14.2C Vancouver 14.2C VancouverOct 6, 2025 6:13 PM - Connect Newsroom - Pervez Sandhu
ਸਰੀ ਵਿੱਚ ਅੱਜ ਤੜਕੇ ਕਰੀਬ 2:20 ਵਜੇ ਸਾਊਥ ਸਰੀ ਸਥਿਤ ਉਸਤਾਦ ਜੀ76 ਰੈਸਟੂਰੈਂਟ 'ਤੇ ਗੋਲੀਆਂ ਚਲਾ ਦਿੱਤੀਆਂ ਗਈਆਂ।
ਸਰੀ ਪੁਲਿਸ ਸਰਵਿਸ ਤੋਂ ਸਟਾਫ਼ ਸਾਰਜੈਂਟ ਲਿੰਡਸੀ ਹੁਟਨ ਨੇ ਪੁਸ਼ਟੀ ਕੀਤੀ ਕਿ ਘਟਨਾ 'ਚ ਵਪਾਰ ਨੂੰ ਨੁਕਸਾਨ ਪਹੁੰਚਿਆ ਹੈ।
ਉਨ੍ਹਾਂ ਦੱਸਿਆ ਕਿ ਵਾਰਦਾਤ ਮੌਕੇ ਵਪਾਰਿਕ ਜਗ੍ਹਾ 'ਤੇ ਕੋਈ ਵਿਅਕਤੀ ਮੌਜੂਦ ਨਹੀਂ ਸੀ ਅਤੇ ਕਿਸੇ ਦੇ ਜਖਮੀ ਹੋਣ ਤੋਂ ਬਚਾਅ ਰਿਹਾ।
ਪੁਲਿਸ ਕੋਲ ਤੜਕੇ ਕਰੀਬ ਸਵਾ ਦੋ ਵਜੇ ਕਿੰਗ ਜੌਰਜ ਬੁਲੇਵਾਰਡ 'ਤੇ 2100 ਬਲੌਕ 'ਚ ਸਥਿਤ ਇੱਕ ਵਪਾਰ 'ਤੇ ਗੋਲੀਆਂ ਚਲਾਏ ਜਾਣ ਦੀ ਜਾਣਕਾਰੀ ਮਿਲੀ ਸੀ।
ਇਸ ਰੈਸਟੂਰੈਂਟ ਦੇ ਬਿਲਕੁਲ ਪਿੱਛੇ ਇੱਕ ਮੋਟਲ ਹੈ ਅਤੇ ਇਸ ਦੇ ਬਿਲਕੁਲ ਸਾਹਮਣੇ ਇੱਕ ਗੈਸ ਸਟੇਸ਼ਨ ਹੈ ਅਤੇ ਅਜਿਹੀ ਲੋਕੇਸ਼ਨ ਦੇ ਮੱਦੇਨਜਰ ਸ਼ੂਟਿੰਗ ਦੀ ਵਾਰਦਾਤ ਸੇਫਟੀ ਅਤੇ ਸੁਰੱਖਿਆ ਸੰਬੰਧੀ ਅਹਿਮ ਸਵਾਲ ਖੜੇ ਕਰਦੀ ਹੈ।
ਕਨੈਕਟ ਐਫ.ਐਮ. ਦੀ ਟੀਮ ਨੇ ਸਵੇਰ ਕਰੀਬ 10 ਵਜੇ ਮੌਕੇ ਦਾ ਜਾਇਜ਼ਾ ਲਿਆ ਤਾਂ ਰੈਸਟੂਰੈਂਟ ਨੂੰ ਪੀਲੀ ਟੇਪ ਨਾਲ ਕਵਰ ਕਰ ਦਿੱਤਾ ਗਿਆ ਸੀ ਅਤੇ ਮੌਕੇ 'ਤੇ ਅਫ਼ਸਰ ਮੌਜੂਦ ਸਨ।
ਸਟਾਫ਼ ਸਾਰਜੈਂਟ ਹੁਟਨ ਨੇ ਦੱਸਿਆ ਕਿ ਅਫ਼ਸਰ ਅੱਜ ਮੌਕੇ 'ਤੇ ਮੌਜੂਦ ਰਹਿਣਗੇ ਅਤੇ ਫਿਜੀਕਲ ਅਤੇ ਡਿਜੀਟਲ ਐਵੀਡੈਂਸ ਇਕੱਤਰ ਕਰਨਗੇ। ਇਸ ਤੋਂ ਪਹਿਲਾਂ ਇਸੇ ਵਪਾਰ ਦੀ ਮੇਪਲ ਰਿਜ ਲੋਕੇਸ਼ਨ 'ਤੇ ਵੀ ਗੋਲੀਆਂ ਚੱਲੀਆਂ ਸਨ।
ਸਟਾਫ਼ ਸਾਰਜੈਂਟ ਹੁਟਨ ਨੇ ਦੱਸਿਆ ਕਿ ਆਉਂਦੇ ਸਮੇਂ ਵਿੱਚ ਇਸ ਫਾਈਲ ਦੀ ਜਿੰਮੇਵਾਰੀ ਐਕਸਟੌਰਸ਼ਨ ਟਾਸਕ ਫੋਰਸ ਕੋਲ ਪਹੁੰਚ ਸਕਦੀ ਹੈ।
ਇਸ ਦੇ ਨਾਲ ਹੀ ਅੱਜ ਦੀ ਗੱਲਬਾਤ ਦੌਰਾਨ ਉਨ੍ਹਾਂ ਪੁਸ਼ਟੀ ਕੀਤੀ ਕਿ ਸਰੀ 'ਚ ਐਕਸਟੌਰਸ਼ਨ ਸੰਬੰਧੀ ਫਾਈਲਸ ਦੀ ਗਿਣਤੀ 56 ਤੱਕ ਪਹੁੰਚ ਗਈ ਹੈ ਅਤੇ ਇਸ 'ਚ 31 ਮਾਮਲੇ ਸ਼ੂਟਿੰਗ ਸੰਬੰਧਤ ਹਨ।
