ਨਿਊ ਵੈਸਟਮਿੰਸਟਰ ਵਿੱਚ ਵਾਪਰੀਆਂ ਦੋ ਵੱਖ-ਵੱਖ ਘਟਨਾਵਾਂ, ਪੁਲਿਸ ਕਰ ਰਹੀ ਜਾਂਚ

ਨਿਊ ਵੈਸਟਮਿੰਸਟਰ ਪੁਲਿਸ ਦੋ ਵੱਖ-ਵੱਖ ਘਟਨਾਵਾਂ ਦੀ ਜਾਂਚ ਕਰ ਰਹੀ ਹੈ,ਜਿਸ ਵਿਚ ਅੱਜ ਸਵੇਰੇ ਇੱਕ ਰਿਹਾਇਸ਼ ਵਿਚ ਚੋਰੀ ਦੀ ਹੋਈ ਕੋਸ਼ਿਸ਼ ਅਤੇ ਬੀਤੇ ਦਿਨੀਂ ਇੱਕ ਸਟ੍ਰੀਟ 'ਤੇ ਛੁਰੇ ਨਾਲ ਹੋਈ ਲੜਾਈ ਸ਼ਾਮਲ ਹੈ।

ਪੁਲਿਸ ਨੇ ਕਿਹਾ ਕਿ ਅੱਜ ਸਵੇਰੇ 11th ਸਟ੍ਰੀਟ ਦੇ 200 ਬਲਾਕ ਵਿਚ ਇੱਕ ਸ਼ੱਕੀ ਨੇ ਇੱਕ ਘਰ ਵਿਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕੀਤੀ, ਇਹ ਘਟਨਾ ਕਰੀਬ 4:30 ਵਜੇ ਦੇ ਕਰੀਬ ਵਾਪਰੀ, ਔਰਤ ਨੇ 911 'ਤੇ ਫ਼ੋਨ ਕਰਕੇ ਇਸ ਦੀ ਸੂਚਨਾ ਦਿੱਤੀ, ਨਿਊ ਵੈਸਟਮਿੰਸਟਰ ਪੁਲਿਸ ਅਨੁਸਾਰ,ਵਿਹੜੇ ਦਾ ਦਰਵਾਜ਼ਾ ਖੁੱਲ੍ਹਣ ਦੀ ਆਵਾਜ਼ ਨਾਲ ਔਰਤ ਦੀ ਅੱਖ ਖੁੱਲ੍ਹੀ ਅਤੇ ਜਦੋਂ ਉਹ ਵਿਹੜੇ ਦੇ ਦਰਵਾਜ਼ੇ ਦੇ ਨੇੜੇ ਪਹੁੰਚੀ ਤਾਂ ਜਿਵੇਂ ਹੀ ਉਸ ਨੇ ਸ਼ੱਕੀ ਨੂੰ ਘਰ ਵਿਚ ਪੈਰ ਰੱਖਦੇ ਦੇਖਿਆ,ਉਸੇ ਸਮੇਂ ਉਸ ਨੇ ਰੌਲਾ ਪਾ ਦਿੱਤਾ ਅਤੇ ਸ਼ੱਕੀ ਭੱਜ ਗਿਆ। ਹੁਣ ਤੱਕ ਸ਼ੱਕੀ ਦੀ ਪਛਾਣ ਨਹੀਂ ਹੋਈ।

ਉਥੇ ਹੀ, ਦੂਜੀ ਘਟਨਾ ਮੰਗਲਵਾਰ ਦੁਪਹਿਰ ਦੇ ਕਰੀਬ 8th ਸਟ੍ਰੀਟ ਦੇ 700 ਬਲਾਕ ਵਿਚ ਵਾਪਰੀ, ਜਿਥੇ ਦੋ ਵਿਅਕਤੀਆਂ ਵਿਚਕਾਰ ਹੱਥੋਪਾਈ ਹੋਈ ਅਤੇ ਇੱਕ ਵਿਅਕਤੀ ਨੇ ਛੁਰਾ ਕੱਢ ਲਿਆ। ਪੁਲਿਸ ਨੇ ਇਸ ਮਾਮਲੇ ਵਿਚ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕਰਕੇ ਕਲੀਵਰ ਬਰਾਮਦ ਕਰ ਲਿਆ, ਜਦੋਂ ਕਿ ਦੂਜਾ ਵਿਅਕਤੀ ਮੌਕੇ ਤੋਂ ਫਰਾਰ ਹੋ ਗਿਆ, ਜਿਸ ਦੀ ਭਾਲ ਵਿਚ ਮਦਦ ਲਈ ਇਨਵੈਸਟੀਗੇਟਰਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ।