ਪੀਅਰ ਪੌਲੀਐਵ ਨੇ ਕੈਨੇਡਾ 'ਤੇ ਟੈਰਿਫ ਜਾਰੀ ਰੱਖਣ ਲਈ ਟਰੰਪ ਦੀ ਕੀਤੀ ਆਲੋਚਨਾ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਕੈਨੇਡਾ 'ਤੇ ਟੈਰਿਫ ਜਾਰੀ ਰੱਖਣ ਲਈ ਟਰੰਪ ਦੀ ਆਲੋਚਨਾ ਕੀਤੀ ਹੈ, ਨਾਲ ਹੀ ਉਨ੍ਹਾਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ 'ਤੇ ਵੀ ਨਿਸ਼ਾਨਾ ਸਾਧਿਆ। ਪੌਲੀਐਵ ਨੇ ਕਿਹਾ ਕਿ ਕਾਰਨੀ ਕੈਨੇਡਾ ਨੂੰ ਟੈਰਿਫ ਤੋਂ ਰਾਹਤ ਦਿਵਾਉਣ ਵਿਚ ਫੇਲ੍ਹ ਰਹੇ, ਜਦੋਂ ਕਿ ਦਰਜਨਾਂ ਹੋਰ ਮੁਲਕਾਂ ਨੂੰ ਕੁਝ ਹੱਦ ਤੱਕ ਰਾਹਤ ਮਿਲੀ ਹੈ।

ਇਸ ਦੇ ਨਾਲ ਹੀ ਪੌਲੀਐਵ ਨੇ ਉਨ੍ਹਾਂ ਦੀ ਸਰਕਾਰ ਬਣਨ 'ਤੇ ਨਗਰ ਪਾਲਿਕਾਵਾਂ ਨੂੰ ਮਦਦ ਜ਼ਰੀਏ ਘਰਾਂ ਦੇ ਨਿਰਮਾਣ ਨਾਲ ਸਬੰਧਤ ਟੈਕਸ ਵਿਚ $100,000 ਤੱਕ ਦੀ ਕਟੌਤੀ ਕਰਨ ਦਾ ਵਾਅਦਾ ਕੀਤਾ। ਉਹ ਸਵੇਰ ਓਨਟਾਰੀਓ ਦੇ ਮਿਲਟਨ ਵਿਚ ਸਨ।

ਪੌਲੀਐਵ ਨੇ ਕਿਹਾ ਕਿ ਕਾਰਨੀ ਕੋਲ ਇੱਕ ਵੀ ਘਰ ਬਣਾਉਣ ਦਾ ਆਪਣਾ ਪਲੈਨ ਨਹੀਂ ਹੈ, ਉਹ ਸਿਰਫ ਆਪਣੀ ਕੰਪਨੀ ਨੂੰ ਫਾਇਦਾ ਪਹੁੰਚਾਉਣਾ ਚਾਹੁੰਦੇ ਹਨ। ਕੰਜ਼ਰਵੇਟਿਵ ਲੀਡਰ ਨੇ ਕਿਹਾ ਕਿ ਕਾਰਨੀ ਜਿਨ੍ਹਾਂ ਮਾਡਿਊਲਰ ਘਰਾਂ ਨੂੰ ਪ੍ਰਮੋਟ ਕਰ ਰਹੇ ਹਨ, ਉਸ ਵਿਚ ਉਨ੍ਹਾਂ ਦੀ ਆਪਣੀ ਹੀ ਬਰੁੱਕਫੀਲਡ ਦਾ ਨਿਵੇਸ਼ ਹੈ।