ਸਰੀ 'ਚ ਸ਼ੁੱਕਰਵਾਰ ਦੇਰ ਰਾਤ ਹੋਈ ਸ਼ੂਟਿੰਗ ਵਿੱਚ ਮਾਰੇ ਗਏ ਵਿਅਕਤੀ ਦੀ ਹੋਈ ਪਛਾਣ

ਸਰੀ ਦੇ ਗਿਲਡਫੋਰਡ ਖੇਤਰ ਵਿਚ ਸ਼ੁੱਕਰਵਾਰ ਦੇਰ ਰਾਤ ਹੋਈ ਸ਼ੂਟਿੰਗ ਵਿੱਚ ਮਾਰੇ ਗਏ ਵਿਅਕਤੀ ਦੀ ਪਛਾਣ ਜਾਰੀ ਕਰ ਦਿੱਤੀ ਗਈ ਹੈ। ਪੀੜਤ ਦੀ ਪਛਾਣ ਚਿਲੀਵੈਕ ਦੇ ਰਹਿਣ ਵਾਲੇ 26 ਸਾਲਾ ਜਸਕਰਨ ਬੜਿੰਗ ਵਜੋਂ ਹੋਈ ਹੈ। ਇਨਵੈਸਟੀਗੇਟਰਸ ਮੁਤਾਬਕ ਇਹ ਟਾਰਗੇਟਡ ਅਤੇ ਸੰਗਠਿਤ ਅਪਰਾਧ ਨਾਲ ਜੁੜੀ ਘਟਨਾ ਹੈ। ਇਸ ਮਾਮਲੇ ਦੀ ਜਾਂਚ ਇੰਟੀਗ੍ਰੇਟਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਨੂੰ ਸੌਂਪੀ ਗਈ ਹੈ। ਆਈਹੈਟ ਦੇ ਬਿਆਨ ਮੁਤਾਬਕ ਬੜਿੰਗ ਦਾ ਪੁਲਿਸ ਨਾਲ ਪਹਿਲਾਂ ਵੀ ਆਹਮਣਾ-ਸਾਹਮਣਾ ਹੋ ਚੁੱਕਾ ਹੈ ਅਤੇ ਮੰਨਿਆ ਜਾ ਰਿਹਾ ਹੈ ਕਿ ਉਹ ਡਰੱਗ-ਟਰੇਡ ਵਿਚ ਸ਼ਾਮਿਲ ਸੀ।

ਜ਼ਿਕਰਯੋਗ ਹੈ ਕਿ ਪੁਲਿਸ ਨੂੰ ਸ਼ੁੱਕਰਵਾਰ ਰਾਤ ਕਰੀਬ 11:40 ਵਜੇ 152 ਸਟ੍ਰੀਟ ਦੇ 104 ਐਵੇਨਿਊ ਕੋਲ ਘਟਨਾ ਸਥਾਨ 'ਤੇ ਬੁਲਾਇਆ ਗਿਆ ਸੀ। ਜਿੱਥੇ ਉਨ੍ਹਾਂ ਨੂੰ ਇਕ ਵਿਅਕਤੀ ਮ੍ਰਿਤਕ ਮਿਲਿਆ ਜਿਸ ਦੇ ਸਰੀਰ 'ਤੇ ਗੋਲ਼ੀਆਂ ਦੇ ਨਿਸ਼ਾਨ ਸਨ।

ਇੰਟੀਗ੍ਰੇਟਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਮੁਤਾਬਕ, 15 ਮਿੰਟ ਬਾਅਦ 136ਵੀਂ ਸਟ੍ਰੀਟ 'ਤੇ 115 ਐਵੇਨਿਊ ਕੋਲ ਇਕ ਸੜਦਾ ਹੋਇਆ ਪਿਕਅਪ ਟਰੱਕ ਵੀ ਮਿਲਿਆ। ਜੇਕਰ ਕਿਸੇ ਵੀ ਵਿਅਕਤੀ ਕੋਲ ਇਸ ਘਟਨਾ ਨਾਲ ਸਬੰਧਤ ਜਾਣਕਾਰੀ ਹੋਵੇ ਤਾਂ ਉਹ ਆਈਹੈਟ ਨਾਲ ਸੰਪਰਕ ਕਰ ਸਕਦਾ ਹੈ।

ਇਨਵੈਸਟੀਗੇਟਰਸ ਵੱਲੋਂ ਜਿਹੜੇ ਲੋਕਾਂ ਕੋਲ ਗੋਲ਼ੀਬਾਰੀ ਜਾਂ ਜਿੱਥੇ ਸੜਿਆ ਹੋਇਆ ਪਿਕਅਪ ਟਰੱਕ ਮਿਲਿਆ ਉੱਥੋਂ ਦੀ ਡੈਸ਼ਕੈਮ ਜਾਂ ਨਿਗਰਾਨੀ ਵੀਡੀਓ ਹੈ ਤਾਂ ਉਨ੍ਹਾਂ ਨੂੰ 1-877-551-4448 'ਤੇ ਸੰਪਰਕ ਕਰਨ ਦੀ ਅਪੀਲ ਕੀਤੀ ਗਈ ਹੈ।