ਪ੍ਰਿੰਸ ਜਾਰਜ ਆਰ.ਸੀ.ਐਮ.ਪੀ. ਵੱਲੋਂ ਸਾਈਮਨ ਫ੍ਰੇਜ਼ਰ ਬ੍ਰਿਜ ਮਾਮਲੇ ਵਿੱਚ ਡੈਸ਼ ਕੈਮ ਫੁਟੇਜ ਦੀ ਅਪੀਲ

ਪ੍ਰਿੰਸ ਜਾਰਜ ਆਰ.ਸੀ.ਐਮ.ਪੀ. ਨੇ ਸਾਈਮਨ ਫਰੇਜ਼ਰ ਬ੍ਰਿਜ ਕੋਲ ਦੇਖੇ ਗਏ ਇੱਕ ਵਿਅਕਤੀ ਦੇ ਸ਼ੱਕੀ ਹਾਲਾਤ ਵਿਚ ਗਾਇਬ ਹੋਣ ਦੇ ਮਾਮਲੇ ਵਿਚ ਜਨਤਾ ਤੋਂ ਸਹਿਯੋਗ ਅਤੇ ਡੈਸ਼-ਕੈਮ ਫੁਟੇਜ ਦੀ ਮੰਗ ਕੀਤੀ ਹੈ। ਪੁਲਿਸ ਲਈ ਇਹ ਮਾਮਲਾ ਪਹੇਲੀ ਬਣਿਆ ਹੋਇਆ ਹੈ ਕਿ ਉਹ ਵਿਅਕਤੀ ਪੁਲ ਕੋਲੋਂ ਕੁੱਦ ਗਿਆ ਜਾਂ ਕਿਸੇ ਗੱਡੀ ਵਿਚ ਸਵਾਰ ਹੋ ਕੇ ਉੱਥੋਂ ਨਿਕਲ ਗਿਆ ਸੀ।

ਪੁਲਿਸ ਦਾ ਕਹਿਣਾ ਹੈ ਕਿ 28 ਦਸੰਬਰ 2025 ਨੂੰ ਸਵੇਰੇ ਕਰੀਬ 10:30 ਵਜੇ ਉਹਨਾਂ ਨੂੰ ਹਾਈਵੇ 97 ਅਤੇ ਫੈਰੀ ਐਵੇਨਿਊ ਸਥਿਤ ਸਾਈਮਨ ਫਰੇਜ਼ਰ ਬ੍ਰਿਜ ਦੀ ਸਾਊਥ ਸਾਈਡ ਗਾਰਡ ਰੇਲ ਨੇੜੇ ਇੱਕ ਵਿਅਕਤੀ ਬਾਰੇ ਸੂਚਨਾ ਮਿਲੀ ਸੀ, ਜਿਸ ਨੇ ਗੂੜੇ ਰੰਗ ਦੇ ਕੱਪੜੇ ਪਾਏ ਹੋਏ ਸਨ ਅਤੇ ਬੈਕਪੈਕ ਪਾਇਆ ਹੋਇਆ ਸੀ, ਜਦੋਂ ਪੁਲਿਸ ਅਧਿਕਾਰੀ ਮੌਕੇ 'ਤੇ ਪਹੁੰਚੇ ਤਾਂ ਉਹ ਵਿਅਕਤੀ ਉੱਥੇ ਨਹੀਂ ਸੀ।

ਪ੍ਰਿੰਸ ਜੌਰਜ ਫਾਇਰ ਰੈਸਕਿਊ ਅਤੇ ਸਰਚ ਐਂਡ ਰੈਸਕਿਊ ਟੀਮਾਂ ਦੀ ਮਦਦ ਨਾਲ ਇਲਾਕੇ ਦੀ ਵਿਆਪਕ ਤਲਾਸ਼ੀ ਲਈ ਗਈ ਪਰ ਕੋਈ ਸੁਰਾਗ ਨਹੀਂ ਮਿਲ ਸਕਿਆ। Cst. ਜੇਨਾ ਮੂਰ ਨੇ ਕਿਹਾ ਕਿ ਅਜੇ ਵੀ ਇਹ ਸਪੱਸ਼ਟ ਨਹੀਂ ਹੈ ਕਿ ਉਸ ਪੈਦਲ ਵਿਅਕਤੀ ਨੂੰ ਕੋਈ ਗੱਡੀ ਉਥੋਂ ਲੈ ਗਈ ਜਾਂ ਉਸ ਨੇ ਪੁਲ ਦੀ ਸਾਈਡ ਤੋਂ ਛਾਲ ਮਾਰ ਦਿੱਤੀ ਸੀ। ਮੂਰ ਨੇ ਕਿਹਾ ਕਿ ਅਸੀਂ ਉਨ੍ਹਾਂ ਗਵਾਹਾਂ ਨਾਲ ਗੱਲ ਕਰਨਾ ਚਾਹੁੰਦੇ ਹਾਂ ਜੋ ਉਸ ਸਵੇਰੇ 9:30 ਤੋਂ 11:00 ਵਜੇ ਵਿਚਕਾਰ ਉਸ ਇਲਾਕੇ ਵਿਚ ਮੌਜੂਦ ਸਨ। ਉਹਨਾਂ ਕਿਹਾ ਕਿ ਇਸ ਮਾਮਲੇ ਦੀ ਜਾਂਚ ਲਗਾਤਾਰ ਜਾਰੀ ਹੈ।