12.94C Vancouver 12.94C VancouverMay 7, 2026 1:51 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਵਿਚ 16 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਇੰਸਟਾਗ੍ਰਾਮ ਅਤੇ ਟਿਕ ਟੌਕ ਵਰਗੇ ਸੋਸ਼ਲ ਮੀਡੀਆ ਅਤੇ ਏ.ਆਈ. ਚੈਟਬੋਟ ਬੈਨ ਕਰਨ ਦੀ ਚੱਲ ਰਹੀ ਚਰਚਾ ਵਿਚਕਾਰ ਇੱਕ ਤਾਜ਼ਾ ਸਰਵੇ ਵਿਚ 70 ਫੀਸਦੀ ਕੈਨੇਡੀਅਨਜ਼ ਨੇ ਇਸ ਮੰਗ ਦਾ ਸਮਰਥਨ ਕੀਤਾ ਹੈ। ਲੈਜਰ ਪੋਲ ਮੁਤਾਬਕ, ਕੈਨੇਡੀਅਨਜ਼ ਸੋਸ਼ਲ ਮੀਡੀਆ ਅਤੇ ਏ.ਆਈ. ਚੈਟਬੋਟ ਦੇ ਟੀਨੇਜ਼ਰਸ 'ਤੇ ਪੈਣ ਵਾਲੇ ਨਕਾਰਾਤਮਕ ਪ੍ਰਭਾਵਾਂ ਨੂੰ ਲੈ ਕੇ ਬੇਹੱਦ ਚਿੰਤਤ ਹਨ, ਖਾਸ ਤੌਰ 'ਤੇ ਬੀ. ਸੀ. ਦੇ ਟੰਬਲਰ ਰਿਜ ਵਿਚ ਹੋਈ ਸਮੂਹਿਕ ਗੋਲੀਬਾਰੀ ਦੀ ਘਟਨਾ ਦੇ ਹਮਲਾਵਰ ਦੀਆਂ ਪੁਰਾਣੀਆਂ ਚੈਟ ਜੀ.ਟੀ.ਪੀ. ਗਤੀਵਧੀਆਂ ਮਗਰੋਂ ਇਹ ਚਿੰਤਾ ਵਧੇਰੇ ਵਧੀ ਹੈ।
ਸਰਕਾਰ ਵੀ ਇਸ ਮਾਮਲੇ ਨੂੰ ਲੈ ਕੇ ਗੰਭੀਰ ਦਿਖਾਈ ਦੇ ਰਹੀ ਹੈ। ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਮਿਨਿਸਟਰ ਈਵਨ ਸੋਲੋਮਨ ਨੇ ਅੱਜ ਸਵੇਰ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ ਕਿ ਇੱਕ ਮਾਪੇ ਹੋਣ ਦੇ ਨਾਤੇ ਉਹ ਵੀ ਸੋਸ਼ਲ ਮੀਡੀਆ ਕਾਰਨ ਹੋਣ ਵਾਲੇ ਨੁਕਸਾਨ ਨੂੰ ਸਮਝਦੇ ਹਨ ਅਤੇ ਫੈਡਰਲ ਸਰਕਾਰ ਬਿਲੁਕਲ ਇਸ ਸਬੰਧੀ ਰੈਗੂਲੇਸ਼ਨਸ ਲਈ ਕੰਮ ਕਰ ਰਹੀ ਹੈ।
ਗੌਰਤਲਬ ਹੈ ਕਿ ਪਿਛਲੇ ਮਹੀਨੇ ਮਾਂਟਰੀਅਲ ਵਿਚ ਹੋਈ ਲਿਬਰਲ ਪਾਰਟੀ ਦੀ ਤਿੰਨ ਦਿਨਾਂ ਸੰਮੇਲਨ ਦੌਰਾਨ ਇਸ ਮੁੱਦੇ 'ਤੇ ਇੱਕ ਮਤਾ ਵੀ ਪਾਸ ਕੀਤਾ ਗਿਆ ਸੀ, ਉਦੋਂ ਤੋਂ ਹੀ ਇੱਕ ਮਾਹਰ ਕਮੇਟੀ ਇਸ ਲਈ ਰੂਪ-ਰੇਖਾ ਬਣਾ ਰਹੀ ਹੈ।
