22.18C Vancouver 22.18C VancouverSep 17, 2025 6:21 PM - Connect Newsroom
ਪ੍ਰਿੰਸ ਜਾਰਜ ਵਿਚ ਸਪ੍ਰੂਸ ਸਟ੍ਰੀਟ ਦੇ 1900-ਬਲਾਕ ਵਿਚ ਇੱਕ ਕਤਲ ਦੀ ਵਾਰਦਾਤ ਹੋਈ ਹੈ, ਜਿਸ ਦੀ ਪੁਲਿਸ ਜਾਂਚ ਕਰ ਰਹੀ ਹੈ। ਪ੍ਰਿੰਸ ਜਾਰਜ ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਮੰਗਲਵਾਰ ਤੜਕੇ 3.30 ਵਜੇ ਦੇ ਆਸਪਾਸ ਫਰੰਟਲਾਈਨ ਪੁਲਿਸ ਅਫਸਰ ਨੂੰ ਸਪ੍ਰੂਸ ਸਟ੍ਰੀਟ ਦੀ ਇੱਕ ਰਿਹਾਇਸ਼ ਵਿਚ ਬੁਲਾਇਆ ਗਿਆ, ਜਿਥੇ ਜਾਂਚਕਰਤਾਵਾਂ ਨੇ ਇੱਕ ਵਿਅਕਤੀ ਨੂੰ ਮ੍ਰਿਤਕ ਪਾਇਆ ਅਤੇ ਦੂਜਾ ਗੋਲੀ ਲੱਗਣ ਨਾਲ ਜ਼ਖਮੀ ਸੀ।
ਮੌਕੇ 'ਤੇ ਪੁਲਿਸ ਨੇ ਰਿਹਾਇਸ਼ ਵਿਚ ਮੌਜੂਦ ਕਈ ਲੋਕਾਂ ਨੂੰ ਹਿਰਾਸਤ ਵਿਚ ਲਿਆ ਅਤੇ ਬਾਅਦ ਵਿਚ ਬਿਨਾਂ ਕਿਸੇ ਦੋਸ਼ ਦੇ ਉਨ੍ਹਾਂ ਨੂੰ ਛੱਡ ਦਿੱਤਾ। ਪ੍ਰਿੰਸ ਜਾਰਜ ਆਰ.ਸੀ.ਐਮ.ਪੀ. ਦੇ ਮੀਡੀਆ ਰਿਲੇਸ਼ਨਜ਼ ਅਫ਼ਸਰ ਕਾਰਪੋਰਲ ਜੈਨੀਫ਼ਰ ਕੂਪਰ ਨੇ ਕਿਹਾ ਕਿ ਮਾਮਲਾ ਟਾਰਗੇਟਿਡ ਸੀ ਅਤੇ ਇਸ ਸਬੰਧ ਵਿਚ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਪਰ ਅਜੇ ਤੱਕ ਦੋਸ਼ਾਂ ਨੂੰ ਮਨਜ਼ੂਰੀ ਨਹੀਂ ਦਿੱਤੀ ਗਈ ਹੈ, ਇਸ ਲਈ ਪੁਲਿਸ ਇਸ ਸਮੇਂ ਸ਼ੱਕੀ ਬਾਰੇ ਕੋਈ ਹੋਰ ਜਾਣਕਾਰੀ ਜਾਰੀ ਨਹੀਂ ਕਰ ਰਹੀ।
ਜਾਂਚਕਰਤਾਵਾਂ ਵਲੋਂ ਇਸ ਮਾਮਲੇ ਦੀ ਜਾਣਕਾਰੀ ਰੱਖਣ ਵਾਲੇ ਕਿਸੇ ਵੀ ਵਿਅਕਤੀ ਨੂੰ ਪ੍ਰਿੰਸ ਜਾਰਜ ਆਰ.ਸੀ.ਐਮ.ਪੀ. ਦੇ ਗੈਰ-ਐਮਰਜੈਂਸੀ ਲਾਈਨ 'ਤੇ ਸੰਪਰਕ ਕਰਨ ਦੀ ਬੇਨਤੀ ਕੀਤੀ ਹੈ।
