ਨਵੇਂ ਕੰਟਰੈਕਟ ਨੂੰ ਲੈ ਕੇ ਵਿਵਾਦ, 120,000 ਫੈਡਰਲ ਮੁਲਾਜ਼ਮਾਂ ਲਈ ਹੜਤਾਲ ਵੋਟਿੰਗ ਦਾ ਕੀਤਾ ਐਲਾਨ

ਕੈਨੇਡਾ ਦੀ ਸਭ ਤੋਂ ਵੱਡੀ ਫੈਡਰਲ ਪਬਲਿਕ ਸਰਵਿਸ ਯੂਨੀਅਨ ਨੇ ਨਵੇਂ ਕੰਟਰੈਕਟ ਲਈ ਸਰਕਾਰ ਨਾਲ ਗੱਲਬਾਤ ਟੁੱਟਣ ਕਾਰਨ ਦੇਸ਼-ਵਿਆਪੀ ਹੜਤਾਲ ਕਰਨ ਲਈ ਵੋਟ ਕਰਵਾਉਣ ਦਾ ਐਲਾਨ ਕੀਤਾ ਹੈ, ਜਿਸ ਵਿਚ ਪਬਲਿਕ ਸਰਵਿਸ ਅਲਾਇੰਸ ਆਫ਼ ਕੈਨੇਡਾ ਦੇ ਲਗਭਗ 120,000 ਵਰਕਰਜ਼ ਹਿੱਸਾ ਲੈਣਗੇ, ਇਹਨਾਂ ਵਿਚ ਜੰਗਲੀ ਖੇਤਰਾਂ ਦੇ ਅੱਗ ਬੁਝਾਊ ਕਰਮਚਾਰੀ, ਪਾਸਪੋਰਟ ਅਧਿਕਾਰੀ, ਮੱਛੀ ਪਾਲਣ ਅਧਿਕਾਰੀ, ਸੰਘੀ ਅਧਿਆਪਕ, ਲਾਇਬ੍ਰੇਰੀਅਨ ਅਤੇ ਪ੍ਰਬੰਧਕੀ ਸਟਾਫ਼ ਸ਼ਾਮਲ ਹਨ। ਇਹ ਵੋਟਿੰਗ ਪ੍ਰਕਿਰਿਆ 16 ਨਵੰਬਰ 2026 ਤੋਂ 22 ਜਨਵਰੀ 2027 ਤੱਕ ਚੱਲੇਗੀ।

ਯੂਨੀਅਨ ਅਤੇ ਖਜ਼ਾਨਾ ਬੋਰਡ ਵਿਚਾਲੇ ਪਿਛਲੇ ਡੇਢ ਸਾਲ ਤੋਂ ਨਵੇਂ ਸਮਝੌਤੇ ਨੂੰ ਲੈ ਕੇ ਵਿਵਾਦ ਬਣਿਆ ਹੋਇਆ ਹੈ। ਪੀ.ਐਸ.ਏ.ਸੀ. ਦਾ ਦੋਸ਼ ਹੈ ਕਿ ਫੈਡਰਲ ਸਰਕਾਰ ਤਨਖ਼ਾਹਾਂ ਅਤੇ ਏ.ਆਈ. ਤੋਂ ਨੌਕਰੀ ਦੀ ਸੁਰੱਖਿਆ ਵਰਗੇ ਅਹਿਮ ਮੁੱਦਿਆਂ 'ਤੇ ਗੱਲਬਾਤ ਕਰਨ ਤੋਂ ਲਗਾਤਾਰ ਟਾਲਮਟੋਲ ਕਰ ਹੈ।

ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਸਾਲ 2023 ਵਿਚ ਵੀ ਤਨਖ਼ਾਹਾਂ ਵਿਚ ਵਾਧੇ ਦੀ ਮੰਗ ਨੂੰ ਲੈ ਕੇ 1,55,000 ਫੈਡਰਲ ਪਬਲਿਕ ਸਰਵਿਸਸ ਵਰਕਰਜ਼ ਨੇ ਹੜਤਾਲ ਕੀਤੀ ਸੀ, ਜੋ ਲਗਭਗ ਦੋ ਹਫ਼ਤਿਆਂ ਤੱਕ ਚੱਲੀ ਸੀ।