ਪੀ.ਐਮ. ਕਾਰਨੀ ਨੈਟੋ ਸਿਖਰ ਸੰਮੇਲਨ ਲਈ ਅੱਜ ਤੁਰਕੀ ਰਵਾਨਾ

ਪੀ.ਐਮ.ਮਾਰਕ ਕਾਰਨੀ ਦੋ-ਰੋਜ਼ਾ ਨੈਟੋ ਸਿਖਰ ਸੰਮੇਲਨ ਵਿਚ ਹਿੱਸਾ ਲੈਣ ਲਈ ਅੱਜ ਸ਼ਾਮ ਤੁਰਕੀ ਦੀ ਰਾਜਧਾਨੀ ਅੰਕਾਰਾ ਲਈ ਰਵਾਨਾ ਹੋਣਗੇ। ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਵੀ ਉਨ੍ਹਾਂ ਦੇ ਨਾਲ ਇਸ ਸਮਿਟ ਵਿਚ ਸ਼ਿਰਕਤ ਕਰ ਰਹੇ ਹਨ। 2015 ਤੋਂ ਬਾਅਦ ਕਿਸੇ ਕੈਨੇਡੀਅਨ ਪ੍ਰਧਾਨ ਮੰਤਰੀ ਦਾ ਇਹ ਪਹਿਲਾ ਤੁਰਕੀ ਦੌਰਾ ਹੈ। ਇਸ ਸੰਮੇਲਨ ਦੌਰਾਨ ਨੈਟੋ ਮੈਂਬਰ ਦੇਸ਼ਾਂ ਦੀ ਮੁੱਖ ਕੋਸ਼ਿਸ਼ ਰਾਸ਼ਟਰਪਤੀ ਟਰੰਪ ਨਾਲ ਕਿਸੇ ਵੀ ਤਰ੍ਹਾਂ ਦੇ ਕੂਟਨੀਤਕ ਟਕਰਾਅ ਤੋਂ ਬਚਣ ਦੀ ਰਹੇਗੀ। ​

ਡਿਫੈਂਸ ਬਜਟ ਇਸ ਸੰਮੇਲਨ ਦਾ ਮੁੱਖ ਕੇਂਦਰ ਬਿੰਦੂ ਹੋਵੇਗਾ ਕਿਉਂਕਿ ਨੈਟੋ ਮੈਂਬਰ ਦੇਸ਼ਾਂ 'ਤੇ ਅਮਰੀਕਾ ਵੱਲੋਂ ਰੱਖਿਆ ਖਰਚ ਵਧਾਉਣ ਲਈ ਲਗਾਤਾਰ ਭਾਰੀ ਦਬਾਅ ਪਾਇਆ ਜਾ ਰਿਹਾ ਹੈ। ਸਾਲ 2014 ਵਿਚ ਜਦੋਂ ਰੂਸ ਨੇ ਕ੍ਰੀਮੀਆ 'ਤੇ ਹਮਲਾ ਕਰਕੇ ਉਸ ਨੂੰ ਆਪਣੇ ਨਾਲ ਮਿਲਾ ਲਿਆ ਸੀ ਉਦੋਂ ਮੈਂਬਰ ਦੇਸ਼ਾਂ ਨੇ ਆਪਣੀ ਜੀਡੀਪੀ ਦਾ 2 ਫੀਸਦੀ ਰੱਖਿਆ 'ਤੇ ਖਰਚਣ ਦਾ ਟੀਚਾ ਮਿਥਿਆ ਸੀ।

ਕੈਨੇਡਾ ਲੰਬੇ ਸੰਘਰਸ਼ ਤੋਂ ਬਾਅਦ ਇਸ ਟੀਚੇ ਨੂੰ ਪੂਰਾ ਕਰਨ ਵਿਚ ਸਫਲ ਰਿਹਾ ਹੈ ਅਤੇ ਹੁਣ 7-8 ਜੁਲਾਈ ਦਾ ਸਿਖਰ ਸੰਮੇਲਨ ਪਿਛਲੇ ਸਾਲ ਹੇਗ ਵਿਖੇ ਕੀਤੀ ਗਈ ਉਸ ਵਚਨਬੱਧਤਾ ਤੋਂ ਬਾਅਦ ਪਹਿਲਾ ਸੰਮੇਲਨ ਹੈ, ਜਿਸ ਵਿਚ ਲਗਭਗ ਸਾਰੇ ਮੈਂਬਰ ਦੇਸ਼ਾਂ ਨੇ 2035 ਤੱਕ ਡਿਫੈਂਸ ਖਰਚਾ ਜੀਡੀਪੀ ਦਾ 5 ਫੀਸਦੀ ਕਰਨ ਦੀ ਹਾਮੀ ਭਰੀ ਸੀ। ਕਾਰਨੀ ਆਪਣੇ ਇਸ ਦੌਰੇ ਦੇ ਹਿੱਸੇ ਵਜੋਂ ਸਾਊਦੀ ਅਰਬ ਵੀ ਜਾਣਗੇ, ਜੋ ਕਿ ਖਾੜੀ ਖੇਤਰ ਵਿਚ ਕੈਨੇਡਾ ਦਾ ਦੂਜਾ ਵੱਡਾ ਵਪਾਰਕ ਭਾਈਵਾਲ ਹੈ।