16.79C Vancouver 16.79C VancouverAug 28, 2026 2:13 PM - Connect Newsroom - Ramandeep Kaur with files from The Canadian Press
ਕਿਊਬੈਕ ਵਿਚ 5 ਅਕਤੂਬਰ ਨੂੰ ਹੋਣ ਵਾਲੀਆਂ ਚੋਣਾਂ ਲਈ ਸਿਆਸੀ ਮੁਹਿੰਮ ਭੱਖ ਚੁੱਕੀ ਹੈ ਅਤੇ ਇਸ ਵਾਰ ਚੋਣਾਂ ਦਾ ਸਾਰਾ ਮਾਹੌਲ ਸਥਾਨਕ ਮੁੱਦਿਆਂ ਤੋਂ ਵੱਧ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਅਤੇ ਟਰੇਡ ਵਾਰ ਦੇ ਆਲੇ-ਦੁਆਲੇ ਘੁੰਮ ਰਿਹਾ ਹੈ ਤੇ ਰਿਫਰੈਂਡਮ ਦਾ ਮੁੱਦਾ ਵੀ ਪਿਛੋਕੜ ਵਿਚ ਚਲਾ ਗਿਆ ਹੈ।
ਸੂਬੇ ਦੀ ਸੱਤਾਧਾਰੀ ਕੋਲੀਸ਼ਨ ਐਵੇਨਿਰ ਕਿਊਬੈਕ ਦੀ ਲੀਡਰ ਅਤੇ ਮੌਜੂਦਾ ਪ੍ਰੀਮੀਅਰ ਕ੍ਰਿਸਟੀਨ ਫਰੈਚੇਟ ਨੇ ਆਪਣੀ ਮੁਹਿੰਮ ਦਾ ਆਗਾਜ਼ ਕਰਦਿਆਂ ਟਰੰਪ ਨੂੰ ਹੀ ਆਪਣਾ ਮੁੱਖ ਵਿਰੋਧੀ ਦੱਸਿਆ। ਉਨ੍ਹਾਂ ਇਸ ਟਰੇਡ ਵਾਰ ਦੀ ਤੁਲਨਾ ਇੱਕ ਵੱਡੇ ਤੂਫਾਨ ਨਾਲ ਕਰਦਿਆਂ ਵੋਟਰਾਂ ਨੂੰ ਕਿਹਾ ਕਿ ਅਮਰੀਕਾ ਵਲੋਂ ਆਰਥਿਕ ਹਮਲਿਆਂ ਦੇ ਇਸ ਮੁਸ਼ਕਲ ਦੌਰ ਵਿਚ ਉਨ੍ਹਾਂ ਦੀ ਪਾਰਟੀ ਹੀ ਸੂਬੇ ਨੂੰ ਸਥਿਰਤਾ ਅਤੇ ਸੁਰੱਖਿਆ ਪ੍ਰਦਾਨ ਕਰ ਸਕਦੀ ਹੈ।
ਦੂਜੇ ਪਾਸੇ, ਕੈਨੇਡਾ ਤੋਂ ਵੱਖ ਹੋਣ ਦਾ ਸਮਰਥਨ ਕਰਨ ਵਾਲੀ Parti Québécois ਵੀ ਆਪਣੀ ਆਰਥਿਕ ਟੀਮ 'ਤੇ ਜ਼ੋਰ ਦਿੰਦੇ ਹੋਏ ਟਰੰਪ ਦੇ ਆਰਥਿਕ ਝਟਕਿਆਂ ਤੋਂ ਸੂਬੇ ਨੂੰ ਪ੍ਰੋਟੈਕਟ ਕਰਨ ਦੇ ਤੌਰ 'ਤੇ ਖੁਦ ਨੂੰ ਸਭ ਤੋਂ ਯੋਗ ਦਾਅਵੇਦਾਰ ਵਜੋਂ ਪੇਸ਼ ਕਰਦੀ ਨਜ਼ਰ ਆ ਰਹੀ ਹੈ। PQ ਲੀਡਰ ਪਾਲ ਸੇਂਟ-ਪੀਅਰੇ ਪਲੈਮੰਡਨ ਨੇ ਵੀਰਵਾਰ ਨੂੰ ਭਾਸ਼ਣ ਦੌਰਾਨ ਰਿਫਰੈਂਡਮ ਕਰਵਾਉਣ ਦਾ ਸਿਰਫ ਇੱਕ ਵਾਰ ਜ਼ਿਕਰ ਕੀਤਾ ਅਤੇ ਉਹ ਪਿਛਲੇ ਹਫ਼ਤੇ ਪਹਿਲਾਂ ਹੀ ਕਹਿ ਚੁੱਕੇ ਸਨ ਕਿ ਜਦੋਂ ਤੱਕ ਟਰੰਪ ਸੱਤਾ ਵਿਚ ਹਨ ਉਹ ਕੋਈ ਰਿਫਰੈਂਡਮ ਨਹੀਂ ਕਰਵਾਉਣਗੇ।
