15.3C Vancouver 15.3C VancouverJan 19, 2026 6:52 PM - Connect Newsroom - Ramandeep Kaur with files from The Canadian Press
ਵੈਨਕੂਵਰ ਪੁਲਿਸ ਦੀ ਕੁੱਟਮਾਰ ਕਾਰਨ 2015 ਵਿਚ ਹੋਈ 33 ਸਾਲਾ ਮਾਇਲਸ ਗ੍ਰੇ ਦੀ ਮੌਤ ਦੇ ਮਾਮਲੇ ਵਿਚ ਅੱਜ ਇੱਕ ਅਹਿਮ ਜਨਤਕ ਸੁਣਵਾਈ ਸ਼ੁਰੂ ਹੋਈ ਹੈ। ਪੁਲਿਸ ਸ਼ਿਕਾਇਤ ਕਮਿਸ਼ਨਰ ਦਫ਼ਤਰ ਵੱਲੋਂ ਕਰਵਾਈ ਜਾ ਰਹੀ ਇਹ ਸੁਣਵਾਈ ਬੀ.ਸੀ. ਸੁਪਰੀਮ ਕੋਰਟ ਦੀ ਸਾਬਕਾ ਜੱਜ ਐਲਿਜ਼ਾਬੈਥ ਆਰਨੋਲਡ-ਬੇਲੀ ਦੀ ਅਗਵਾਈ ਹੇਠ ਡਾਊਨਟਾਊਨ ਵੈਨਕੂਵਰ ਦੇ ਯੂਬੀਸੀ ਰੌਬਸਨ ਸਕੁਏਅਰ ਵਿਖੇ ਹੋ ਰਹੀ ਹੈ।
ਇਸ ਸੁਣਵਾਈ ਦਾ ਸਾਹਮਣਾ ਕਰਨ ਵਾਲੇ ਔਫੀਸਰ ਵਿਚ ਹਰਦੀਪ ਸਹੋਤਾ ਸਮੇਤ 7 ਕਾਂਸਟੇਬਲ ਸ਼ਾਮਲ ਹਨ। ਇਹ ਜਨਤਕ ਸੁਣਵਾਈ ਲਗਭਗ 10 ਹਫ਼ਤਿਆਂ ਤੱਕ ਚੱਲੇਗੀ। ਮਾਇਲਸ ਦੀ ਮਾਂ ਮਾਰਗੀ ਗ੍ਰੇ ਅੱਜ ਪਹਿਲੀ ਗਵਾਹ ਵਜੋਂ ਪੇਸ਼ ਹੋਏ ਹਨ। ਪਰਿਵਾਰ ਲੰਬੇ ਸਮੇਂ ਤੋਂ ਇਨਸਾਫ਼ ਅਤੇ ਜਵਾਬਦੇਹੀ ਦੀ ਮੰਗ ਕਰ ਰਿਹਾ ਸੀ। ਅਗਸਤ 2015 ਵਿਚ ਮਾਇਲਸ ਦੀ ਬਰਨਬੀ ਵਿਚ ਵੈਨਕੂਵਰ ਪੁਲਿਸ ਨਾਲ ਇੱਕ ਝੜਪ ਤੋਂ ਬਾਅਦ ਮੌਤ ਹੋ ਗਈ ਸੀ।
ਉਸ ਦੇ ਸਰੀਰ 'ਤੇ ਗੰਭੀਰ ਸੱਟਾਂ ਸਨ, ਜਿਸ ਵਿਚ ਅੱਖ ਦੀ ਸਾਕਟ ਟੁੱਟਣੀ, ਨੱਕ ਤੇ ਪਸਲੀਆਂ ਦਾ ਟੁੱਟਣਾ ਸ਼ਾਮਲ ਸੀ। ਇਸ ਜਨਤਕ ਸੁਣਵਾਈ ਦਾ ਮਕਸਦ ਇਹ ਪਤਾ ਲਗਾਉਣਾ ਹੈ ਕਿ ਕੀ ਸੱਤ ਪੁਲਿਸ ਅਧਿਕਾਰੀਆਂ ਨੇ ਗੈਰ-ਕਾਨੂੰਨੀ ਤਰੀਕੇ ਨਾਲ ਜਾਂ ਲੋੜ ਤੋਂ ਵੱਧ ਤਾਕਤ ਦੀ ਵਰਤੋਂ ਕੀਤੀ ਸੀ। 2023 ਦੀ ਇੱਕ ਕੋਰੋਨਰ ਪੁੱਛਗਿੱਛ ਨੇ ਮੌਤ ਨੂੰ ਕਤਲ ਕਰਾਰ ਦਿੱਤਾ ਸੀ, ਜਦੋਂ ਕਿ 2024 ਵਿਚ ਇੱਕ ਐਕਸਟਰਨਲ ਜਾਂਚ ਨੇ ਔਫੀਸਰ ਨੂੰ ਕਲੀਨ ਚਿੱਟ ਦੇ ਦਿੱਤੀ ਸੀ।
