14.09C Vancouver 14.09C VancouverDec 14, 2023 5:33 PM - The Canadian Press
ਸੂਬੇ ਤੋਂ ਬਾਹਰਲੇ ਵਿਦਿਆਰਥੀਆਂ ਲਈ ਟਿਊਸ਼ਨ ਫੀਸ ਦੁੱਗਣਾ ਕਰਨ ਦੇ ਫੈਸਲੇ ਨੂੰ ਲੈ ਕੇ ਕਿਊਬੈਕ ਸਰਕਾਰ ਦੀ ਯੋਜਨਾ ਦੀ ਜੰਮ ਕੇ ਨਿੰਦਾ ਹੋ ਰਹੀ ਸੀ। ਇਸੇ ਵਿਰੋਧ ਦੇ ਵਿਚਾਲੇ ਹੁਣ ਕਿਊਬੈਕ ਸਰਕਾਰ ਟਿਊਸ਼ਨ ਫੀਸ ਨੂੰ ਵਧਾ ਕੇ $12,000 ਪ੍ਰਤੀ ਸਾਲ ਕਰ ਰਹੀ ਹੈ। ਇਸਦੇ ਨਾਲ ਹੀ ਮੈਕਗਿਲ ਅਤੇ ਕੋਨਕੋਰਡੀਆ ਯੂਨੀਵਰਸਿਟੀਆਂ ਵਿੱਚ ਆਉਣ ਵਾਲੇ ਸੂਬੇ ਤੋਂ ਬਾਹਰਲੇ ਵਿਦਿਆਰਥੀਆਂ ਲਈ ਫ੍ਰੈਂਚ ਭਾਸ਼ਾ ਨੂੰ ਲਾਜ਼ਮੀ ਤੌਰ 'ਤੇ ਲਾਗੂ ਕਰ ਰਹੀ ਹੈ।
ਉੱਚ ਸਿੱਖਿਆ ਮੰਤਰੀ ਪਾਸਕੇਲ ਡੇਰੀ ਨੇ ਅੱਜ ਨਵੇਂ ਉਪਾਵਾਂ ਦੀ ਘੋਸ਼ਣਾ ਕਰਦੇ ਹੋਏ ਕਿਹਾ ਕਿ ਸਰਕਾਰ ਚਾਹੁੰਦੀ ਹੈ ਕਿ ਕਿਊਬੈਕ ਸੁਸਾਇਟੀ ਦੀ ਬਿਹਤਰੀ ਲਈ ਉਹ ਕੈਨੇਡੀਅਨ ਅਤੇ ਵਿਦੇਸ਼ੀ ਗ੍ਰੈਜੂਏਟ ਨੂੰ ਇਕੱਠਾ ਕਰਨਾ ਚਾਹੁੰਦੇ ਹਨ।
ਦੱਸ ਦਈਏ ਕਿ ਪਹਿਲਾਂ ਕਿਊਬੈਕ ਨੇ ਸ਼ੁਰੂ ਵਿੱਚ ਸੂਬੇ ਤੋਂ ਬਾਹਰ ਦੇ ਵਿਦਿਆਰਥੀਆਂ ਲਈ ਟਿਊਸ਼ਨ ਫੀਸ $8,992 ਤੋਂ ਵਧਾ ਕੇ ਲਗਭਗ $17,000 ਕਰਨ ਦਾ ਪ੍ਰਸਤਾਵ ਰੱਖਿਆ ਸੀ, ਪਰ ਅੱਜ ਦੀ ਘੋਸ਼ਣਾ ਵਿੱਚ ਇਸ ਰਕਮ ਨੂੰ ਘਟਾ ਦਿੱਤਾ ਗਿਆ ਹੈ। ਹਾਲਾਂਕਿ ਸਰਕਾਰ ਨੇ ਇਸ ਨਵੀਂ ਲੋੜ ਨੂੰ ਲਾਜ਼ਮੀ ਕਰਦੇ ਹੋਏ ਕਿਹਾ ਕਿ ਅੰਗਰੇਜ਼ੀ ਯੂਨੀਵਰਸਿਟੀਆਂ ਵਿੱਚ 80 ਫ਼ੀਸਦੀ ਸੂਬੇ ਤੋਂ ਬਾਹਰ ਦੇ ਵਿਦਿਆਰਥੀਆਂ ਨੂੰ ਗ੍ਰੈਜੂਏਟ ਹੋਣ ਤੋਂ ਪਹਿਲਾਂ ਫ੍ਰੈਂਚ ਭਾਸ਼ਾ ਆਉਣੀ ਜ਼ਰੂਰੀ ਹੈ।
ਫ੍ਰੈਂਚ-ਭਾਸ਼ਾ ਦੇ ਨਵੇਂ ਮਾਪਦੰਡ 2025-26 ਅਕਾਦਮਿਕ ਸਾਲ ਲਈ ਲਾਗੂ ਹੋਣਗੇ ਅਤੇ ਟਿਊਸ਼ਨ ਫੀਸ ਵਿੱਚ ਵਾਧਾ ਫਾਲ ਵਿੱਚ ਸ਼ੁਰੂ ਹੋਵੇਗਾ। ਕਿਊਬੈਕ ਦੀ ਅੰਗਰੇਜ਼ੀ-ਭਾਸ਼ਾ ਦੀ ਯੂਨੀਵਰਸਿਟੀ ਬਿਸ਼ਪ ਟਿਊਸ਼ਨ ਫੀਸ ਵਾਧੇ ਤੋਂ ਬੇਸ਼ੱਕ ਬਚ ਗਈ ਹੈ ਪਰ ਉਸ ਨੂੰ ਫ੍ਰੈਂਚ ਭਾਸ਼ਾ ਦੀਆਂ ਲੋੜਾਂ ਪੂਰੀਆਂ ਕਰਨੀਆਂ ਪੈਣਗੀਆਂ।
ਜ਼ਿਕਰਯੋਗ ਹੈ ਕਿ ਕਿਊਬੈਕ ਤੋਂ ਬਾਹਰ ਕੈਨੇਡੀਅਨਾਂ ਲਈ ਟਿਊਸ਼ਨ ਫੀਸ 2024 ਦੀ ਸ਼ੁਰੂਆਤ ਵਿੱਚ $8,992 ਤੋਂ ਵੱਧ ਕੇ $17,000 ਕਰ ਦਿੱਤੀ ਗਈ ਸੀ ਤੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਇਹ ਫ਼ੀਸ $20,000 ਕਰਨ ਦਾ ਐਲਾਨ ਕੀਤਾ ਗਿਆ ਸੀ , ਜਿਸਦਾ ਲਗਾਤਾਰ ਵਿਰੋਧ ਹੋ ਰਿਹਾ ਸੀ।
