ਕਾਰਨੀ ਅੱਜ ਅਮਰੀਕੀ ਟੈਰਿਫਾਂ ਕਾਰਨ ਪ੍ਰਭਾਵਿਤ ਸਟੀਲ ਉਦਯੋਗ ਲਈ ਨਵੇਂ ਸਮਰਥਨ ਦਾ ਕਰਨਗੇ ਐਲਾਨ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਅੱਜ ਕੈਨੇਡਾ ਦੀ ਸਟੀਲ ਇੰਡਸਟਰੀ ਅਤੇ ਸਾਫਟਵੁੱਡ ਲੱਕੜ ਸੈਕਟਰ ਦੀ ਮਦਦ ਲਈ ਨਵੇਂ ਉਪਾਵਾਂ ਦਾ ਐਲਾਨ ਕੀਤੇ ਜਾਣ ਦੀ ਉਮੀਦ ਹੈ,ਜਿਨ੍ਹਾਂ ਨੂੰ ਅਮਰੀਕਾ ਵੱਲੋਂ ਲਗਾਏ ਗਏ ਭਾਰੀ ਟੈਰਿਫ ਕਾਰਨ ਵੱਡਾ ਨੁਕਸਾਨ ਪਹੁੰਚਿਆ ਹੈ। ਸੂਤਰਾਂ ਅਨੁਸਾਰ,ਨਵੇਂ ਕਦਮ ਘਰੇਲੂ ਉਤਪਾਦਕਾਂ ਨੂੰ ਰਾਹਤ ਦੇਣ ਅਤੇ ਕੈਨੇਡੀਅਨ ਬਾਜ਼ਾਰ ਵਿਚ ਉਨ੍ਹਾਂ ਦੀ ਹਿੱਸੇਦਾਰੀ ਵਧਾਉਣ ਲਈ ਤਿਆਰ ਕੀਤੇ ਗਏ ਹਨ।

ਇਸ ਤਹਿਤ ਉਨ੍ਹਾਂ ਦੇਸ਼ਾਂ ਤੋਂ ਸਟੀਲ ਇੰਪੋਟ ਨੂੰ 2024 ਦੇ 50 ਫੀਸਦੀ ਪੱਧਰ ਤੋਂ ਘਟਾ ਕੇ 20 ਫੀਸਦੀ ਕਰ ਦਿੱਤਾ ਜਾਵੇਗਾ,ਜਿਨ੍ਹਾਂ ਨਾਲ ਕੈਨੇਡਾ ਦਾ ਫ੍ਰੀ ਟਰੇਡ ਐਗਰੀਮੈਂਟ ਨਹੀਂ ਹੈ। ਇਸ ਕਦਮ ਨਾਲ ਕੈਨੇਡੀਅਨ ਸਟੀਲ ਉਤਪਾਦਕਾਂ ਲਈ ਘਰੇਲੂ ਮੰਗ ਵਿਚ ਲਗਭਗ $854 ਮਿਲੀਅਨ ਦਾ ਵਾਧਾ ਹੋਣ ਦੀ ਸੰਭਾਵਨਾ ਹੈ। ਇਸ ਤੋਂ ਇਲਾਵਾ ਸਟੀਲ ਦੀ ਢੋਆ-ਢੁਆਈ ਲਈ ਰੇਲ ਫਰੇਟ ਦਰਾਂ ਵਿਚ 50 ਫੀਸਦੀ ਕਟੌਤੀ ਕਰਨ ਦੀ ਯੋਜਨਾ ਹੈ।

ਅਧਿਕਾਰੀਆਂ ਨੇ ਦੱਸਿਆ ਕਿ ਜੇ ਸੀ.ਐਨ.ਰੇਲ ਘੱਟ ਦਰਾਂ ਨਹੀਂ ਲਾਗੂ ਕਰ ਸਕਦੀ ਤਾਂ ਸਰਕਾਰ ਕਿਰਾਏ ਵਿਚ ਫਰਕ ਲਈ ਸਬਸਿਡੀ ਦੇਵੇਗੀ। ਇਹ ਐਲਾਨ ਉਸ ਸਮੇਂ ਹੋਣ ਜਾ ਰਿਹਾ ਹੈ ਜਦੋਂ ਵਿਰੋਧੀ ਧਿਰ ਵਲੋਂ ਸਟੀਲ ਵਰਕਰਜ਼ ਦੀ ਜੌਬ ਸਕਿਓਰਿਟੀ ਲਈ ਸਰਕਾਰ 'ਤੇ ਲਗਾਤਾਰ ਦਬਾਅ ਬਣਾਇਆ ਜਾ ਰਿਹਾ ਹੈ। ਸਾਫਟਵੁੱਡ ਲੱਕੜ ਸੈਕਟਰ ਲਈ ਫੈਡਰਲ ਸਰਕਾਰ ਕਰਜ਼ਾ ਗਾਰੰਟੀ $700 ਮਿਲੀਅਨ ਤੋਂ ਵਧਾ ਕੇ $1.2 ਬਿਲੀਅਨ ਕਰ ਸਕਦੀ ਹੈ।