹੇ ਹਨ। ਉਨ੍ਹਾਂ ਆਪਣੀ ਚਿੱਠੀ ਵਿਚ ਲਿਖਿਆ ਕਿ ਓਨਟਾਰੀਓ ਦਾ ਆਟੋ ਸੈਕਟਰ ਦੇਸ਼ ਦਾ ਆਰਥਿਕ ਇੰਜਣ ਹੈ, ਜੋ ਲਗਭਗ 100,000 ਲੋਕਾਂ ਨੂੰ ਰੁਜ਼ਗਾਰ ਦਿੰਦਾ ਹੈ, ਜੋ ਇਸ ਸਮੇਂ ਟੈਰਿਫ ਦੀ ਮਾਰ ਹੇਠ ਹੈ।

ਉਨ੍ਹਾਂ ਕਿਹਾ ਕਿ ਜਦੋਂ ਅਮਰੀਕਾ ਆਪਣੀਆਂ ਈਵੀ ਪਾਲਿਸੀ ਨੂੰ ਵਾਪਸ ਲੈ ਰਿਹਾ ਹੈ ਤਾਂ ਕੈਨੇਡੀਅਨ ਸੂਬਿਆਂ ਵਿਚ ਅਜਿਹੇ ਸਖ਼ਤ ਨਿਯਮ ਨਿਵੇਸ਼ ਅਤੇ ਉਤਪਾਦਨ ਨੂੰ ਦੇਸ਼ ਤੋਂ ਬਾਹਰ ਕੱਢ ਸਕਦੇ ਹਨ। ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਫੋਰਡ ਨੇ ਕਿਹਾ ਕਿ ਉਹ ਵਾਤਾਵਰਣ ਦੇ ਪੱਖ ਵਿਚ ਹਨ ਪਰ ਰਾਸ਼ਟਰਪਤੀ ਡੋਨਲਡ ਟਰੰਪ ਦੇ ਟੈਰਿਫ ਦੇ ਪ੍ਰਭਾਵਾਂ ਨਾਲ ਨਜਿੱਠਣ ਲਈ ਇਸ ਸਮੇਂ ਅਜਿਹੇ ਨਿਯਮ 'ਟੀਮ ਕੈਨੇਡਾ' ਦੀ ਪਹੁੰਚ ਦੇ ਉਲਟ ਹਨ।

ਗੌਰਤਲਬ ਹੈ ਕਿ ਕਿਊਬੈਕ ਨੇ 2035 ਤੱਕ 90 ਫੀਸਦੀ ਨਵੀਆਂ ਗੱਡੀਆਂ ਹਾਈਬ੍ਰਿਡ ਜਾਂ ਇਲੈਕਟ੍ਰਿਕ ਹੋਣ ਦਾ ਟੀਚਾ ਰੱਖਿਆ ਹੈ, ਉਥੇ ਹੀ, ਬੀ.ਸੀ. ਨੇ ਹਾਲਾਂਕਿ, ਪੁਰਾਣਾ ਮੈਨਡੇਟ ਰੱਦ ਕੀਤਾ ਹੈ ਪਰ ਇਸ ਸਾਲ ਨਵੇਂ ਟਾਰਗੇਟ ਤੈਅ ਕਰਨ ਲਈ ਕਾਨੂੰਨ ਲਿਆਉਣ ਦਾ ਵਾਅਦਾ ਕੀਤਾ ਹੈ।