ਪ੍ਰਿੰਸ ਜਾਰਜ ਆਰ.ਸੀ.ਐਮ.ਪੀ. ਨੇ ਵੱਖ-ਵੱਖ ਥਾਵਾਂ ਤੇ ਛਾਪੇਮਾਰੀ ਕਰ ਕੈਸ਼ ਸਣੇ ਹੋਰ ਕਈ ਸਾਮਾਨ ਕੀਤਾ ਜ਼ਬਤ

ਪ੍ਰਿੰਸ ਜਾਰਜ ਆਰ.ਸੀ.ਐਮ.ਪੀ. ਦੇ ਫਰੰਟਲਾਈਨ ਅਧਿਕਾਰੀਆਂ ਨੇ ਬੀਤੇ ਹਫਤੇ ਦੇ ਅੰਤ 'ਤੇ ਨਸ਼ਾ ਤਸਕਰਾਂ ਵਿਰੁੱਧ ਵਿੱਢੀ ਮੁਹਿੰਮ ਤਹਿਤ ਵੱਖ-ਵੱਖ ਥਾਵਾਂ 'ਤੇ ਛਾਪੇਮਾਰੀ ਕਰ ਹਥਿਆਰ, ਨਸ਼ੀਲੇ ਪਦਾਰਥ, ਕੈਸ਼ ਅਤੇ ਚੋਰੀ ਦਾ ਸਾਮਾਨ ਬਰਾਮਦ ਕੀਤਾ ਹੈ। 12 ਦਸੰਬਰ ਨੂੰ ਮੈਕਇੰਟਾਇਰ ਕ੍ਰੇਸੈਂਟ ਦੇ 200-ਬਲਾਕ ਵਿਚ ਦੋ ਘਰਾਂ ਦੀ ਤਲਾਸ਼ੀ ਦੌਰਾਨ ਗੋਲੀ-ਸਿੱਕਾ, ਨਸ਼ਾ ਤਸਕਰੀ ਦਾ ਸਾਮਾਨ, ਕਈ ਹਥਿਆਰ ਅਤੇ ਸ਼ੱਕੀ ਮੈਥਾਮਫੇਟਾਮਾਈਨ ਦੀ ਬਰਾਮਦ ਹੋਈ।

ਇਸੇ ਦਿਨ ਪੀਅਰਸਨ ਐਵੇਨਿਊ ਦੇ 1300-ਬਲਾਕ ਵਿਚ ਛਾਪੇਮਾਰੀ ਦੌਰਾਨ ਪੁਲਿਸ ਨੂੰ ਇੱਕ ਬੰਦੂਕ, ਨਸ਼ੀਲੇ ਪਦਾਰਥ ਤੇ ਚੋਰੀ ਦੇ ਦੋ ਮੋਟਰਸਾਈਕਲ ਮਿਲੇ। ਸ਼ਨੀਵਾਰ ਨੂੰ ਥਰਡ ਐਵੇਨਿਊ 'ਤੇ ਇੱਕ ਗੱਡੀ ਵਿਚ ਸੁੱਤੇ ਪਏ ਦੋ ਵਿਅਕਤੀਆਂ ਦੀ ਤਲਾਸ਼ੀ ਮੌਕੇ ਗੱਡੀ ਵਿਚੋਂ ਹਥਿਆਰ,ਇੱਕ ਨਕਲੀ ਬੰਦੂਕ, ਗੈਰ-ਕਾਨੂੰਨੀ ਸਿਗਰਟਾਂ, 1,000 ਡਾਲਰ ਕੈਸ਼, ਲਗਭਗ 10 ਗ੍ਰਾਮ ਸ਼ੱਕੀ ਫੈਂਟਾਨਿਲ, ਕੋਕੀਨ ਅਤੇ ਮੈਥਾਮਫੇਟਾਮਾਈਨ ਜ਼ਬਤ ਹੋਏ।

ਹਾਲਾਂਕਿ, ਦੋਵਾਂ ਵਿਅਕਤੀਆਂ ਨੂੰ ਲੈਬ ਰਿਪੋਰਟ ਆਉਣ ਤੱਕ ਰਿਹਾਅ ਕੀਤਾ ਗਿਆ ਹੈ। ਇਸ ਤੋਂ ਬਾਅਦ ਐਤਵਾਰ ਨੂੰ ਹਾਈਵੇਅ 97 ਨੌਰਥ 'ਤੇ ਨਾਕਾਬੰਦੀ ਦੌਰਾਨ ਇੱਕ ਡਰਾਈਵਰ ਨੂੰ ਬੌਡੀ ਆਰਮਰ ਰੱਖਣ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ, ਪਰ ਉਸ ਨੂੰ ਅਦਾਲਤ ਵਿਚ ਪੇਸ਼ ਹੋਣ ਦੀ ਤਾਰੀਖ਼ ਦੇ ਕੇ ਰਿਹਾਅ ਕਰ ਦਿੱਤਾ ਗਿਆ। ਕਾਰਪੋਰਲ ਜੈਨੀਫਰ ਕੂਪਰ ਨੇ ਦੱਸਿਆ ਕਿ ਇਨ੍ਹਾਂ ਮਾਮਲਿਆਂ ਦੀ ਅੱਗੇ ਜਾਂਚ ਜਾਰੀ ਹੈ।