ਬੀ. ਸੀ. ਵਿਚ ਪੈਸਿਫਿਕ ਤੂਫ਼ਾਨ ਦੀ ਦਸਤਕ ਨਾਲ ਤੇਜ਼ ਹਵਾਵਾਂ ਦੀ ਜਾਰੀ ਕੀਤੀ ਗਈ ਚਿਤਾਵਨੀ

ਬੀ. ਸੀ. ਵਿਚ ਪੈਸਿਫਿਕ ਤੂਫ਼ਾਨ ਦੀ ਦਸਤਕ ਨਾਲ ਹਲਕੀ ਤੋਂ ਭਾਰੀ ਬਰਫਬਾਰੀ ਅਤੇ ਤੇਜ਼ ਹਵਾਵਾਂ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ, ਇਨਵਾਇਰਮੈਂਟ ਕੈਨੇਡਾ ਮੁਤਾਬਕ, ਮੈਟਰੋ ਵੈਨਕੂਵਰ ਵਿਚ ਸਮੁੰਦਰੀ ਤਲ ਦੇ ਇਲਾਕਿਆਂ ਵਿਚ ਹਲਕੀ ਬਰਫ਼ਬਾਰੀ ਦੀ ਸੰਭਾਵਨਾ ਹੈ। ਉਥੇ ਹੀ, ਮੰਗਲਵਾਰ ਨੂੰ ਹੋਈ ਹਲਕੀ ਬਰਫ਼ਬਾਰੀ ਵੈਨਕੂਵਰ ਦੇ ਹਵਾਈ ਅੱਡੇ 'ਤੇ accumulate ਨਹੀਂ ਹੋ ਸਕੀ ਅਤੇ ਕਿਹਾ ਗਿਆ ਹੈ ਕਿ ਜੇਕਰ ਅਜਿਹਾ ਹੀ ਰਿਹਾ ਤਾਂ ਵੈਨਕੂਵਰ ਪਿਛਲੇ 43 ਸਾਲਾਂ ਵਿਚ ਪਹਿਲੀ ਵਾਰ ਸਨੋਅ ਫਰੀ ਸਰਦੀ ਦਾ ਰਿਕਾਰਡ ਬਣਾ ਸਕਦਾ ਹੈ।

ਓਧਰ, ਵੈਨਕੂਵਰ ਆਈਲੈਂਡ ਦੇ ਅੰਦਰੂਨੀ ਉੱਚਾਈ ਵਾਲੇ ਖੇਤਰਾਂ ਵਿਚ 10 ਸੈਂਟੀਮੀਟਰ ਤੱਕ ਬਰਫ਼ਬਾਰੀ ਦੀ ਸੰਭਾਵਨਾ ਦੱਸੀ ਗਈ ਹੈ, ਜਦੋਂ ਕਿ ਵਿਸਲਰ ਅਤੇ ਸੀ ਟੂ ਸਕਾਈ ਹਾਈਵੇਅ ਦੇ ਕੁਝ ਹਿੱਸਿਆਂ ਵਿਚ 20 ਸੈਂਟੀਮੀਟਰ ਤੱਕ ਅਤੇ ਸਿਕਾਮਸ ਤੋਂ ਗੋਲਡਨ ਵਿਚਕਾਰ ਹਾਈਵੇਅ 1 'ਤੇ 25 ਸੈਂਟੀਮੀਟਰ ਤੱਕ ਭਾਰੀ ਬਰਫ਼ਬਾਰੀ ਦੀ ਉਮੀਦ ਜਤਾਈ ਹੈ।

ਇਸ ਤੋਂ ਇਲਾਵਾ ਗ੍ਰੇਟਰ ਵਿਕਟੋਰੀਆ ਵਿਚ 90 ਕਿਲੋਮੀਟਰ ਪ੍ਰਤੀ ਘੰਟਾ ਅਤੇ ਹੋਪ ਵਿਚ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਹਵਾਵਾਂ ਚੱਲ ਸਕਦੀਆਂ ਹਨ। ਕੋਕੀਹਾਲਾ ਹਾਈਵੇ, ਓਕਾਨਾਗਨ ਕਨੈਕਟਰ ਅਤੇ ਹਾਈਵੇਅ 3 ਵਰਗੇ ਮੁੱਖ ਮਾਰਗ ਸਰਦੀਆਂ ਦੇ ਤੂਫਾਨ ਦੀਆਂ ਚੇਤਾਵਨੀਆਂ ਦੇ ਅਧੀਨ ਹਨ, ਜਿੱਥੇ ਵਿਜ਼ੀਬਿਲਟੀ ਘੱਟ ਹੋਣ ਕਾਰਨ ਸਫਰ ਕਰਨਾ ਚੁਣੌਤੀਪੂਰਨ ਹੋ ਸਕਦਾ ਹੈ।