ਬੀ.ਸੀ. ਦੀ ਅਲਰਟ ਬੇਅ ਆਰ.ਸੀ.ਐਮ.ਪੀ. ਨੇ ਵੱਡੇ ਪੱਧਰ 'ਤੇ ਕੰਮ ਕਰ ਰਹੇ ਫਰਾਡ ਗਿਰੋਹ ਦਾ ਕੀਤਾ ਪਰਦਾਫਾਸ਼

ਬੀ.ਸੀ. ਦੀ ਅਲਰਟ ਬੇਅ ਆਰ.ਸੀ.ਐਮ.ਪੀ. ਨੇ ਇੱਕ ਵੱਡੇ ਪੱਧਰ 'ਤੇ ਕੰਮ ਕਰ ਰਹੇ ਫਰਾਡ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ। ਇਸ ਗਿਰੋਹ ਦਾ ਪਤਾ ਉਦੋਂ ਲੱਗਾ ਜਦੋਂ ਨਮਗਿਸ ਫਸਟ ਨੇਸ਼ਨ ਦੇ ਨਵੇਂ ਵੈਲਨੈਸ ਤੇ ਟ੍ਰੀਟਮੈਂਟ ਸੈਂਟਰ ਦੀ ਉਸਾਰੀ ਲਈ ਰੱਖੇ ਗਏ ਫੰਡ ਨੂੰ ਟਾਰਗੇਟ ਕੀਤੇ ਜਾਣ ਦੀ ਰਿਪੋਰਟ ਮਿਲੀ।

ਅਲਰਟ ਬੇਅ ਆਰ.ਸੀ.ਐਮ.ਪੀ. ਅਨੁਸਾਰ, ਉਨ੍ਹਾਂ ਨੂੰ 13 ਮਈ ਨੂੰ ਨਮਗਿਸ ਫਸਟ ਨੇਸ਼ਨ ਤੋਂ ਰਿਪੋਰਟ ਮਿਲੀ ਸੀ ਕਿ ਉਨ੍ਹਾਂ ਦੇ ਠੇਕੇਦਾਰਾਂ ਨੂੰ ਭੇਜੇ ਜਾਣ ਵਾਲੀ ਕਰੀਬ $400,000 ਦੀ ਪੇਮੈਂਟ ਨੂੰ ਇੱਕ ਫਰਜ਼ੀ ਈ-ਮੇਲ ਰਾਹੀਂ ਇੱਕ ਫੇਕ ਬੈਂਕ ਅਕਾਊਂਟ ਵਿਚ ਰੀ-ਡਾਇਰੈਕਟ ਕੀਤਾ ਗਿਆ ਹੈ।

ਇਸ ਦੀ ਸੂਚਨਾ ਮਿਲਣ 'ਤੇ ਆਰ.ਸੀ.ਐਮ.ਪੀ. ਨੇ ਫੌਰੀ ਜਾਂਚ ਕਰਦੇ ਹੋਏ ਪੂਰਬੀ ਕੈਨੇਡਾ ਵਿਚ ਸਰਗਰਮ ਇੱਕ ਓਰਗਨਾਈਜ਼ਡ ਕ੍ਰਾਈਮ ਗਰੁੱਪ ਨਾਲ ਜੁੜੇ ਬੈਂਕ ਖਾਤੇ ਵਿਚ ਇੱਕ ਵੱਡੀ ਰਕਮ ਫ੍ਰੀਜ਼ ਕਰਨ ਵਿਚ ਸਫਲਤਾ ਹਾਸਲ ਕੀਤੀ। ਇਸ ਜਾਂਚ ਦੇ ਸਬੰਧ ਵਿਚ ਓਨਟਾਰੀਓ ਦੇ ਸ਼ਹਿਰ ਅਰੌਰਾ ਵਿਚ ਇੱਕ ਰਿਹਾਇਸ਼ 'ਤੇ ਸਰਚ ਵਾਰੰਟ ਲਾਗੂ ਕੀਤੇ ਗਏ, ਜਿਥੋਂ ਫਰਜ਼ੀ ਦਸਤਾਵੇਜ਼, ਬੈਂਕ ਟੋਕਨ, ਇਲੈਕਟ੍ਰਾਨਿਕ ਡਿਵਾਈਸ ਦੇ ਨਾਲ-ਨਾਲ ਵੱਡੀ ਮਾਤਰਾ ਵਿਚ ਸ਼ੱਕੀ ਜਾਅਲੀ ਕਰੰਸੀ ਬਰਾਮਦ ਕੀਤੀ ਗਈ।

ਪੁਲਿਸ ਨੇ ਦੱਸਿਆ ਕਿ ਛਾਪੇਮਾਰੀ ਦੌਰਾਨ ਉਨ੍ਹਾਂ ਸ਼ੱਕੀਆਂ ਦੀ ਪਛਾਣ ਕੀਤੀ ਹੈ, ਜਿਨ੍ਹਾਂ ਦੇ ਸਬੰਧ ਦੇਸ਼ ਭਰ ਵਿਚ ਸਰਗਰਮ ਸੰਗਠਿਤ ਵਿੱਤੀ ਅਪਰਾਧ ਨੈੱਟਵਰਕ ਅਤੇ ਵੱਡੇ ਧੋਖਾਧੜੀ ਦੇ ਮਾਮਲਿਆਂ ਨਾਲ ਹਨ। ਪੁਲਿਸ ਨੇ ਕਿਹਾ ਕਿ ਜਾਂਚ ਅਜੇ ਵੀ ਜਾਰੀ ਹੈ।