17.47C Vancouver 17.47C VancouverFeb 19, 2025 7:14 PM - The Canadian Press
ਕੈਨੇਡਾ ਵਿਚ 2022 ਵਿਚ ਕੋਵਿਡ ਪਾਬੰਦੀਆਂ ਖਿਲਾਫ ਹੋਏ ਵਿਰੋਧ ਪ੍ਰਦਰਸ਼ਨਾਂ ਦੇ ਪ੍ਰਬੰਧਕ ਵਿਚੋਂ ਇੱਕ ਪੈਟ ਕਿੰਗ ਨੂੰ ਅੱਜ ਔਟਵਾ ਦੀ ਅਦਾਲਤ ਨੇ ਤਿੰਨ ਮਹੀਨਿਆਂ ਦੀ ਹਾਊਸ ਅਰੈਸਟ ਦੀ ਸਜ਼ਾ ਸੁਣਾਈ ਹੈ। ਇਸ ਸਜ਼ਾ ਵਿਚ ਫੂਡ ਬੈਂਕ ਅਤੇ ਪੁਰਸ਼ਾਂ ਦੇ ਸ਼ੈਲਟਰ ’ਤੇ 100 ਘੰਟੇ ਦੀ ਕਮਿਊਨਿਟੀ ਸੇਵਾ ਵੀ ਸ਼ਾਮਲ ਹੈ।
ਦੱਸ ਦੇਈਏ ਕਿ ਕੋਵਿਡ ਪਾਬੰਦੀਆਂ ਖਿਲਾਫ ਵਿਰੋਧ ਪ੍ਰਦਰਸ਼ਨਾਂ ਕਾਰਨ ਰਾਜਧਾਨੀ ਦੀਆਂ ਸੜਕਾਂ ਜਾਮ ਹੋ ਗਈਆਂ ਸਨ ਅਤੇ ਸਰਕਾਰ ਨੂੰ ਐਮਰਜੈਂਸੀ ਲਾ ਕੇ ਪ੍ਰਦਰਸ਼ਨ ਬੰਦ ਕਰਵਾਉਣੇ ਪਏ ਸਨ। ਅਦਾਲਤ ਨੇ ਨਵੰਬਰ ਵਿਚ ਪੈਟ ਕਿੰਗ ਨੂੰ 5 ਮਾਮਲਿਆਂ ਵਿਚ ਦੋਸ਼ੀ ਪਾਇਆ ਸੀ। ਕ੍ਰਾਊਨ ਵਲੋਂ ਉਸ ਨੂੰ ਵੱਧ ਤੋਂ ਵੱਧ 10 ਸਾਲ ਦੀ ਸਜ਼ਾ ਦੇਣ ਦੀ ਮੰਗ ਕੀਤੀ ਗਈ ਸੀ।
ਗੌਰਤਲਬ ਹੈ ਕਿ ’Freedom Convoy’ ਨਾਮ ਦੇ ਬੈਨਰ ਹੇਠ ਵਿਰੋਧ ਪ੍ਰਦਰਸ਼ਨਾਂ ਵਿਚ ਸੈਂਕੜੇ ਟਰੱਕ ਅਤੇ ਹਜ਼ਾਰਾਂ ਲੋਕਾਂ ਨੇ ਕਰੀਬ 3 ਹਫਤਿਆਂ ਤੱਕ ਡਾਊਨਟਾਊਨ ਔਟਵਾ ਨੂੰ ਬੰਦ ਕਰ ਦਿੱਤਾ ਸੀ।
ਇਹ ਵਿਰੋਧ ਪ੍ਰਦਰਸ਼ਨ ਓਨਟਾਰੀਓ ਦੇ ਵਿੰਡਸਰ ਵਿਚ ਅੰਬੈਸਡਰ ਬ੍ਰਿਜ ਅਤੇ ਐਲਬਰਟਾ ਦੇ ਕਾਉਟਸ ਵਿਚ ਕੈਨੇਡਾ-ਅਮਰੀਕਾ ਦੇ ਸਰਹੱਦੀ ਲਾਂਘਿਆਂ ਤੱਕ ਫੈਲ ਗਿਆ ਸੀ ਅਤੇ 14 ਫਰਵਰੀ, 2022 ਨੂੰ ਟਰੂਡੋ ਸਰਕਾਰ ਨੇ ਵਿਰੋਧ ਪ੍ਰਦਰਸ਼ਨ ਨੂੰ ਖਤਮ ਕਰਨ ਲਈ ਪਹਿਲੀ ਵਾਰ ਐਮਰਜੈਂਸੀ ਐਕਟ ਦੀ ਵਰਤੋਂ ਕੀਤੀ ਸੀ।
