ਸਵੀਡਨ ਦੀ ਡਿਫੈਂਸ ਕੰਪਨੀ ਤੋਂ ਏਅਰ ਫੋਰਸ ਲਈ ਰਾਡਾਰ ਸਿਸਟਮ ਖਰੀਦਣ ਲਈ ਗੱਲਬਾਤ ਜਾਰੀ: ਕਾਰਨੀ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅੱਜ ਇੱਕ ਮਹੱਤਵਪੂਰਨ ਕਦਮ ਤਹਿਤ ਅਮਰੀਕੀ ਸਪਲਾਇਰ ਦੀ ਬਜਾਏ ਸਵੀਡਨ ਦੀ ਡਿਫੈਂਸ ਕੰਪਨੀ Saab ਤੋਂ ਰਾਇਲ ਕੈਨੇਡੀਅਨ ਏਅਰ ਫੋਰਸ ਲਈ ਅਰਲੀ ਵਾਰਨਿੰਗ ਰਾਡਾਰ ਸਿਸਟਮ ਖਰੀਦਣ ਲਈ ਰਸਮੀ ਗੱਲਬਾਤ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਕਦਮ ਪ੍ਰਧਾਨ ਮੰਤਰੀ ਦੀ ਉਸ ਵਚਨਬੱਧਤਾ ਦਾ ਹਿੱਸਾ ਹੈ, ਜਿਸ ਵਿਚ ਉਹਨਾਂ American ਫੌਜੀ ਸਾਜੋ-ਸਾਮਾਨਾਂ 'ਤੇ ਖਰਚ ਘਟਾਉਣ ਦੀ ਗੱਲ ਆਖੀ ਸੀ।

ਪੀ. ਐੱਮ. ਕਾਰਨੀ ਨੇ ਔਟਵਾ ਵਿਚ ਚੱਲ ਰਹੇ Cansec ਡਿਫੈਂਸ ਐਕਸਪੋ ਸ਼ੋਅ ਵਿਚ ਬੁੱਧਵਾਰ ਨੂੰ ਸ਼ਿਰਕਤ ਕਰਦੇ ਹੋਏ Swedish ਕੰਪਨੀ ਦੇ ਬਣਾਏ ਹੋਏ advanced surveillance ਸਿਸਟਮ GlobalEye ਦੀ ਚੋਣ ਕੀਤੇ ਜਾਣ ਦਾ ਖੁਲਾਸਾ ਕੀਤਾ। ਇਹ ਅਰਲੀ ਵਾਰਨਿੰਗ ਸਿਸਟਮ ਕੈਨੇਡਾ ਵਿਚ Bombardier ਵਲੋਂ ਬਣਾਏ Global 6500 jets ਵਿਚ ਲਗਾਏ ਜਾਣਗੇ।

ਗੌਰਤਲਬ ਹੈ ਕਿ ਇਸ ਕੰਟਰੈਕਟ ਦੀ ਦੌੜ ਵਿਚ ਅਮਰੀਕੀ ਕੰਪਨੀਆਂ Boeing ਅਤੇ L3Harris ਵੀ ਸ਼ਾਮਲ ਹਨ, ਜੋ ਇਸੇ ਤਰ੍ਹਾਂ ਦੇ ਰਾਡਾਰ ਸਿਸਟਮ ਬਣਾਉਂਦੀਆਂ ਹਨ ਪਰ ਕੈਨੇਡਾ ਨੇ Saab ਨਾਲ ਗੱਲਬਾਤ ਨੂੰ ਅੱਗੇ ਵਧਾਇਆ ਹੈ। ਕਾਰਨੀ ਨੇ ਕਿਹਾ ਕਿ ਉਹਨਾਂ ਦਾ ਟੀਚਾ 2030 ਤੱਕ ਡਿਫੈਂਸ ਖ਼ਰਚ ਨੂੰ ਜੀਡੀਪੀ ਦੇ 4 ਫੀਸਦੀ ਦੇ ਬਰਾਬਰ ਲੈ ਕੇ ਜਾਣ ਦਾ ਹੈ, ਇਹ ਕੈਨੇਡਾ ਦੀ ਸੁਰੱਖਿਆ ਨੀਤੀ ਵਿਚ ਇੱਕ ਇਤਿਹਾਸਕ ਬਦਲਾਅ ਦਾ ਸੰਕੇਤ ਹੈ।