ਪ੍ਰਧਾਨ ਮੰਤਰੀ ਕਾਰਨੀ ਵਪਾਰ ਅਤੇ ਖੇਤਰੀ ਸਬੰਧਾਂ ਨੂੰ ਮਜ਼ਬੂਤ ​​ਕਰਨ ਲਈ ਪਹਿਲੀ ਏਸ਼ੀਆ ਯਾਤਰਾ 'ਤੇ ਹੋਏ ਰਵਾਨਾ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅੱਜ ਏਸ਼ੀਆ ਦੀ ਆਪਣੀ ਪਹਿਲੀ ਨੌ-ਦਿਨਾਂ ਅਧਿਕਾਰਤ ਯਾਤਰਾ ਸ਼ੁਰੂ ਕੀਤੀ ਹੈ। ਇਸ ਦੌਰੇ ਵਿਚ ਉਹ ਮਲੇਸ਼ੀਆ,ਸਿੰਗਾਪੁਰ ਅਤੇ ਸਾਊਥ ਕੋਰੀਆ ਜਾਣਗੇ। ਕਾਰਨੀ ਦਾ ਮੁੱਖ ਮਕਸਦ ਅਮਰੀਕਾ 'ਤੇ ਵਪਾਰ ਲਈ ਨਿਰਭਤਾ ਘਟਾਉਂਦੇ ਹੋਏ ਨਵੇਂ ਸਾਥੀ ਬਣਾਉਣਾ ਅਤੇ ਏਸ਼ੀਆ ਨਾਲ ਸੁਰੱਖਿਆ ਸਬੰਧਾਂ ਨੂੰ ਮਜਬੂਤ ਕਰਨਾ ਹੈ।

ਮਲੇਸ਼ੀਆ ਵਿਚ ਪ੍ਰਧਾਨ ਮੰਤਰੀ ਔਸੋਸੀਏਸ਼ਨ ਔਫ ਸਾਊਥ ਈਸਟ ਏਸ਼ੀਅਨ ਨੇਸ਼ਨ ਦੀ ਬੈਠਕ ਵਿਚ ਸ਼ਾਮਲ ਹੋਣਗੇ ਅਤੇ ਉਥੇ ਦੇ ਪ੍ਰਧਾਨ ਮੰਤਰੀ ਅਨਵਰ ਇਬਰਾਹਿਮ ਨਾਲ ਦੁਵੱਲੇ ਵਪਾਰ ਬਾਰੇ ਗੱਲਬਾਤ ਕਰਨਗੇ। ਇਸ ਤੋਂ ਬਾਅਦ ਸਿੰਗਾਪੁਰ ਵਿਚ ਉਹ ਪ੍ਰਧਾਨ ਮੰਤਰੀ ਲਾਰੈਂਸ ਵੋਂਗ ਅਤੇ ਕਾਰੋਬਾਰੀ ਆਗੂਆਂ ਨੂੰ ਮਿਲਣਗੇ ਤਾਂ ਕਿ ਵਪਾਰਕ ਰੁਕਾਵਟਾਂ ਘਟਾਈਆਂ ਜਾ ਸਕਣ ਅਤੇ ਨਿਵੇਸ਼ ਆਕਰਸ਼ਿਤ ਕੀਤਾ ਜਾ ਸਕੇ।

ਦੱਖਣੀ ਕੋਰੀਆ ਵਿਚ ਪੀ.ਐੱਮ. ਕਾਰਨੀ ਏਸ਼ੀਆ ਪ੍ਰਸ਼ਾਂਤ ਆਰਥਿਕ ਸਹਿਯੋਗ ਦੀ ਬੈਠਕ ਵਿਚ ਹਿੱਸਾ ਲੈਣਗੇ। ਇਸ ਦੌਰੇ ਵਿਚ ਉਨ੍ਹਾਂ ਦੀ ਰਾਸ਼ਟਰਪਤੀ ਟਰੰਪ ਅਤੇ ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਵੀ ਸੰਭਾਵਿਤ ਬੈਠਕ ਹੋਣ ਦੀ ਉਮੀਦ ਹੈ। ਚੀਨ ਕੈਨੇਡਾ ਦੇ ਕੈਨੋਲਾ ਲਈ ਸਭ ਤੋਂ ਵੱਡਾ ਬਾਜ਼ਾਰ ਹੈ। ਹਾਲ ਹੀ ਵਿਚ ਕੈਨੇਡਾ ਵਿਚ ਚੀਨ ਦੇ ਰਾਜਦੂਤ ਵਾਂਗ ਡੀ ਨੇ ਕਿਹਾ ਸੀ ਕਿ ਜੇ ਕੈਨੇਡਾ ਚੀਨ ਇਲੈਕਟ੍ਰਿਕ ਕਾਰਾਂ 'ਤੇ ਆਪਣੀ ਇੰਪੋਰਟ ਡਿਊਟੀ ਨੂੰ ਖਤਮ ਕਰਦਾ ਹੈ ਤਾਂ ਬੀਜਿੰਗ ਕੈਨੇਡੀਅਨ ਖੇਤੀਬਾੜੀ 'ਤੇ ਜਵਾਬੀ ਟੈਰਿਫਸ ਹਟਾਉਣ ਲਈ ਤਿਆਰ ਹੈ।