ਕੈਨੇਡਾ ਦੌਰਾ 'ਤੇ ਆਉਣਗੇ ਪੋਪ ਫਰਾਂਸਿਸ, ਇੰਡਜਨਸ ਲੋਕਾਂ ਨਾਲ ਕਰਨਗੇ ਮੁਲਾਕਾਤ

ਪੋਪ ਫਰਾਂਸਿਸ ਆਪਣੀ ਕੈਨੇਡਾ ਯਾਤਰਾ ਦੌਰਾਨ ਐਲਬਰਟਾ, ਕਿਊਬਿਕ ਤੇ ਨੂਨਾਵਤ ਦਾ ਦੌਰਾ ਕਰਨਗੇ। ਵੈਟੀਕਨ ਨੇ ਇਸ ਦੀ ਜਾਣਕਾਰੀ ਦਿੱਤੀ।

ਉਹ 24 ਤੋਂ 29 ਜੁਲਾਈ ਵਿਚਾਲੇ ਪ੍ਰਮੁੱਖ ਤੌਰ 'ਤੇ ਇਨ੍ਹਾਂ ਸੂਬਿਆਂ ਦੀਆਂ ਰਾਜਧਾਨੀਆਂ ਐਡਮਿੰਟਨ, ਕਿਊਬਿਕ ਸਿਟੀ ਤੇ ਇਕਾਲੂਇਟ ਜਾਣਗੇ। ਪੋਪ ਦਾ ਇਹ ਦੌਰਾ ਉਨ੍ਹਾਂ ਵੱਲੋਂ ਕੈਨੇਡਾ ਦੇ ਰੈਜ਼ੀਡੈਂਸ਼ਲ ਸਕੂਲਾਂ ਵਿਚ ਰੋਮਨ ਕੈਥੋਲਿਕ ਚਰਚ ਦੀ ਭੂਮਿਕਾ ਲਈ ਇਤਿਹਾਸਕ ਮੁਆਫ਼ੀ ਤੋਂ ਬਾਅਦ ਹੋਣ ਜਾ ਰਿਹਾ ਹੈ।

ਟ੍ਰਿਪ ਫਾਰ ਦਿ ਕੈਨੇਡੀਅਨ ਕਾਨਫਰੰਸ ਆਫ ਕੈਥੋਲਿਕ ਬਿਸ਼ਪਸ ਦੇ ਜਨਰਲ ਕੋਆਰਡੀਨੇਟਰ ਸਮਿਥ ਦਾ ਕਹਿਣਾ ਹੈ ਕਿ ਇਹ ਸੁਲ੍ਹਾ ਅਤੇ ਮੇਲ-ਮਿਲਾਪ ਲਈ ਇੱਕ ਹੋਰ ਮਹੱਤਵਪੂਰਨ ਕਦਮ ਸਾਬਤ ਹੋਵੇਗਾ।

ਕੈਥੋਲਿਕ ਬਿਸ਼ਪਸ ਦੀ ਕੈਨੇਡੀਅਨ ਕਾਨਫਰੰਸ ਨੇ ਕਿਹਾ ਕਿ ਪੋਪ ਦੇ ਦੌਰੇ ਲਈ ਤਿੰਨ ਸ਼ਹਿਰਾਂ ਦੀ ਚੋਣ ਯਾਤਰਾ ਦੀ ਲੰਬਾਈ, ਕੈਨੇਡਾ ਦੇ ਵਿਸ਼ਾਲ ਸਾਈਜ਼ ਅਤੇ 85 ਸਾਲਾ ਪੋਪ ਦੀ ਸਿਹਤ ਦੇ ਆਧਾਰ 'ਤੇ ਕੀਤੀ ਗਈ ਹੈ। ਸਮਿਥ ਨੇ ਕਿਹਾ ਕਿ ਇਨ੍ਹਾਂ ਤਿੰਨ ਚੁਣੇ ਹੋਏ ਸ਼ਹਿਰਾਂ ਵਿਚ ਦੇਸ਼ ਭਰ ਦੇ ਇੰਡਜਨਸ ਲੋਕਾਂ ਨੂੰ ਪੋਪ ਨੂੰ ਦੇਖਣ ਲਈ ਆਉਣਾ ਸੌਖਾ ਹੋਵੇਗਾ। ਗੌਰਤਲਬ ਹੈ ਕਿ ਐਡਮਿੰਟਨ ਅਰਬਨ ਸੈਂਟਰਾਂ ਵਿਚ ਦੂਜੀ ਸਭ ਤੋਂ ਵੱਡੀ ਗਿਣਤੀ ਵਿਚ ਰਹਿ ਰਹੇ ਇੰਡਜਨਸ ਲੋਕਾਂ ਦਾ ਘਰ ਹੈ।