ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਕਰਨਗੇ ਐਤਵਾਰ ਨੂੰ ਚੋਣਾਂ ਦੀ ਘੋਸ਼ਣਾ

ਕੈਨੇਡਾ ਵਿਚ 28 ਅਪ੍ਰੈਲ ਨੂੰ ਚੋਣਾਂ ਹੋ ਸਕਦੀਆਂ ਹਨ। ਸੂਤਰਾਂ ਮੁਤਾਬਕ, ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਐਤਵਾਰ ਨੂੰ ਇਸ ਦੀ ਘੋਸ਼ਣਾ ਕਰਨ ਜਾ ਰਹੇ ਹਨ।ਇਨ੍ਹਾਂ ਚੋਣਾਂ ਵਿਚ ਮੁੱਖ ਮੁੱਦਾ ਟਰੰਪ ਦੀ ਵਪਾਰ ਯੁੱਧ ਅਤੇ ਕੈਨੇਡਾ ਨੂੰ ਅਮਰੀਕਾ ਦਾ 51ਵਾਂ ਸੂਬਾ ਬਣਾਉਣ ਦੀਆਂ ਧਮਕੀਆਂ 'ਤੇ ਕੇਂਦਰਿਤ ਰਹਿਣ ਦੀ ਉਮੀਦ ਹੈ। ਲਿਬਰਲ, ਕੰਜ਼ਰਵੇਟਿਵ ਅਤੇ ਐਨਡੀਪੀ ਨੇ ਚੋਣ ਪ੍ਰਚਾਰ ਲਈ ਪਹਿਲਾਂ ਹੀ ਜਹਾਜ਼ ਅਤੇ ਬੱਸਾਂ ਬੁੱਕ ਕਰ ਲਈਆਂ ਹਨ ਅਤੇ ਵੀਕੈਂਡ 'ਤੇ ਚੋਣਾਂ ਦੀ ਘੋਸ਼ਣਾ ਹੋਣ ਦੀ ਉਮੀਦ ਵਿਚ ਉਨ੍ਹਾਂ ਦੇ ਜੰਗੀ ਕਮਰੇ ਵੀ ਤਿਆਰ ਹੋ ਗਏ ਹਨ।

ਇਸ ਵਿਚਕਾਰ ਲਿਬਰਲ ਪਾਰਟੀ ਨੇ ਵੈਨਕੂਵਰ ਦੇ ਸਾਬਕਾ ਮੇਅਰ ਗ੍ਰੇਗਰ ਰੌਬਰਟਸਨ ਅਤੇ ਇੱਕ ਨਿਊਜ਼ ਚੈਨਲ ਦੇ ਸਾਬਕਾ ਮੇਜ਼ਬਾਨ ਈਵਾਨ ਸੋਲੋਮਨ ਵਰਗੇ ਉੱਚ ਪ੍ਰੋਫਾਈਲ ਉਮੀਦਵਾਰਾਂ ਨੂੰ ਪਾਰਟੀ ਵਿਚ ਸ਼ਾਮਲ ਕੀਤਾ ਹੈ। ਸੂਤਰਾਂ ਮੁਤਾਬਕ,ਕਿਊਬੈਕ ਦੇ ਸਾਬਕਾ ਵਿੱਤ ਮੰਤਰੀ ਕਾਰਲੋਸ ਲੀਟਾਓ ਵੀ ਲਿਬਰਲ ਲਈ ਚੋਣ ਲੜਨਗੇ।

ਗੌਰਤਲਬ ਹੈ ਕਿ ਟਰੰਪ ਦੇ ਵਪਾਰ ਯੁੱਧ ਅਤੇ ਬਿਆਨਬਾਜ਼ੀ ਕਾਰਨ ਕੈਨੇਡੀਅਨ ਵਿਚ ਰਾਸ਼ਟਰਵਾਦ ਦੇ ਉਭਾਰ ਨੇ ਲਿਬਰਲ ਦੀ ਵਾਪਸੀ ਦੀਆਂ ਸੰਭਾਵਨਾਵਾਂ ਨੂੰ ਵਧਾਇਆ ਹੈ। ਸਰਵੇ ਦੱਸਦੇ ਹਨ ਕਿ ਲਿਬਰਲ ਹੁਣ ਕੰਜ਼ਰਵੇਟਿਵ ਨਾਲ ਸਖ਼ਤ ਟੱਕਰ ਵਿਚ ਹਨ, ਜਦੋਂ ਕਿ ਦੋ ਮਹੀਨੇ ਪਹਿਲਾਂ ਪੀਅਰ ਪੌਲੀਐਵ ਦੀ ਅਗਵਾਈ ਵਾਲੀ ਪਾਰਟੀ ਦੋਹਰੇ ਅੰਕਾਂ ਨਾਲ ਅੱਗੇ ਸੀ।