ਕਿਊਬੈਕ ਦੇ ਇਮੀਗਰੇਸ਼ਨ ਮਨਿਸਟਰ ਮੁਤਾਬਕ ਰਿਫਿਊਜੀ ਸਪਾਂਸਰਸ਼ਿਪ ਪ੍ਰੋਗਰਾਮ ਵਿੱਚ ਸੁਧਾਰ ਦੀ ਲੋੜ

ਕਿਊਬੈਕ ਦੇ ਇਮੀਗਰੇਸ਼ਨ ਮਨਿਸਟਰ (Immigration Minister) ਨੇ ਇਹ ਗੱਲ ਸਵੀਕਾਰ ਕੀਤੀ ਕਿ ਸੂਬੇ ਦੇ ਰਿਫਿਊਜੀ ਸਪਾਂਸਰਸ਼ਿਪ ਪ੍ਰੋਗਰਾਮ (Refugee Sponsorship Program) ਵਿੱਚ ਸੁਧਾਰ ਹੋਣ ਦੀ ਲੋੜ ਹੈ। ਕਿਊਬੈਕ ਦੀ ਸਰਕਾਰ ਵੱਲੋਂ ਵੀਕੈਂਡ ਦੌਰਾਨ ਉਨ੍ਹਾਂ ਲੋਕਾਂ ਵਾਸਤੇ ਇਮੀਗ੍ਰੇਸ਼ਨ ਦਫਤਰ ਖੁੱਲ੍ਹੇ ਰੱਖੇ ਗਏ ਜੋ ਰਿਫਿਊਜੀ ਪਰਿਵਾਰਾਂ ਨੂੰ ਸਪਾਂਸਰ ਕਰਨ ਵਾਸਤੇ ਅਰਜ਼ੀਆਂ ਭਰਨਾ ਚਾਹੁੰਦੇ ਹਨ।

ਮਾਂਟਰੀਆਲ ਦੇ ਇਮੀਗ੍ਰੇਸ਼ਨ ਵਿਭਾਗ ਦੇ ਬਾਹਰ ਸੈਂਕੜੇ ਅਜਿਹੇ ਲੋਕ ਮੌਜੂਦ ਸਨ।

ਸਰਕਾਰ ਵੱਲੋਂ ਸਿਰਫ਼ 750 ਅਰਜ਼ੀਆਂ ਹੀ ਮਨਜ਼ੂਰ ਕੀਤੀਆਂ ਜਾਣੀਆਂ ਸਨ ਜੋ ਕਿ ਫਰਸਟ ਕਮ ਫਰਸਟ ਬੇਸਿਸ (first come first basis) ਤੇ ਅਧਾਰਤ ਸਨ ਅਤੇ ਸਿਰਫ਼ ਉਨ੍ਹਾਂ ਅਰਜ਼ੀਆਂ ਨੂੰ ਮਨਜ਼ੂਰੀ ਦਿੱਤੀ ਜਾਣੀ ਹੈ ਜੋ ਕੋਰੀਅਰ (courier) ਰਾਹੀਂ ਭੇਜੀਆਂ ਗਈਆਂ।

ਜ਼ਿਆਦਾਤਰ ਅਰਜ਼ੀਆਂ ਉਨ੍ਹਾਂ ਸੰਸਥਾਵਾਂ ਵਾਸਤੇ ਰੱਖੀਆਂ ਗਈਆਂ ਹਨ ਜੋ ਕਿ ਅਸਾਇਲਮ (asylum) ਦੀ ਇੱਛਾ ਰੱਖਣ ਵਾਲਿਆਂ ਨੂੰ ਕਿਊਬੈਕ ਬੁਲਾਉਣਾ ਚਾਹੁੰਦੇ ਹਨ ਅਤੇ ਸਿਰਫ਼ ਸੌ ਅਰਜ਼ੀਆਂ ਦੋ ਤੋਂ ਪੰਜ ਵਿਅਕਤੀਆਂ ਦੇ ਉਨ੍ਹਾਂ ਗਰੁੱਪਾਂ ਵਾਸਤੇ ਹਨ ਜੋ ਰਿਫਿਊਜੀ ਪਰਿਵਾਰਾਂ ਨੂੰ ਸਪਾਂਸਰ ਕਰਨ ਦੇ ਚਾਹਵਾਨ ਹਨ।

ਬਹੁਤ ਸਾਰੇ ਲੋਕਾਂ ਨੇ ਸ਼ੁੱਕਰਵਾਰ ਤੋਂ ਹੀ ਵਿਭਾਗ ਦੇ ਮਾਂਟਰੀਅਲ ਦਫ਼ਤਰਾਂ ਵਿੱਚ ਦਫ਼ਤਰ ਖੁੱਲ੍ਹਣ ਦੀ ਉਡੀਕ ਕਰਨੀ ਸ਼ੁਰੂ ਕਰ ਦਿੱਤੀ।

ਕਈ ਲੋਕਾਂ ਨੂੰ ਸਪਾਂਸਰਸ਼ਿਪ ਐਪਲੀਕੇਸ਼ਨਜ਼ ਨੂੰ ਕੋਰੀਅਰ ਕਰਨ ਵਾਸਤੇ ਕਈ ਸੌ ਡਾਲਰ ਖ਼ਰਚਨੇ ਪਏ ਅਤੇ ਕੁਝ ਰਿਪੋਰਟਾਂ ਮੁਤਾਬਕ ਲੋਕ ਇੱਕ ਦੂਸਰੇ ਤੋਂ ਅੱਗੇ ਲੱਗਣ ਵਾਸਤੇ ਰਿਸ਼ਵਤ ਵੀ ਦੇਣ ਨੂੰ ਤਿਆਰ ਸਨ।

ਇੰਮੀਗ੍ਰੇਸ਼ਨ ਮਨਿਸਟਰ ਸਾਈਮਨ ਜੋਲੀ ਬਰੈੱਟ (Immigration Minister Simon Jolin-Barrette) ਨੇ ਟਵਿੱਟਰ ਰਾਹੀਂ ਕਿਹਾ ਕਿ ਸਪਾਂਸਰਸ਼ਿਪ ਐਪਲੀਕੇਸ਼ਨ ਦੀ ਪ੍ਰਕਿਰਿਆ ਵਿੱਚ ਕਾਫ਼ੀ ਮਸਲੇ ਸੁਧਾਰਨੇ ਬਾਕੀ ਹਨ। ਜ਼ਿਕਰਯੋਗ ਹੈ ਕਿ ਕਿਊਬੈਕ ਵੱਲੋਂ 2020 ਵਿੱਚ 4500 ਤੋਂ 5500 ਰਿਫਿਊਜੀ ਲਿਆਉਣ ਦੀ ਯੋਜਨਾ ਹੈ।