ਲੈਗੋ ਦੇ ਅਸਤੀਫੇ ਤੋਂ ਬਾਅਦ ਵਿਰੋਧੀ ਧਿਰ ਵਲੋਂ ਮੁਕੰਮਲ ਆਜ਼ਾਦੀ 'ਤੇ ਬਹਿਸ ਮੁੜ ਸ਼ੁਰੂ ਕਰਨ ਦੀ ਕੀਤੀ ਮੰਗ

ਕਿਊਬੈਕ ਵਿਚ ਪ੍ਰੀਮੀਅਰ ਫਰਾਂਸਵਾ ਲੈਗੋ ਵਲੋਂ ਅਸਤੀਫੇ ਦੇਣ ਦੇ ਐਲਾਨ ਤੋਂ ਬਾਅਦ ਮੁੱਖ ਵਿਰੋਧੀ ਧਿਰ ਨੇ ਸੂਬੇ ਦੀ ਮੁਕੰਮਲ ਆਜ਼ਾਦੀ 'ਤੇ ਬਹਿਸ ਮੁੜ ਸ਼ੁਰੂ ਕਰਨ ਦਾ ਸੱਦਾ ਦਿੱਤਾ ਹੈ। ਪਾਰਟੀ ਕਿਊਬੈਕਵਾ ਦੇ ਲੀਡਰ ਪੌਲ ਸੈਂਟ ਪੀਅਰ ਪਲਾਮਿੰਡਨ ਨੇ ਕਿਹਾ ਕਿ ਲੈਗੋ ਦੇ ਸੱਤ ਸਾਲਾਂ ਦੇ ਸਾਸ਼ਨ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਕਿਊਬੈਕ ਨੂੰ ਹੁਣ ਕੈਨੇਡਾ ਤੋਂ ਵੱਖਰੇ ਹੋ ਜਾਣਾ ਚਾਹੀਦਾ ਹੈ।

ਪ੍ਰੀਮੀਅਰ ਲੈਗੋ ਨੇ ਕੋਲੀਸ਼ਨ ਐਵੇਨਿਰ ਕਿਊਬੈਕ ਪਾਰਟੀ ਦੀ ਸਥਾਪਨਾ ਖਾਸ ਮਕਸਦ ਨਾਲ ਕੀਤੀ ਸੀ, ਜਿਸ ਦਾ ਉਦੇਸ਼ ਕੈਨੇਡਾ ਦੇ ਅੰਦਰ ਰਹਿ ਕੇ ਹੀ ਕਿਊਬੈਕ ਦੀ ਖ਼ੁਦਮੁਖਤਿਆਰੀ ਵਧਾਉਣਾ ਸੀ। ਪਲਾਮਿੰਡਨ ਅਨੁਸਾਰ, ਇਹ ਬਦਲ ਇਮੀਗ੍ਰੇਸ਼ਨ ਅਤੇ ਸਿਹਤ ਸੇਵਾਵਾਂ ਵਰਗੇ ਅਹਿਮ ਮੁੱਦਿਆਂ 'ਤੇ ਕੋਈ ਸੁਧਾਰ ਹਾਸਲ ਕਰਨ ਵਿਚ ਨਾਕਾਮ ਰਿਹਾ ਹੈ।

ਗੌਰਤਲਬ ਹੈ ਕਿ ਪਾਰਟੀ ਕਿਊਬੈਕਵਾ ਪਿਛਲੇ ਦੋ ਸਾਲਾਂ ਤੋਂ ਓਪੀਨੀਅਨ ਪੋਲ ਵਿਚ ਅੱਗੇ ਚੱਲ ਰਹੀ ਹੈ। ਪਲਾਮਿੰਡਨ ਨੇ ਵਾਅਦਾ ਕੀਤਾ ਹੈ ਕਿ ਜੇਕਰ ਉਨ੍ਹਾਂ ਦੀ ਪਾਰਟੀ ਅਕਤੂਬਰ 2026 ਦੀਆਂ ਚੋਣਾਂ ਵਿਚ ਸੂਬੇ ਵਿਚ ਸਰਕਾਰ ਬਣਾਉਂਦੀ ਹੈ ਤਾਂ ਉਹ ਆਪਣੇ ਪਹਿਲੇ ਕਾਰਜਕਾਲ ਵਿਚ ਹੀ ਆਜ਼ਾਦੀ 'ਤੇ ਰਿਫਰੈਂਡਮ ਕਰਵਾਉਣਗੇ।

ਪਲਾਮਿੰਡਨ ਅਨੁਸਾਰ, ਸੂਬੇ ਵਿਚ ਚੋਣਾਂ ਨਿਰਧਾਰਤ ਸਮੇਂ ਤੋਂ ਪਹਿਲਾਂ ਹੋ ਸਕਦੀਆਂ ਹਨ। ਉਨ੍ਹਾਂ ਖਦਸ਼ਾ ਜਤਾਇਆ ਕਿ ਲੈਗੋ ਵੱਲੋਂ ਉਹਨਾਂ ਦੀ ਜਗ੍ਹਾ ਨਵਾਂ ਲੀਡਰ ਚੁਣੇ ਜਾਣ ਤੱਕ ਅਹੁਦੇ 'ਤੇ ਬਣੇ ਰਹਿਣ ਦੇ ਫੈਸਲੇ ਨਾਲ ਸੂਬੇ ਦੀ ਵਿਧਾਨ ਸਭਾ ਦਾ ਕੰਮਕਾਜ ਠੱਪ ਹੋ ਸਕਦਾ ਹੈ।