ਆਰ.ਸੀ.ਐਮ.ਪੀ.ਅਤੇ ਆਸਟ੍ਰੇਲੀਆਈ ਪੁਲਿਸ ਦੀ ਸਾਂਝੀ ਕਾਰਵਾਈ ਦੌਰਾਨ ਵੱਡੀ ਮਾਤਰਾ ਵਿੱਚ ਨਸ਼ਾ ਹੋਇਆ ਬਰਾਮਦ

ਬੀ. ਸੀ. ਵਿਚ ਆਰ.ਸੀ.ਐਮ.ਪੀ. ਦੀ ਫੈਡਰਲ ਪੁਲਿਸਿੰਗ ਪੈਸੀਫਿਕ ਖੇਤਰ ਯੂਨਿਟ ਨੇ ਆਸਟ੍ਰੇਲੀਆਈ ਫੈਡਰਲ ਪੁਲਿਸ ਦੀ ਮਦਦ ਨਾਲ ਇੱਕ ਕੌਮਾਂਤਰੀ ਡਰੱਗ ਰੈਕੇਟ ਦਾ ਪਰਦਾਫਾਸ਼ ਕੀਤਾ ਹੈ।

ਆਰ.ਸੀ.ਐਮ.ਪੀ. ਮੁਤਾਬਕ, ਜਾਂਚ ਜਨਵਰੀ 2026 ਵਿਚ ਉਦੋਂ ਸ਼ੁਰੂ ਹੋਈ ਜਦੋਂ ਕੈਨੇਡੀਅਨ ਬਾਰਡਰ ਸਰਵਿਸ ਏਜੰਸੀ ਦੇ ਔਫੀਸਰ ਨੇ ਤਸਵਾਵਾਸਨ ਕੰਟੇਨਰ ਐਗਜ਼ਾਮੀਨੇਸ਼ਨ ਫੈਕੀਲਿਟੀ ਵਿਖੇ ਇੱਕ ਸ਼ੱਕੀ ਸ਼ਿਪਮੈਂਟ ਦੀ ਤਲਾਸ਼ੀ ਲਈ, ਇਸ ਦੌਰਾਨ ਅਚਾਰ ਦੇ ਮਰਤਬਾਨਾਂ ਵਿਚ ਲੁਕਾ ਕੇ ਰੱਖੀ ਗਈ 115 ਕਿੱਲੋ ਮੇਥਾਮਫੇਟਾਮਾਈਨ ਬਰਾਮਦ ਹੋਈ, ਜੋ ਕਿ ਮੈਲਬੌਰਨ ਭੇਜੀ ਜਾ ਰਹੀ ਸੀ।

ਇਸ ਜਾਂਚ ਦੇ ਸਬੰਧ ਵਿਚ 17 ਮਾਰਚ ਨੂੰ ਸਿਡਨੀ ਅਤੇ ਮੈਲਬੌਰਨ ਵਿਚ 40 ਅਤੇ 63 ਸਾਲ ਦੇ ਦੋ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ, ਜਿਥੇ ਉਨ੍ਹਾਂ ਕੋਲੋਂ $400,000 ਕੈਸ਼, 8 ਕਿੱਲੋ ਸਿਲਵਰ ਬਾਰਸ, ਲਗਜ਼ਰੀ ਗੱਡੀਆਂ ਅਤੇ ਮਹਿੰਗੀਆਂ ਘੜੀਆਂ ਜ਼ਬਤ ਹੋਈਆਂ।

ਉਸੇ ਦਿਨ ਆਰ.ਸੀ.ਐਮ.ਪੀ. ਨੇ ਬੀ. ਸੀ. ਦੇ ਕੈਲੋਨਾ ਤੋਂ ਇੱਕ 46 ਸਾਲਾ ਵਿਦੇਸ਼ੀ ਨਾਗਰਿਕ ਨੂੰ ਕਾਬੂ ਕੀਤਾ, ਜੋ ਹੁਣ ਇਮੀਗ੍ਰੇਸ਼ਨ ਇਨਫੋਰਸਮੈਂਟ ਤਹਿਤ ਕਾਰਵਾਈ ਦਾ ਸਾਹਮਣਾ ਕਰ ਰਿਹਾ ਹੈ। ਪੁਲਿਸ ਨੇ ਐਬਟਸਫੋਰਡ, ਲੋਅਰ ਨਿਕੋਲਾ ਅਤੇ ਕੈਲੋਨਾ ਵਿਚ ਵੀ ਕਈ ਥਾਵਾਂ 'ਤੇ ਛਾਪੇਮਾਰੀ ਕੀਤੀ, ਜਿਥੋਂ ਕਈ ਸੈਲ ਫੋਨ ਅਤੇ ਇਲੈਕਟ੍ਰਾਨਿਕ ਡਿਵਾਈਸ ਬਰਾਮਦ ਹੋਏ ਹਨ। ਫਿਲਹਾਲ ਸ਼ੱਕੀਆਂ ਦੇ ਨਾਮ ਜਾਰੀ ਨਹੀਂ ਕੀਤੇ ਗਏ ਹਨ।